കാശ്മീര്‍ പ്രളയം കരുണ കാണിച്ചത് ആറു വയസ്സുകാരി മേഘ്‌നയോട് മാത്രം. ഒരു വര്‍ഷം മുമ്പ് മഹാരാഷ്ട്രയില്‍ നിന്നും ഭീക്ഷാടനമാഫിയ തട്ടിയെടുത്ത മേഘ്‌നയെ കശ്മീരില്‍ ഭിക്ഷാടനത്തിനായി ഉപയോഗിച്ചു വരവെയായിരുന്നു കാശ്മീരിനെ വിഴുങ്ങിയ പ്രളയമുണ്ടായത്. നസീര്‍ അഹമ്മദ് എന്നയാളാണ് തന്നെ ശ്രീനഗറിലേക്ക് കടത്തിക്കൊണ്ടുവന്നതെന്ന് ആറു വയസ്സുകാരി മേഘ്‌ന ഓര്‍ക്കുന്നു. നസീര്‍ യുപി, കൊല്‍ക്കത്ത, കാശ്മീര്‍, ശ്രീനഗര്‍, സോപോര്‍ തുടങ്ങി അനേകം സ്ഥലങ്ങളില്‍ കൊണ്ടുപോയി ഭിക്ഷാടനം നടത്തി. തന്നെ ദിവസവും ഇയാള്‍ തല്ലുമായിരുന്നെന്നും മേഘ്‌ന പറഞ്ഞു.
പ്രളയമാണ് കുട്ടിയെ നസീറില്‍ നിന്നും വേര്‍പെടുത്തിയത്. ഇയാളില്‍ നിന്നും വേര്‍പെട്ട് കുട്ടിയെത്തിയത് ദാല്‍ഗേറ്റ് ഏരിയയിലെ ദര്‍സ്ഗായില്‍. മേഘ്‌നയെപ്പോലെ ഒറ്റപ്പെട്ടുപോയ ഒരാളായിരുന്നു കുട്ടിയെ ഇവിടെയെത്തിച്ചത്. അവിടെ നിന്നും കുട്ടിയെ ഏറ്റെടുത്ത ആഷിക് ഇലാഹി എന്നയാളാണ് വിവരം പുറത്ത് കൊണ്ടുവന്നത്. സമീപത്തെ ഒരു വീട്ടില്‍ ഇവര്‍ കുട്ടിയെ ഏല്‍പ്പിച്ച ശേഷം വിവരം പോലീസിന് കൈമാറുകയും ഫേസ്ബുക്കില്‍ അപ്‌ലോഡ് ചെയ്യുകയും ചെയ്തു.
പോലീസ് നടത്തിയ അന്വേഷണത്തില്‍ ഒരു വര്‍ഷം മുമ്പ് കുട്ടിയെ കാണ്മാനില്ലെന്ന് ലഭിച്ച പരാതിയില്‍ പറഞ്ഞിരുന്ന കുട്ടിയുമായുള്ള സാദൃശ്യം കണ്ടെത്തുകയായിരുന്നു. പോലീസ് നല്‍കിയ വിവരം അനുസരിച്ച് മേഘയുടെ മുത്തച്ഛന്‍ രാമേഷ് മദന്‍ പിന്നീട് ശ്രീനഗറില്‍ എത്തി കുട്ടിയെ തിരികെ വീട്ടിലേക്ക് കൂട്ടിക്കൊണ്ടു പോകുകയായിരുന്നു.