ഗഗന്യാന് ദൗത്യങ്ങളിലേക്ക് കടക്കും മുമ്പുള്ള നിര്ണായക പരീക്ഷണം നടത്താന് തയ്യാറായി ഐഎസ്ആര്ഒ
ഗഗന്യാന് ദൗത്യങ്ങളിലേക്ക് കടക്കും മുമ്പുള്ള നിര്ണായക പരീക്ഷണം നടത്താന് തയ്യാറായി ഐഎസ്ആര്ഒ. ഭാവി ബഹിരാകാശ യാത്രികരുടെ രക്ഷാ സംവിധാനത്തിന്റെ പരീക്ഷണം ഇന്ന് രാവിലെ നടക്കും.
ആദ്യ യാത്രികരുമായി ഹ്യൂമന് റേറ്റഡ് ലോഞ്ച് വെഹിക്കിള് കുതിക്കും മുമ്പ് ഒരുപാട് കാര്യങ്ങള് ചെയ്ത് തീര്ക്കാനുണ്ട്. അതിലൊന്നാണ് ക്രൂ എസ്കേപ് സിസ്റ്റം പരീക്ഷണം. ബഹിരാകാശ യാത്ര വലിയ റിസ്ക്കുള്ള പരിപാടിയാണ്. റോക്കറ്റിന്റെ മുകളിലാണ് യാത്ര. അതിവേഗമാണ് സഞ്ചാരം. കുതിച്ചുയര്ന്ന ശേഷം റോക്കറ്റിന് വല്ലതും സംഭവിച്ചാല് യാത്രക്കാര് എന്ത് ചെയ്യും ആ ചോദ്യത്തിനുള്ള ഉത്തരമാണ് ക്രൂ എസ്കേപ്പ് സിസ്റ്റം.
വിക്ഷേപണത്തറയില് വച്ചോ പറന്നുയര്ന്ന് ബഹിരാകാശത്തേക്ക് എത്തുന്നതിന് മുമ്പോ എന്തെങ്കിലും പ്രശ്നം സംഭവിച്ചാല് യാത്രക്കാരെയും യാത്രാ പേടകത്തെയും റോക്കറ്റില് നിന്ന് വേര്പ്പെടുത്തി സുരക്ഷിതമായ അകലത്തേക്ക് മാറ്റുന്ന സംവിധാനമാണിത്. മനുഷ്യനെ ബഹിരാകാശത്തേക്ക് അയക്കാനായി തയ്യാറാക്കുന്ന ഹ്യൂമന് റേറ്റഡ് ലോഞ്ച് വെഹിക്കിള് അല്ല ഈ പരീക്ഷണത്തിനായി ഉപയോഗിക്കുന്നത്, മറ്റൊരു പരീക്ഷണ വാഹനമാണ്. അതാണ് ടെസ്റ്റ് വെഹിക്കിള്.
ജിഎസ്എല്വി റോക്കറ്റിന്റെ എല് 40 ബൂസ്റ്ററിനെ അടിസ്ഥാനമാക്കി നിര്മ്മിച്ച ഒരു കുഞ്ഞന് റോക്കറ്റ്, വികാസ് എഞ്ചിന്റെ കരുത്തില് കുതിക്കുന്ന ഈ റോക്കറ്റിന് മുകളിലാണ് ഗഗന്യാന് യാത്രാ പേടകവും അതിന്റെ രക്ഷാസംവിധാനവും സ്ഥാപിച്ചിട്ടുള്ളത്.
യഥാര്ത്ഥ വിക്ഷേപണ വാഹനമുപയോഗിക്കുന്നതിന്റെ ഭീമമായ ചിലവ് കുറയ്ക്കാനാണ് ഈ സൂത്രപ്പണി. ഇനി ഇസ്രൊ എന്താണ് ചെയ്യാന് പോകുന്നതെന്ന് നോക്കാം. ശ്രീഹരിക്കോട്ടയിലെ ഒന്നാം നമ്പര് ലോഞ്ച് പാഡില് നിന്ന് ടെസ്റ്റ് വെഹിക്കിള് കുതിച്ചുയര്ന്ന് അറുപത്തിയൊന്നാം സെക്കന്ഡില് ക്രൂമൊഡ്യൂളിലെ ഹൈ ആള്ട്ടിട്യൂഡ് എസ്കേപ്പ് മോട്ടോറുകള് പണി ആരംഭിക്കും, സമുദ്രനിരപ്പില് നിന്ന് 11.7 കിലോമീറ്റര് ഉയരത്തില് വച്ച് ക്രൂ മൊഡ്യൂളും എസ്കേപ്പ് സിസ്റ്റവും അടങ്ങുന്ന തല ഭാഗം റോക്കറ്റില് നിന്ന് വേര്പ്പെടും. റോക്കറ്റ് കടലിലേക്ക് യാത്രാ പേടകം മുകളിലേക്ക്.
അല്പ്പ ദൂരം ഇങ്ങനെ സഞ്ചരിച്ച ശേഷം സമുദ്രനിരപ്പില് നിന്ന് പതിനേഴ് കിലോമീറ്റര് ഉയരത്തില് വച്ച് ക്രൂ മൊഡ്യൂളും എസ്കേപ്പ് സിസ്റ്റവും തമ്മില് വേര്പ്പെടും. ക്രൂ മൊഡ്യൂളിന്റെ ദിശ ശരിയാക്കി കടലിലേക്കുള്ള ഇറക്കം.ആദ്യ ഘട്ട പാരച്യൂട്ടുകള് വേഗത കുറയ്ക്കും.
സമുദ്ര നിരപ്പില് നിന്ന് രണ്ടര കിലോമീറ്റര് ഉയരത്തിലെത്തും വരെ ഈ പാരച്യൂട്ടുകളാണ് ക്രൂ മൊഡ്യൂളിന്റെ കൂട്ട്. 2.4 കിലോമീറ്റര് ഉയരത്തിലെത്തിയാല് ആദ്യ ഘട്ട പാരച്യൂട്ടുകള് വിട്ട് മാറും. രണ്ടാം ഘട്ട പാരച്യൂട്ടുകള് വിടരുകയും .സെക്കന്ഡില് എട്ടര മീറ്റര് വേഗത്തില് ക്രൂ മൊഡ്യൂള് കടലിലേക്ക്. ശ്രീഹരിക്കോട്ടയുടെ കടല് തീരത്ത് നിന്ന് ഏകദേശം പത്ത് കീലോമീറ്റര് അകെലയാണ് പേടകം ചെന്ന് വീഴുക.
ഇന്ത്യന് നാവിക സേനയുടെ പ്രത്യേക സംഘം കടലില് നിന്ന് പേടകത്തെ വീണ്ടെടുക്കും. ഇത്രയുമാണ് ഇസ്രൊ 21ന് നടത്താന് പോകുന്നത്. ഈ ദൗത്യം വിജയകരമായി പൂര്ത്തിയാക്കിയാല് ഇസ്രൊ പദ്ധതിയിലെ അടുത്ത ഘട്ടത്തിലേക്ക് കടക്കും.
"
https://www.facebook.com/Malayalivartha
