ഒഡിഷയില് കാട്ടുതീ പടരുന്നു...അഗ്നിരക്ഷാസേനയും വനംവകുപ്പു ജീവനക്കാരും കാട്ടുതീ നിയന്ത്രിക്കാനുള്ള പ്രവര്ത്തനങ്ങള് തുടരുന്നു
ഒഡിഷയില് കാട്ടുതീ പടരുന്നു. സിമലിപാല് കടുവ സംരക്ഷണ കേന്ദ്രത്തില് ദിവസങ്ങള്ക്കുമുമ്പ് ആരംഭിച്ച തീ തുടരുന്നതിനിടെ സമീപ്രദേശമായ കുല്ദിഹ വന്യമൃഗസംരക്ഷണ കേന്ദ്രത്തിലും ബൗധ് വനമേഖലയിലും ശനിയാഴ്ച കാട്ടുതീ പടര്ന്നു.
സംസ്ഥാനത്ത് ശനിയാഴ്ച 359 സ്ഥലങ്ങളില് തീപ്പിടിത്തം തുടരുന്നതായി ഫോറസ്റ്റ് സര്വേ ഓഫ് ഇന്ത്യ വ്യക്തമാക്കി. അഗ്നിരക്ഷാസേനയും വനംവകുപ്പു ജീവനക്കാരും കാട്ടുതീ നിയന്ത്രിക്കാനുള്ള പ്രവര്ത്തനങ്ങള് തുടരുകയാണ്.
സിമലിപാലിലെ 21 വനമേഖലകളില് എട്ടിലും തീ പടര്ന്നിട്ടുണ്ട്. 94 ഇനം ഓര്ക്കിഡുകള്, 38 ഇനം മത്സ്യങ്ങള്, 164 ഇനം ചിത്രശലഭങ്ങള്, 55 ഇനം സസ്തനികള്, 304 ഇനം പക്ഷികള്, 21 ഇനം ഉഭയജീവികള് എന്നിവയുടെ ആവാസകേന്ദ്രമാണ് സിമലിപാല്.
മദ്യം നിര്മിക്കുന്നതിനായി ഉപയോഗിക്കുന്ന മഹുവാ പൂക്കള് ശേഖരിക്കാനും തടി കള്ളക്കടത്ത്, വേട്ടയാടല് എന്നിവയ്ക്കായും വനമേഖലയില് അതിക്രമിച്ചു കടന്നവര് കരിയിലകള് കൂട്ടിയിട്ട് കത്തിക്കുന്നതാണ് കാട്ടുതീയ്ക്കു കാരണമാകുന്നതെന്നാണ് കരുതുന്നത്.
വേനല്ക്കാലത്തിന് തുടക്കമായതും തീ വേഗത്തില് പടരാന് കാരണമായതായി കണക്കാക്കുന്നു.ഫെബ്രുവരി 27 മുതല് 12,614 തീപ്പിടിത്തങ്ങളാണ് ഒഡിഷയില് ഉണ്ടായിട്ടുള്ളത്. ഫോറസ്റ്റ് സര്വേ ഓഫ് ഇന്ത്യയുടെ കണക്കുപ്രകാരം കാട്ടുതീയുടെ കാര്യത്തില് ഒഡിഷയാണ് ഒന്നാം സ്ഥാനത്തുള്ള സംസ്ഥാനം. 4,490 തീപ്പിടിത്തവുമായി തെലങ്കാനയാണ് രണ്ടാം സ്ഥാനത്ത്.
നവംബര് ഒന്നിന് ശേഷം ഒഡിഷയില് 16,494 തീപ്പിടിത്തങ്ങളാണുണ്ടായത്. രാജ്യത്തെ ഏറ്റവും ഉയര്ന്ന കണക്കാണിത്.
"
https://www.facebook.com/Malayalivartha