രാഹുല്‍ ഗാന്ധിയുടെ മനസുമാറാന്‍ രാജസ്ഥാനില്‍ നടക്കുന്ന ചിന്താശിബിരത്തില്‍ കോണ്‍ഗ്രസ് പ്രവര്‍ത്തകരുടെ പ്രത്യേക പൂജ. കോണ്‍ഗ്രസില്‍ ആരൊക്കെ രാഹുല്‍ ഗാന്ധിയെ പൂജിച്ചാലും ഇന്നത്തെ നിലയില്‍ കോണ്‍ഗ്രസ് പാര്‍ട്ടി രക്ഷപ്പെടില്ല. ഇന്ദിരാഗാന്ധിയുടെയും രാജീവ് ഗാന്ധിയുടെയും കാലത്ത് കോണ്‍ഗ്രസിന്റെ കരുത്ത് ജനങ്ങളായിരുന്നു.

ഇന്ത്യയിലെ ഗ്രാമങ്ങളിലും നഗരങ്ങളിലുമുള്ള കോടിക്കണക്കിന് ജനങ്ങളുടെ വിശ്വാസമായിരുന്നു ഇന്ത്യയുടെ രാഷ്ട്രീയ ഗംഗയായ കോണ്‍ഗ്രസിന്റെ കരുത്ത്. ഇന്നാവട്ടെ കോണ്‍ഗ്രസ് അടിത്തറയിളകിയതും  നേതാക്കളില്ലാത്തതുമായ പ്രസ്ഥാനമായി ഓരോ സംസ്ഥാനത്തും ദുര്‍ബലമായിരിക്കുന്നു. ആ നിലയില്‍ പൂജയുടെ ഫലമായി രാഹുല്‍ ഗാന്ധി ഒരിക്കല്‍ക്കൂടി കോണ്‍ഗ്രസ് പാര്‍ട്ടിയുടെ അധ്യക്ഷനായാല്‍തന്നെ കോണ്‍ഗ്രസിന് ഭരണത്തില്‍ തിരിച്ചുവരാനുള്ള സാധ്യതയും സാഹചര്യവും നിലവിലില്ല.

കേവലം രണ്ടോ മൂന്നോ സംസ്ഥാനങ്ങളിലേക്കു ചുരുങ്ങുന്ന പ്രാദേശിക പാര്‍ട്ടിയുടെ തലത്തിലേക്ക് കോണ്‍ഗ്രസ് ചെറുതായിരിക്കുന്നു. 23സംസ്ഥാനങ്ങളില്‍ കോണ്‍ഗ്രസിന് ഒരു എംപിപോലുമില്ലെന്ന ദയനീയാവസ്ഥയിലാണ് രാഹുല്‍ ഗാന്ധിയുടെ നേതൃത്വത്തില്‍ ഭരണം തിരികെ പിടിക്കാനുള്ള അവസാനത്തെ പയറ്റ് കോണ്‍ഗ്രസ് പയറ്റാന്‍ പോകുന്നത്.

കോണ്‍ഗ്രസ് അധ്യക്ഷസ്ഥാനം ഏറ്റെടുക്കാന്‍ രാഹുല്‍ ഗാന്ധിക്ക്  മനസുണ്ടാകണമെന്ന പ്രാര്‍ഥനയോടെയാണ് ചിന്തന്‍ ശിബിര്‍ വേദിയില്‍ നടന്നരാഹുല്‍- പ്രിയങ്ക സേന ഹോമകുണ്ഡപൂജ  ഒരുക്കിയത്. ്അധ്യക്ഷപദവി ഏറ്റെടുക്കാന്‍ ഏതാനും വര്‍ഷങ്ങളായി മടിച്ചുനില്‍ക്കുന്ന രാഹുലിന്റെ മനസ് മാറാനാണ് പൂജയെന്ന് സംഘാടകര്‍ പറഞ്ഞു. സോണിയാ ഗാന്ധിയുടെയും കേരളത്തില്‍ നിന്നുള്ള എംപിമാരുടെയും പ്രത്യേകമായ പിന്തുണയും ഇന്നു നടന്ന പൂജയ്ക്കുണ്ടായിരുന്നുവെന്നാണ് സൂചനകള്‍.

