തന്റെ പത്തൊൻപതാം വയസിൽ നാട് മുഴുവൻ അറിയപ്പെടുന്ന ​പെൺഗുണ്ട. കൊടുംക്രിമിനലായ രേഖ മീണയെക്കുറിച്ച് പൊലീസ് പറയുന്നത് ഇങ്ങനെയാണ്. കഴിഞ്ഞ ദിവസം രാജസ്ഥാനിലെ കരൗലി ജില്ലയിൽ അറസ്റ്റിലായ രേഖ മീണയാണിപ്പോൾ സോഷ്യൽ മീഡിയയിൽ നിറഞ്ഞുനിൽക്കുന്നത്. അധിക്ഷേപകരമായ വീഡിയോ സോഷ്യല്‍ മീഡിയയില്‍ പോസ്റ്റ് ചെയ്തതിനാണ് രേഖയെ പൊലീസ് അറസ്റ്റ് ചെയ്തത്. 19 വയസിനുള്ളില്‍ രേഖ ചെയ്യാത്ത കുറ്റകൃത്യങ്ങളില്ല. രാജസ്ഥാനിലെ ക്രിമിനല്‍ ലോകത്ത് ഉദയം ചെയ്ത ലേഡി ഡോണായി രേഖ വളരെ പെട്ടെന്നു തന്നെ മാറി. കൊലപാതകത്തിനും ആക്രമണത്തിനുമൊക്കെ ഇവർക്കെതിരെ കേസ് രജിസ്റ്റർ ചെയ്തിട്ടുണ്ട്.

കരൗളി സ്വദേശിനിയായ രേഖ മീണയ്ക്ക് ഏറ്റവും ഇഷ്ടം മദ്യപാനവും, ഡാന്‍സുമാണ്. ഇതോടൊപ്പം ഫേസ്ബുക്കില്‍ ലൈവില്‍ വന്ന് എതിരാളികളെ ഭീഷണിപ്പെടുത്തുകയും വൃത്തികെട്ട അധിക്ഷേപങ്ങള്‍ നടത്തുകയും ചെയ്യാറുണ്ടായിരുന്നു. അറസ്റ്റ് ചെയ്യാനെത്തിയ പോലീസ് സംഘത്തെ പോലും അവർ അധിക്ഷേപിച്ചു.

2021 സെപ്തംബര്‍ 28 ന് ഇവര്‍ ഫേസ്ബുക്കില്‍ ഒരു വീഡിയോ ‌ചെയ്തിരുന്നു. വീഡിയോയില്‍, അനുരാജ് എന്ന ക്രിമിനല്‍ തന്റെ കൂട്ടാളികളുമായി ചേര്‍ന്ന് ബിജല്‍പൂര്‍ ഭഡ്ക്യ ഗ്രാമത്തില്‍ താമസിക്കുന്ന പപ്പുലാല്‍ മീണയെ മര്‍ദ്ദിക്കുകയായിരുന്നു. ഭീഷണിപ്പെടുത്തിയതിന് പുറമെ, പപ്പുലാലിന്റെ വയറില്‍ സംഘം വെടിവയ്ക്കുകയും ചെയ്തു. അനുരാജിന്റെ അടുത്ത സുഹൃത്താണ് രേഖ മീണ.

തോഡഭിമിലെ നംഗ്ല ലാത്തിലാണ് രേഖയുടെ കുടുംബം താമസിക്കുന്നത്. രേഖയുടെ കുട്ടിക്കാലത്ത് തന്നെ അമ്മ മരിച്ചു. അച്ഛന്‍ ഗ്രാമത്തില്‍ തന്നെ കൃഷി ചെയ്ത് കുടുംബം പുലര്‍ത്തുന്നു. ജയ്പൂരിലെ ജഗത്പുരയില്‍ സ്‌കൂള്‍ വിദ്യാഭ്യാസം നടത്തിയ രേഖ ക്രിമിനല്‍ സംഘത്തില്‍ പെട്ടത് പിതാവ് പോലും അറിഞ്ഞിരുന്നില്ലെന്ന് പൊലീസ് പറയുന്നു. ജയ്പൂരിലെ പ്രശസ്തമായ ഒരു സ്‌കൂളിലെ വിദ്യാര്‍ത്ഥിനിയാണെന്നാണ് രേഖ സ്വയം വിശേഷിപ്പിക്കുന്നത്. സോഷ്യല്‍ സൈറ്റുകളില്‍ രേഖയുടെ ഫോളോവേഴ്സും കുറവല്ല. റൈഡിംഗ് ഇഷ്ടപ്പെടുന്ന രേഖ മീണയ്ക്ക് സ്‌പോര്‍ട്‌സ് ബൈക്കുകളും ആഡംബര കാറുകളുമാണ് ഇഷ്ടം.

ജനുവരി 19ന് വൈകുന്നേരം ഭാഡ്ക്യാ പ്യൗവിന് സമീപം കണ്ടതായി സൂചന ലഭിച്ചതിനെ തുടര്‍ന്നാണ് പ്രതിയെ പിടികൂടിയതെന്ന് പോലീസ് പറഞ്ഞു. രേഖ ആദ്യമായി പൊലീസിന്റെ പിടിയിലായപ്പോൾ അവരിൽ നിന്ന് പുറത്തുവന്ന പല കാര്യങ്ങളും വളരെ ഞെട്ടിക്കുന്നതായിരുന്നു. നാട്ടിൽ രേഖയുടെ പേര് കേട്ടാൽ പോലും ഇപ്പോൾ ആളുകൾക്ക് ഭയമാണ്.