കണ്ണീര്ക്കാഴ്ചയായി... ഹോട്ടലില് നിന്ന് കോണ്ക്രീറ്റ് സണ്ഷേഡ് അടര്ന്നു തലയില് പതിച്ച് ലോട്ടറിക്കടയിലെ ജീവനക്കാരന് ദാരുണാന്ത്യം
കണ്ണീര്ക്കാഴ്ചയായി... കോട്ടയം നഗരമധ്യത്തില് മുനിസിപ്പാലിറ്റിക്കു മുന്വശത്തുള്ള രാജധാനി ഹോട്ടലില്നിന്ന് കോണ്ക്രീറ്റ് സണ്ഷേഡ് അടര്ന്നു തലയില് പതിച്ച് ലോട്ടറിക്കടയിലെ ജീവനക്കാരന് ദാരുണാന്ത്യമുണ്ടായി. കെട്ടിടത്തിന്റെ താഴത്തെനിലയില് പ്രവര്ത്തിച്ചിരുന്ന മീനാക്ഷി ലോട്ടറീസിലെ ജീവനക്കാരനാണ് മരിച്ചത്.
ചങ്ങനാശ്ശേരി പായിപ്പാട് പള്ളിക്കച്ചിറ കല്ലുപ്പറമ്പ് വീട്ടില് കെ.ജെ.എബ്രഹാമിന്റെ മകന് ജിനോ കെ.എബ്രഹാം (46) ആണ് മരിച്ചത്. ഇന്നലെ രാത്രി 8.35- നായിരുന്നു അപകടം സംഭവിച്ചത്.
ലോട്ടറിക്കട അടച്ച് പോകാനൊരുങ്ങുമ്പോഴാണ് അപകടം നടന്നത്. രാജധാനി ഹോട്ടലിന്റെ രണ്ടാംനിലയിലെ ജനലിനോട് ചേര്ന്ന് നിര്മിച്ച കോണ്ക്രീറ്റ് സണ്ഷേഡാണ് റോഡില് നില്ക്കുകയായിരുന്ന ജിനോയുടെ തലയില് വീണത്. അടുത്തിടെ നവീകരിച്ച ഭാഗമാണിത്.
ഇഷ്ടികയും കോണ്ക്രീറ്റും ചേര്ത്ത് ജനലിന് മേല്ഭാഗത്ത് നിര്മിച്ച ഷേഡാണ് വീണതെന്നും ഇഷ്ടിക തലയില് പതിച്ചാണ് മരണമെന്നും വെസ്റ്റ് പോലീസ് പറഞ്ഞു. ഓടിക്കൂടിയ നാട്ടുകാര് ജില്ലാ ജനറല് ആശുപത്രിയില് എത്തിച്ചെങ്കിലും മരിച്ചു. മൃതദേഹം ജനറല് ആശുപത്രി മോര്ച്ചറിയില്. ജിനോയുടെ ഭാര്യ: ഷീജ. മക്കള്: അഡോണ്, അര്ഷോ (ഇരുവരും വിദ്യാര്ഥികള്)
"
https://www.facebook.com/Malayalivartha
