കേന്ദ്രത്തിന്റെയും സംസ്ഥാനങ്ങളുടെയും പ്രാദേശിക ഭരണകൂടത്തിന്റെയും ടീം വർക്ക് മികച്ച ഫലം നൽകുന്നുണ്ട്; ജില്ലാ തലത്തിലുള്ള സേവനം നല്ലതാണെങ്കിൽ സർക്കാർ പദ്ധതികൾ മികച്ച രീതിയിൽ ജനങ്ങളിലേക്ക് എത്തിക്കാനും നടപ്പിലാക്കാനും സാധിക്കും; രാജ്യത്തെ വിവിധ ജില്ലകളിലെ കളക്ടർമാരെ വിളിച്ച് കൂട്ടി പ്രധാനമന്ത്രി നരേന്ദ്ര മോദി
രാജ്യത്തെ വിവിധ ജില്ലകളിലെ കളക്ടർമാരെ വിളിച്ച് കൂട്ടി പ്രധാനമന്ത്രി നരേന്ദ്ര മോദി . ജില്ലകളിൽ നടപ്പിലാക്കുന്ന കേന്ദ്ര സർക്കാർ പദ്ധതികളുടെയും പരിപാടികളുടെയും നടത്തിപ്പിനെക്കുറിച്ച് പ്രധാനമന്ത്രി നേരിട്ട് അഭിപ്രായം തേടുകയുണ്ടായി . വിവിധ പദ്ധതികളുടെ പുരോഗതിയെക്കുറിച്ചും നിലവിലെ അവസ്ഥയെക്കുറിച്ചും പ്രധാനമന്ത്രി വിലയിരുത്തലിന് വിധേയമാക്കി.
രാജ്യത്തെ മുന്നോട്ട് നയിക്കാൻ ഐക്യദാർഢ്യത്തോടെ പ്രവർത്തിക്കുന്ന ജില്ലാ ഭരണകൂടങ്ങളെ അദ്ദേഹം പ്രശംസിച്ചു . കേന്ദ്രത്തിന്റെയും സംസ്ഥാനങ്ങളുടെയും പ്രാദേശിക ഭരണകൂടത്തിന്റെയും ടീം വർക്ക് മികച്ച ഫലം നൽകുന്നുണ്ടെന്ന് അദ്ദേഹം വ്യക്തമാക്കി. കേന്ദ്ര പദ്ധതികൾ വിലയിരുത്താൻ ജില്ലാ കള്ക്ടർമാരുമായി നടത്തിയ യോഗത്തിലായിരുന്നു പ്രധാനമന്ത്രി ഇക്കാര്യം വ്യക്തമാക്കിയത്. മറ്റുള്ളവരുടെ ആഗ്രഹങ്ങൾ നമ്മുടെ അഭിലാഷമായി മാറണം . അവരുടെ സ്വപ്നങ്ങൾ സാക്ഷാത്കരിക്കുന്നത് നമ്മുടെ വിജയത്തിന്റെ അളവുകോലായി മാറണം .
അങ്ങനെ വരുമ്പോൾ നമ്മുടെ പ്രവർത്തനം ചരിത്രം സൃഷ്ടിക്കുമെന്നും അദ്ദേഹം പറഞ്ഞു . ഇന്ന് രാജ്യത്തെ വിവിധ ജില്ലകൾ ചരിത്രമെഴുതുന്നത് നാം കാണുന്നുണ്ട്. പൊതുജനങ്ങളുമായി നേരിട്ട് വൈകാരിക ബന്ധമുണ്ടെങ്കിൽ മാത്രമേ ‘മുകളിൽ നിന്ന് താഴേക്കും’, ‘താഴെ നിന്ന് മുകളിലേക്കും’സർക്കാർ പ്രവർത്തനങ്ങൾ നടക്കൂ. സർക്കാർ സംവിധാനങ്ങളോ ഉദ്യോഗസ്ഥരോ ഒന്നും തന്നെ മാറുന്നില്ല.
എന്നാൽ ഇതിന്റെ ഫലം വളരെ മികച്ചതാണ്. ഒന്നിച്ചുള്ള പ്രവർത്തനമാണ് ഇതിന് കാരണമെന്നും അദ്ദേഹം വ്യക്തമാക്കി. ജില്ലാ തലത്തിലുള്ള സേവനം നല്ലതാണെങ്കിൽ സർക്കാർ പദ്ധതികൾ മികച്ച രീതിയിൽ ജനങ്ങളിലേക്ക് എത്തിക്കാനും നടപ്പിലാക്കാനും സാധിക്കുമെന്ന് മോദി ചൂണ്ടിക്കാണിക്കുകയുണ്ടായി . ജനങ്ങളുമായി കൂടുതൽ ആശയവിനിമയം നടത്താൻ ഫീൽഡ് വർക്കുകളും പരിശോധനകളും നടത്തണമെന്ന് അദ്ദേഹം ഉദ്യോഗസ്ഥരോട് പറഞ്ഞു.
സർവീസിലെ ആദ്യ ദിനത്തിൽ ഉണ്ടായിരുന്ന അതേ ആവേശത്തോടെ രാജ്യത്തിന് വേണ്ടി പ്രവർത്തിക്കാൻ സിവിൽ സർവീസ് ഉദ്യോഗസ്ഥർ തയ്യാറാകണമെന്നും പ്രധാനമന്ത്രി വ്യക്തമാക്കി. കഴിഞ്ഞ കുറച്ച് വർഷങ്ങൾക്കിടെ രാജ്യത്തെ ഏകദേശം എല്ലാ വീടുകൾക്കും ശൗചാലയം ലഭിക്കുകയും എല്ലാ ഗ്രാമങ്ങളിലും വൈദ്യുതി എത്തുകയും ചെയ്തിട്ടുണ്ട്. ഇത് ജനങ്ങളുടെ ജീവിതത്തിന് കൂടുതൽ ഊർജ്ജം പകരുന്നുണ്ട്. നാല് വർഷത്തിനിടെ എല്ലാ ജില്ലയിലും ‘ജൻ ധൻ’ അക്കൗണ്ടുകൾ നാലോ അഞ്ചോ മടങ്ങ് വർദ്ധിച്ചിട്ടുണ്ടെന്നും പ്രധാനമന്ത്രി വ്യക്തമാക്കി
https://www.facebook.com/Malayalivartha