ഉമ്മന്‍ചാണ്ടിക്ക്‌ വിനയായി; ആശാന്‍മാര്‍ കൊമ്പുകോര്‍ത്തു
ഉമ്മന്‍ചാണ്ടി മന്ത്രിസഭയ്‌ക്ക്‌ പുതിയ ഭീഷണി ഉയര്‍ത്തി സഹമന്ത്രിമാരായ 'ആശാന്‍മാര്‍' കൊമ്പുകോര്‍ക്കുന്നു. വൈദ്യുതഗതാഗത മന്ത്രി ആര്യാടന് മുഹമ്മദിന്റെ കഴിഞ്ഞദിവസം നടത്തിയ പ്രസ്ഥാവനയ്‌ക്കെതിരെ ധനമന്ത്രി കെ.എം. മാണി കഴിഞ്ഞ ദിവസം രംഗത്തെത്തിയിരുന്നു.
സംസ്ഥാനത്തിന്റെ സാമ്പത്തികസ്ഥിതി അതീവ ഗുരുതരമാണെന്ന്‌ മന്ത്രി ആര്യാടന് പാലക്കാട്‌ പ്രഖ്യാപിച്ചിരുന്നു. സാമ്പത്തികസ്ഥിതി മെച്ചമാണെന്ന്‌ ചിലര്‍ മേനി പറയുമെങ്കിലും സംഗതി തിരിച്ചാണെന്നും കെ.എം. മാണിയെ കുത്തി ആര്യാടന് പറഞ്ഞു. സംസ്ഥാനത്ത് വളര്‍ച്ചാനിരക്ക്‌ കുറയുന്നു. റവന്യുകമ്മി വര്‍ദ്ധിക്കുന്നു. ജീവനക്കാര്‍ക്ക്‌ ആനുകൂല്യം നല്‍കാന്‍ കടപത്രം ഇറക്കേണ്ട അവസ്ഥയുമുണ്ട്‌. എങ്കിലും ജീവനക്കാരെ കൈവെടിയില്ല. കോണ്‍ഗ്രസ്‌ അനുകൂല ജീവനക്കാരുടെ സംഘടനയായ എന്‍.ജി.ഒ അസോസിയേഷന്റെ സ്വാഗതസംഘം ഓഫീസ്‌ ഉദ്‌ഘാടനത്തിനിടയിലാണ്‌ ആര്യാടന് ഇങ്ങനെയൊക്കെ തട്ടിമൂളിയത്‌.
എന്നാല്‍ ആര്യാടന്റെ 'തലസ്ഥാനമായ' മലപ്പുറത്ത്‌ വച്ച്‌ തന്നെ മാണി തിരിച്ചടിച്ചു. ആര്യാടന്റെ വകുപ്പുകളായ കെ.എസ്.ആര്‍.റ്റി.സിയും കെ.എസ്.ഇ.ബിയും വരുത്തിവയ്‌ക്കുന്ന സാമ്പത്തിക ബാധ്യതയാണ്‌ സംസ്ഥാനത്തിന്റെ സാമ്പത്തികസ്ഥിതി മോശമാക്കുന്നതെന്നും മാണി തട്ടിവിട്ടു. രണ്ടു വകുപ്പുകളുടെയും കെടുകാര്യസ്ഥത ധനവകുപ്പിന്‌ ബാധ്യതയുണ്ടാക്കുന്നതായും ആര്യാടന്റെ ഭരണരീതിയെ വിമര്‍ശിച്ച്‌ കെ.എം.മാണി 'കടത്തിപറഞ്ഞു'.
ആര്യാടനും മാണിയും തമ്മിലുള്ള അങ്കത്തിന്‌ ഉമ്മന്‍ചാണ്ടിയുടെ മന്ത്രിസഭയോളം പ്രായമുണ്ട്‌. താന്‍ നോട്ടമിട്ട വകുപ്പ്‌ മാണി തട്ടിയെടുത്തെന്നാണ്‌ ആര്യാടന്റെ പരിഭവം. എന്നാല്‍ കെ.എം. മാണി ധനമന്ത്രിയായില്ലെങ്കിലും ഉമ്മന്‍ചാണ്ടിയുമായുള്ള ആര്യാടന്റെ ഇരിപ്പുവശം അനുസരിച്ച്‌ ആര്യാടന് ധനവകുപ്പ്‌ കിട്ടുമായിരുന്നില്ല. അന്നു തുടങ്ങിയ വാക്‌പ്പോര്‌ ആര്യാടന് തുടര്‍ന്നു വരികയായിരുന്നു.
കെ.എം. മാണിയുടെ ആസ്ഥാനമായ പാലായില്‍ ചെന്ന്‌ ആര്യാടന് അദ്ദേഹത്തെ വിമര്‍ശിച്ചപ്പോള്‍ കെ.പി.സി.സി ആസ്ഥാനത്ത്‌ ചെന്ന്‌ കെ.എം.മാണി മറുപടി പറഞ്ഞു. ഇന്ത്യന്‍ നാഷണല്‍ കോണ്‍ഗ്രസിന്‌ മുമ്പില്‍ കേരള കോണ്‍ഗ്രസ്‌ ആരുമല്ലെന്നാണ്‌ അന്ന്‌ ആര്യാടന് പറഞ്ഞത്‌. പൂന്തോട്ടമാകുമ്പോള്‍ മുല്ലയും പിച്ചിയും തുളസിയുമൊക്കെ വേണമെന്നായിരുന്നു മാണിയുടെ മറുപടി.
എന്നാല്‍ സംസ്ഥാനം കടുത്ത സാമ്പത്തിക പ്രതിസന്ധിയിലാണ്‌. ഓണത്തിന്‌ രണ്ട് ശമ്പളം കൊടുക്കാന്‍ നിവൃത്തിയില്ലാതെ സെപ്‌തംബറിലെ ശമ്പളത്തിന്റെ 25 ശതമാനം മാത്രം മുന്‍കൂര്‍ വാങ്ങാന്‍ അനുമതി നല്‍കി. ഓണക്കാലത്തെ അധികബാധ്യത നേരിടാന്‍ സര്‍ക്കാര്‍ 1100 കോടി രൂപയുടെ കടപത്രം ഇറക്കാന്‍ തീരുമാനിച്ചിട്ടുണ്ട്‌.
സോളാര്‍ വിവാദം ഊതികെടുത്തിയപ്പോള്‍ വരുന്നു പുതിയ വിവാദം!
https://www.facebook.com/Malayalivartha
