ജമ്മുവിലെ രജൗറിയില്‍ ഭീകരരമുമായി ഏറ്റുമുട്ടല്‍.... നാല് സൈനികര്‍ക്ക് വീരമൃത്യു, ഒരു മേജര്‍ അടക്കം 2 പേര്‍ക്ക് ഗുരുതര പരുക്ക്. പരുക്കേറ്റവരെ ഉധംപുരിലെ സൈനിക ആശുപത്രിയില്‍ പ്രവേശിപ്പിച്ചു. 9 പാരാ സ്‌പെഷ്യല്‍ ഫോഴ്‌സിലെ ക്യാപ്റ്റന്‍ എം.വി.പ്രഞ്ജാല്‍, ക്യാപ്റ്റന്‍ ശുഭം എന്നിവരും ഒരു ജൂനിയര്‍ കമ്മിഷന്‍ഡ് ഓഫിസറും ഒരു സൈനികനും ആണ് വീരമൃത്യു വരിച്ചത്.


ധര്‍മശാലിലെ ബാജി മാല്‍ കാട്ടില്‍ ഒളിച്ച 2 ഭീകരരെ പിടികൂടാനുള്ള ശ്രമത്തിനിടയിലാണ് സൈനികര്‍ക്ക് ജീവന്‍ നഷ്ടപ്പെട്ടത്. സൈനിക നടപടി തുടരുന്നു. ഭീകരസംഘം വിദേശികളാണെന്നാണ് സൂചന. അവര്‍ക്കും പരുക്കേറ്റിട്ടുണ്ട്. ഭീകരരെ കണ്ടതായി സൂചന ലഭിച്ചതിനെ തുടര്‍ന്നാണ് സൈന്യവും പൊലീസും കാട്ടില്‍ തിരച്ചില്‍ ആരംഭിച്ചത്.

സേനാസംഘത്തിനു നേരെ ഭീകരര്‍ വെടിയുതിര്‍ത്തതോടെ ഇന്നലെ രാവിലെ ഏറ്റുമുട്ടല്‍ തുടങ്ങി. പൂഞ്ചിലും രജൗറിയിലും ഏപ്രില്‍ 20, മേയ് 5 തീയതികളില്‍ നടന്ന ഏറ്റുമുട്ടലുകളില്‍ 10 സൈനികര്‍ വീരമൃത്യു വരിച്ചിരുന്നു. ജമ്മു മേഖലയില്‍ ഈ വര്‍ഷം മാത്രം 25 ഭീകരരെ വധിച്ചു. 15 സൈനികര്‍ക്കാണ് ഈ കാലയളവില്‍ ജീവഹാനിയുണ്ടായത്.