വാക്കിലും വ്യക്തിത്വത്തിലും സമീപനത്തിലും ഇന്ത്യയിലെ പുതിയ തലമുറയെ കയ്യിലെടുക്കാനുള്ള പ്രാപ്തി രാഹുല്‍ ഗാന്ധിക്കില്ലെന്നതാണ് നിലവിലെ പരിമിതി. കഴിഞ്ഞ ഒരു പതിറ്റാണ്ട് കാണിക്കാത്ത മാന്ത്രിക സിദ്ധി ഇനി ഒരു അവസരം കിട്ടിയാല്‍ രാഹുല്‍ ഗാന്ധിയില്‍ നിന്നുണ്ടാകും എന്നു പ്രതീക്ഷിക്കുന്നവര്‍ കോണ്‍ഗ്രസ് പാര്‍ട്ടിയില്‍പോലും അധികം
പേരുണ്ടാകില്ല.

ആഗസ്തിലെ പ്രസിഡന്റ് തെരഞ്ഞെടുപ്പിലൂടെ രാഹുല്‍ ഗാന്ധി അധ്യക്ഷ സ്ഥാനത്തേക്ക് മടങ്ങിയെത്തണമെന്ന് കോണ്‍ഗ്രസിലെ മുതിര്‍ന്ന നേതാക്കളെല്ലാം ചിന്തന്‍ ശിബിരത്തില്‍ ആവശ്യപ്പെട്ടിരിക്കുകയാണ്. കോണ്‍ഗ്രസില്‍ പാര്‍ട്ടിയുടെ നേതൃത്വം ഏറ്റെടുക്കാന്‍ മറ്റൊരു നേതാവില്ലെന്നതാണ് ഈ പ്രസ്ഥാനം നേരിടുന്ന പരിമിതി. ഒക്‌ടോബര്‍ മുതല്‍ രാജ്യവ്യാപകമായി ജനജാഗരണ്‍ യാത്രയ്ക്കും രാഹുല്‍ നേതൃത്വം നല്‍കണമെന്നും കോണ്‍ഗ്രസ് ദുര്‍ബലപ്പെട്ട ഉത്തരേന്ത്യ
കേന്ദ്രീകരിച്ചാകണം യാത്രയെന്നുമാണ് തീരുമാനം. മൂന്നു പതിറ്റാണ്ടു മുന്‍പ് പി.വി. നരസിംഹ റാവു പാര്‍ട്ടിയുടെ പ്രസിഡന്റായിരിക്കെ നിര്‍ത്തലാക്കിയ പാര്‍ലമെന്ററി ബോര്‍ഡ് പുനഃസ്ഥാപിക്കാനാണ് കോണ്‍ഗ്രസിന്റെ തീരുമാനം.   

പാര്‍ലമെന്റില്‍ കേന്ദ്രത്തിനെതിരെ പോരാട്ടം നയിക്കാനും ബിജെപിക്കെതിരായ രാഷ്ട്രീയ നീക്കങ്ങള്‍ക്കു രൂപം നല്‍കാനും ബോര്‍ഡ് പുനഃസ്ഥാപിക്കണമെന്നും ചിന്തന്‍ ശിബിരത്തിലെ കരടു സംഘടനാകാര്യ പ്രമേയം ശുപാര്‍ശ ചെയ്തു.

പാര്‍ട്ടിയിലെ വിമത പക്ഷമായ ജി 23 സംഘവും രാഷ്ട്രീയ തന്ത്രജ്ഞന്‍ പ്രശാന്ത് കിഷോറും മുന്‍പ് ഇക്കാര്യം ആവശ്യപ്പെട്ടിരുന്നു. കോണ്‍ഗ്രസ് പ്രസിഡന്റ് സ്ഥാനം വീണ്ടും ഏറ്റെടുത്തില്ലെങ്കില്‍ ബോര്‍ഡിന്റെ അധ്യക്ഷ പദവിയില്‍ രാഹുല്‍ എത്തിയേക്കുമെന്നാണ് സൂചനകള്‍. 

തെരഞ്ഞെടുപ്പിന് ഏതാനും മാസങ്ങള്‍ മുന്‍പ് ഒരുക്കം തുടങ്ങുന്നതിനു പകരം വര്‍ഷം മുഴുവന്‍ തിരഞ്ഞെടുപ്പിനു സജ്ജമായ പാര്‍ട്ടിയായി കോണ്‍ഗ്രസ് മാറണമെന്നും കോണ്‍ഗ്രസ് തീരുമാനമെടുത്തി്ട്ടുണ്ട്.