തെരഞ്ഞെടുപ്പ്​ റാലികള്‍ക്കുള്ള വിലക്ക്​ ജനുവരി 31 വരെ തുടരുമെന്ന്​ തെരഞ്ഞെടുപ്പ്​ കമീഷന്‍ അറിയിച്ചു. തെരഞ്ഞെടുപ്പ്​ നടക്കുന്ന അഞ്ച്​ സംസ്ഥാനങ്ങളിലാണ്​ വിലക്ക്​. രാജ്യത്തെ കോവിഡ്​ വ്യാപനത്തിന്‍റെ പശ്​ചാത്തലത്തിലാണ്​ തീരുമാനം. നിയന്ത്രണങ്ങള്‍ പാലിക്കാത്ത പാര്‍ട്ടികള്‍ക്കെതിരെ കര്‍ശന നടപടിയുണ്ടാകുമെന്നും തെരഞ്ഞെടുപ്പ്​ കമീഷന്‍ അറിയിച്ചു.

വീടുകള്‍ കയറിയുള്ള പ്രചാരണത്തിന്​ പരമാവധി അഞ്ച്​ പേരെ മാത്രമേ അനുവദിക്കുവെന്നും കമ്മീഷന്‍ അറിയിച്ചു. തെരഞ്ഞെടുപ്പ്​ പ്രചാരണത്തില്‍ കോവിഡ്​ മാനദണ്ഡം പാലിക്കുന്നുണ്ടോയെന്ന്​ ഉറപ്പാക്കാനുള്ള ഉത്തരവാദിത്തം ചീഫ്​ സെക്രട്ടറി അല്ലെങ്കില്‍ ജില്ലാ മജിസ്​ട്രേറ്റുമാര്‍ക്കാണെന്ന്​ കമ്മീഷന്‍ വ്യക്​തമാക്കി. നേരത്തെ ജനുവരി 15ന്​ നടന്ന യോഗത്തില്‍ റാലികള്‍ക്കുള്ള നിയന്ത്രണം ജനുവരി 22 വരെ കമീഷന്‍ നീട്ടിയിരുന്നു.

അതേസമയം, ഇന്‍ഡോര്‍ യോഗങ്ങള്‍ നടത്താന്‍ ചില ഇളവുകള്‍ കമീഷന്‍ പ്രഖ്യാപിച്ചിട്ടുണ്ട്​. 300 ആളുകളുമായി ഇന്‍ഡോര്‍ മീറ്റിങ്ങുകള്‍ നടത്താമെന്നാണ്​ കമീഷന്‍ ഉത്തരവ്​. കേ​ന്ദ്ര ആരോഗ്യമന്ത്രാലയവുമായും തെരഞ്ഞെടുപ്പ്​ നടക്കുന്ന അഞ്ച്​ സംസ്ഥാനങ്ങളിലെ ആരോഗ്യ വിദഗ്​ധരുമായും കൂടിയാലോചന നടത്തിയതിന്​ ശേഷമാണ്​ കമീഷന്‍ നിര്‍ണായക ഉത്തരവ്​ പുറപ്പെടുവിച്ചത്​.