ഗ്യാന്‍വാപി കേസ് പരിഗണിക്കുന്നത് സുപ്രീംകോടതി നാളത്തേക്ക് മാറ്റി... കേസില്‍ കീഴ്ക്കോടതി തുടര്‍ നടപടികള്‍ നടത്തരുതെന്നും തല്‍ക്കാലത്തേക്ക് നിര്‍ദ്ദേശിച്ച് കോടതി.

കേസില്‍ ഹാജരാകേണ്ടിയിരുന്ന പ്രധാന അഭിഭാഷകന് ശാരീരികമായി സുഖമില്ലെന്നും കോടതിയില്‍ ഹാജരാകാനാകില്ലെന്ന് അറിയിച്ചതിനാലാണ് കേസ് പരിഗണിക്കുന്നത് നാളത്തേയ്ക്ക് മാറ്റിയത്. അതിനിടെ മസ്ജിദിലെ സര്‍വ്വെയുടെ റിപ്പോര്‍ട്ട് കോടതിക്ക് കൈമാറി.സ്പെഷല്‍ അഡ്വക്കേറ്റ് കമ്മീഷണര്‍ വിശാല്‍ സിംഗ് ആണ് സര്‍വ്വെ റിപ്പോര്‍ട്ട് കോടതിയില്‍ സമര്‍പ്പിച്ചത്.

സീല്‍ ചെയ്ത മൂന്ന് കവറുകളിലാണ് വിശദമായ റിപ്പോര്‍ട്ട് സഹിതം കൈമാറിയതെന്ന് അദ്ദേഹം പറഞ്ഞു. ഡാറ്റാ കാര്‍ഡുകളും ഫോട്ടോകളും വീഡിയോകളും അടക്കമാണ് റിപ്പോര്‍ട്ട് കൈമാറിയത്. ജസ്റ്റിസ് ഡി.വൈ.ചന്ദ്രചൂഡ്, പി.എസ്.നരസിംഹ എന്നിവരടങ്ങുന്ന ഡിവിഷന്‍ ബഞ്ചാണ് കേസ് പരിഗണിക്കുന്നത്.

നാളെ ഉച്ചകഴിഞ്ഞ് മൂന്ന് മണിക്ക് ഗ്യാന്‍വാപി സര്‍വ്വേ നടപടി നിര്‍ത്തിവയ്ക്കണമെന്ന ആവശ്യത്തിന്മേലുള്ള ഹര്‍ജിയടക്കം പരിഗണിക്കുമെന്ന് സുപ്രീംകോടതി.



കേസ് നേരത്തെ പരിഗണിച്ചിരുന്ന വാരണസി കോടതി വിഷയത്തില്‍ ഇന്നും നാളേയും മറ്റ് ഒരു തീരുമാനവും എടുക്കരുതെന്നാണ് കോടതി നിര്‍ദ്ദേശിച്ചിരിക്കുന്നത്. കാശിവിശ്വനാഥ ക്ഷേത്രം തകര്‍ത്ത് പണിതെന്ന് ഹൈന്ദവ വിശ്വാസികള്‍ ആരോപിക്കുന്ന ക്ഷേത്രത്തിന്റെ ഭാഗങ്ങള്‍ കണ്ടെത്താനുള്ള സര്‍വ്വേ നടത്തണമെന്ന ഭക്തരുടെ ഹര്‍ജി പ്രാദേശിക കോടതി അനുവദിച്ചതിനെ തുടര്‍ന്നാണ് കോടതി നിയമിച്ച കമ്മീഷന്‍ വീഡിയോ സര്‍വ്വേ നടത്തി ആദ്യ ഭാഗം കോടതിയില്‍ സമര്‍പ്പിച്ചത്.

ആരോപണ പ്രത്യാരോപണം നടക്കുന്നതിനാല്‍ ക്ഷേത്രങ്ങള്‍ക്കും പള്ളിയ്ക്കും അതിസുരക്ഷയാണ് നല്‍കിയിട്ടുള്ളത്. ജില്ലാ മജിസ്ട്രേറ്റിനാണ് നേരിട്ട് സുരക്ഷാ ചുമതലയുള്ളത്.