സോളാറിന് പിന്നാലെ റിസോര്ട്ട്!
മുഖ്യമന്ത്രി ഉള്പ്പെടെയുള്ളവര് സോളാര് കേസില് കബളിപ്പിക്കപ്പെട്ടിട്ടും ഇത്തരം തട്ടിപ്പുകേസുകളില് നിന്നും ജനപ്രതിനിധികള് പാഠം ഉള്ക്കൊണ്ടിട്ടില്ലെന്നതിന്റെ പുതിയ തെളിവായി റിസോര്ട്ട് വിവാദം മാറുന്നു.
വേമ്പനാട് കായലോരത്ത് അനധികൃതമായി നിര്മ്മിച്ച റിസോര്ട്ടുകള് പൊളിക്കരുതെന്ന് ആവശ്യപ്പെട്ട് ഭരണ-പ്രതിപക്ഷ എം.എല്.എ മാര് നല്കിയ കത്താണ് വിവാദമായത്. മുഖ്യമന്ത്രിക്കാണ് കത്ത് കൈമാറിയത്. കത്തില് ഒപ്പിട്ട സി.പി.എം എം.എല്.എമാരെ പാര്ട്ടി തള്ളിപറഞ്ഞു.
കായലുകളും പുഴകളും സംരക്ഷിക്കണമെന്ന കേരളത്തിന്റെ പ്രഖ്യാപിത നിലപാടിന് വിരുദ്ധമായാണ് വേമ്പനാട് കായലോരത്ത് അനധികൃത റിസോര്ട്ടുകള് നിര്മ്മിക്കപ്പെടുന്നത്. കത്തിലൊപ്പിട്ടത് അറിവുകേടുകൊണ്ടാണെന്ന് സാജുപോളും സുരേഷ്കുറുപ്പും വെളിപ്പെടുത്തി.
എം.എല്.എ മാരെ റിസോര്ട്ട് ഉടമകള് കബളിപ്പിക്കുകയായിരുന്നോ എന്ന് സംശയമുണ്ട്. സുപ്രീം കോടതി ഉത്തരവ് മൊത്തം റിസോര്ട്ടുകളെ ബാധിക്കുമെന്ന് തെറ്റിദ്ധരിപ്പിച്ചതുകൊണ്ടാണ് താന് ഒപ്പിട്ടതെന്ന് ജോസഫ് വാഴയ്ക്കല് എം.എല്.എ പറഞ്ഞു. കത്ത് പരിഗണിക്കരുതെന്ന് താന് മുഖ്യമന്ത്രിയെ അറിയിച്ചതായും വാഴയ്ക്കല് പറഞ്ഞു. കത്ത് ഓടിച്ച് വായിക്കുക മാത്രമാണ് ചെയ്തതെന്നും വാഴയ്ക്കല് പറഞ്ഞു. എന്നാല് ഇത് വിശ്വസനീയമല്ല.
കായല് കൈയ്യേറി നിര്വഹിച്ച റിസോര്ട്ടുകളെ കുറിച്ച് അന്വേഷിച്ച് റിപ്പോര്ട്ട് നല്കാന് സുപ്രീംകോടതി ഉത്തരവിട്ടതിനെ തുടര്ന്നാണ് റിസോര്ട്ട് ഉടമകള്ക്ക് വേണ്ടി എം.എല്.എ മാര് രംഗത്തെത്തിയത്. തുടര്ന്ന് അന്വേഷണത്തിനായി സര്ക്കാര് ചീഫ് സെക്രട്ടറിയെ ചുമതലപ്പെടുത്തിയിരുന്നു.
ആരെങ്കിലും കൊണ്ടുവരുന്ന കടലാസുകള് വായിച്ചു നോക്കാതെ ഒപ്പിടുന്നവരാണോ എം.എല്.എമാര് എന്ന സംശയം ബാക്കിയാവുന്നു. സരിതാനായരും ബിജുരാധാകൃഷ്ണനും ചേര്ന്ന് മുഖ്യമന്ത്രിയുടെ ഓഫീസിനെ കബളിപ്പിച്ചതിന് സമാനമാണ് പുതിയ സംഭവവും.
തെരഞ്ഞെടുപ്പ് വരുമ്പോള് ഇത്തരക്കാരെ സഹായത്തിനായി ആശ്രയിക്കേണ്ടി വരുന്നതും എം.എല്.എ മാര്ക്ക് വിനയായിമാറുന്നു.
https://www.facebook.com/Malayalivartha