വെല്ലുവിളിച്ചിട്ടും സിപിഎമ്മുകാരെ കാണാനില്ല. ഉയര്‍ന്ന് വന്ന ആരോപണങ്ങള്‍ക്ക് തന്നാല്‍ കഴിയുന്ന വിധം മറുപടി നല്‍കിയതായി മാത്യു കുഴല്‍നാടന്‍ പറഞ്ഞു. എന്നാല്‍ താന്‍ ഉന്നയിച്ച ചോദ്യങ്ങള്‍ക്ക് ഇതുവരെ മറുപടി ലഭിച്ചിട്ടില്ലെന്നും അദ്ദേഹം ചൂണ്ടിക്കാട്ടി. ഫെയ്‌സ്ബുക്കില്‍ പോസ്റ്റ് ചെയ്ത വീഡിയോയിലൂടെയായിരുന്നു അദ്ദേഹത്തിന്റെ പ്രതികരണം. അല്ലെങ്കിലും വെല്ലുവിളി ഒന്നും ഏറ്റെടുക്കാന്‍ സിപിഎമ്മിന് ധൈര്യമില്ല. മാത്യു കുഴല്‍നാടന്‍ സിപിഎമ്മിനെ ഇറുക്കി പിടിച്ചിരിക്കുകയാണ്.

ചിന്നക്കനാലിലെ ഭൂമിയുമായി ബന്ധപ്പെട്ട ആധാരത്തില്‍ കെട്ടിടമുണ്ടെന്ന കാര്യം എവിടെയും മറച്ചുവച്ചിട്ടില്ല. കെട്ടിടത്തിന്റെ വിലയും ആധാരത്തില്‍ വ്യക്തമാക്കിയിട്ടുണ്ട്. താന്‍ ആ വസ്തു വാങ്ങിയതിന് ശേഷം ഒരിക്കല്‍ പോലും അതില്‍ നിര്‍മാണം നടത്തിയിട്ടില്ല. വസ്തുവിനെ ഹോംസ്‌റ്റേയുടെ വിഭാഗത്തില്‍പ്പെടുത്തി ടൂറിസം സൗകര്യങ്ങള്‍ക്കായി ഉപയോഗിക്കുന്നതിന് ഒരു തടസ്സവുമില്ല. അത്തരം അപേക്ഷയാണ് പഞ്ചായത്തില്‍ നല്‍കിയത്. അനുമതി വാങ്ങിയതിന് ശേഷമാണ് പ്രവര്‍ത്തനം നടത്തുന്നതെന്നും മാത്യു വ്യക്തമാക്കി.

താന്‍ തിരഞ്ഞെടുപ്പില്‍ സ്ഥാനാര്‍ഥിയായപ്പോഴാണ് വസ്തുവിന്റെ രജിസ്‌ട്രേഷന്‍ പൂര്‍ത്തിയാക്കുന്നത്. മൊത്തം ഭൂമിയും രജിസ്റ്റര്‍ ചെയ്യാനാണ് പറഞ്ഞിരുന്നത്. മൂന്ന് പേരുടെ പേരിലാണ് സ്ഥലം ഉണ്ടായിരുന്നത്. അമ്മ സ്ഥലത്ത് ഉണ്ടായിരുന്നപ്പോള്‍ അവര്‍ വന്ന് രജിസ്റ്റര്‍ ചെയ്തു. മക്കള്‍ സ്ഥലത്തില്ലാതിരുന്നതിനാല്‍ അവരുടെ ഭാഗം പിന്നീടാണ് പൂര്‍ത്തിയാക്കിയത്. അതുകൊണ്ടാണ് ആദ്യത്തെ രജിസ്‌ട്രേഷന്‍ 1.92 കോടി എന്ന് കാണിക്കാനിടയായത്, മാത്യു പറഞ്ഞു.

എന്തുകൊണ്ടാണ് എന്‍.ഒ.സിക്ക് അപേക്ഷിച്ചത് എന്നതാണ് മറ്റൊരു വിഷയം. ഇടുക്കി ജില്ലയില്‍ എട്ട് വില്ലേജുകളില്‍ പുതിയതായി കെട്ടിടം പണിയണമെങ്കില്‍ എന്‍.ഒ.സി ആവശ്യമാണ്. അതും താനല്ല സമര്‍പ്പിച്ചത്. തനിക്ക് മുമ്പ് വസ്തുവിന്റെ ഉടമകളായിരുന്നവരാണ് അപേക്ഷ സമര്‍പ്പിച്ചതെന്നും അദ്ദേഹം പറഞ്ഞു.

നിലവില്‍ പുതുപ്പള്ളിയിലെ തിരഞ്ഞെടുപ്പ് പ്രചാരണത്തിന്റെ തിരക്കിലാണ്. വിഷയത്തില്‍ കൂടുതല്‍ സമയം കളയാനില്ല. ഇനിയും വിഷയത്തില്‍ വ്യക്തത വരുത്താന്‍ സാധിക്കില്ല. തന്നോടുള്ള ചോദ്യങ്ങള്‍ക്ക് പല ആവര്‍ത്തി മറുപടി പറഞ്ഞു. എന്നാല്‍ തിരിച്ചുയര്‍ത്തുന്ന ഒരു ചോദ്യത്തിന് പോലും കേരളത്തിലെ പൊതുസമൂഹത്തിനു മുന്‍പില്‍ മുഖ്യമന്ത്രിയോ അദ്ദേഹത്തിന്റെ മകളോ, അവരുടെ ഭര്‍ത്താവ് മുഹമ്മദ് റിയാസോ യാതൊരുവിധ മറുപടിയും നല്‍കിയിട്ടില്ലെന്നും അദ്ദേഹം ചൂണ്ടിക്കാട്ടി.