മനുഷ്യമനസ്സുകളെ കീഴടക്കുന്ന ഈ പുഞ്ചിരിക്കുന്ന കണ്‍മണിയുടെ പേര് ലൂക്കസ് മൂര്‍. ഈ കുഞ്ഞിന് അത്ഭുത ശിശു എന്നു വിളിച്ചാല്‍ അതിലൊട്ടും തന്നെ അതിശയോക്തിയുണ്ടാവില്ല. കാരണം ഇരുപത്തിമൂന്നാം ആഴ്ചയിലാണ് അമ്മയുടെ ഗര്‍ഭപാത്രത്തില്‍ നിന്ന് വെറും 500 ഗ്രാം ഭാരത്തോടെ ഈ കണ്‍മണി ഭൂമിയിലേയ്ക്ക് പിറന്നു വീണത്.

ഗര്‍ഭാവസ്ഥ ഇരുപത്തിരണ്ടാം ആഴ്ചയിലെത്തിയപ്പോഴാണ് ലൂക്കസിന്റെ മാതാവ് സൂസന് ഗുരുതരമായ പ്രശ്‌നങ്ങള്‍ നേരിട്ടത്. വെന്‍ട്രി യൂണിവേഴ്‌സിറ്റി ആശുപത്രിയില്‍ ചികിത്സ നടത്തിയിരുന്ന സൂസനോട് ഈ കുഞ്ഞിനെ അബോര്‍ട്ട് ചെയ്യാന്‍ ഡോക്ടര്‍മാര്‍ ആവശ്യപ്പെട്ടു. പ്രസവിക്കാനാണ് തീരുമാനമെങ്കില്‍ കുഞ്ഞിന് കാര്യമായ ആരോഗ്യപ്രശ്‌നങ്ങള്‍ ഉണ്ടാകുമെന്ന മുന്നറിയിപ്പും നല്‍കി.

എന്നാല്‍ സൂസനും ഭര്‍ത്താവ് ടോമും കുഞ്ഞിനെ നശിപ്പിക്കാന്‍ ഒരുക്കമായിരുന്നില്ല. ഇരുപത്തിമൂന്നാം ആഴ്ചയില്‍ ലൂക്കസിന് സൂസന്‍ ജന്മം നല്‍കി. കുഞ്ഞിന് 500 ഗ്രാമില്‍ താഴെയേ ഭാരമുള്ളുവെങ്കില്‍ വൈദ്യസഹായം നല്‍കില്ലെന്ന് ആശുപത്രി അധികൃതര്‍ അറിയിച്ചിരുന്നു. എന്നാല്‍ ഭാഗ്യം ഈ മാതാവിനോടൊപ്പമായിരുന്നു. കുഞ്ഞ് ലൂക്കസിന് 500 ഗ്രാമും ഒരു ഔണ്‍സും ശരീരഭാരമുണ്ടായിരുന്നു. പക്ഷെ ശ്വാസകോശത്തിന് വികാസമില്ലാതിരുന്ന കുഞ്ഞിന് പിറന്ന് ആറുമിനിട്ടോളം ശ്വാസമെടുക്കാന്‍ കഴിഞ്ഞില്ല. ഉടന്‍തന്നെ തീവ്രപരിചരണ വിഭാഗങ്ങളില്‍ പ്രവേശിപ്പിച്ച ലൂക്കസിന്റെ ഹൃദയത്തില്‍ ഒരു ദ്വാരവും പ്രത്യക്ഷപ്പെട്ടിരുന്നു. നാല് മാസത്തോളം ആശുപത്രിയില്‍ കഴിഞ്ഞ ലൂക്കസിന് ഇതിനിടയില്‍ തലച്ചോറിന്റെ ഇരുവശത്തു നിന്നും അമിതമായ രക്തസ്രാവമുണ്ടായി. ഈ രീതിയില്‍ കുഞ്ഞ് രക്ഷപ്പെട്ടാലും അവന് കേള്‍വിക്കോ കാഴ്ചക്കോ തകരാറുണ്ടാകുമെന്നും അതിനാല്‍ ജീവന്‍ രക്ഷായന്ത്രങ്ങളുടെ പ്രവര്‍ത്തനം നിര്‍ത്തുന്നതാണു നല്ലതെന്നും ഡോക്ടര്‍മാര്‍ അഭിപ്രായപ്പെട്ടു. എന്നാല്‍ അതിനും ലൂക്കസിന്റെ മാതാപിതാക്കള്‍ വഴങ്ങിയില്ല. മാസങ്ങള്‍ക്കുശേഷം ആശുപത്രി വിട്ട ലൂക്കസ് ഗുരുതരമായ ആരോഗ്യപ്രശ്‌നങ്ങളൊന്നും തന്നെയില്ലാതെ സുഖമായി ജീവിക്കുന്നു. കുഞ്ഞിന്റെ ഈ പാല്‍ പുഞ്ചിരിക്ക് പ്രായം ഒന്ന്. വിധിയുടെ കളിപ്പാട്ടമായി മാറിയിരുന്ന ലൂക്കസ് മൂറിനെ അത്ഭുതശിശു എന്നു തന്നെ വിശേഷിപ്പിക്കേണ്ടേ?

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha