മലയാളികള്‍ക്ക് ഓണത്തോടൊപ്പെ ഗൃഹാതുരത്വം ഉണര്‍ത്തുന്ന ഒന്നാണ് ഓണ തുമ്പികള്‍. ഓണത്തുമ്പിയെന്നും ആഫ്രിക്കന്‍ തുമ്പിയെന്നും വിളിക്കുന്ന ഈ സ്വര്‍ണ ചിറകുള്ള തുമ്പിയുടെ യാത്ര കേട്ടാല്‍ ആരും അമ്പരന്നു പോകും. കേരളത്തില്‍ നിന്നും ഓണ നാളുകള്‍ കഴിഞ്ഞാല്‍ ഈ തുമ്പികളുടെ യാത്ര നേരെ ആഫ്രിക്കയിലേക്കാണ്. കടലിലൂടെ 14,000 മുതല്‍ 18,000 വരെ കിലോമീറ്റര്‍ നീളുന്നതാണു ഗ്ലോബല്‍ വാണ്ടറര്‍ എന്നറിയപ്പെടുന്ന ഈ തുമ്പികളുടെ സഞ്ചാരപഥം.

കുഞ്ഞുചിറകുകളുമായി ഇവയ്ക്കു ഇത്രദൂരം താണ്ടാനുള്ള ശേഷിയില്ലാത്തതിനാല്‍ കാറ്റിന്റെ സഹായത്തോടെയാണു യാത്ര. എറണാകുളം ജില്ലയിലെ ഞാറയ്ക്കല്‍, ചെറായി തീരദേശത്തു നിന്നാണു ഓണത്തുമ്പികള്‍ യാത്ര ആരംഭിച്ചിരിക്കുന്നത്. 
ലക്ഷക്കണക്കിനു ഓണ തുമ്പികളാണു കേരളതീരത്തു നിന്ന് ആഫ്രിക്കന്‍ കരയിലേക്കുള്ള ദേശാന്തരയാത്ര ആരംഭിച്ചത്. ചെറായി മുതല്‍ ഞാറയ്ക്കല്‍ വരെയുള്ള 12 കിലോമീറ്റര്‍ തീരപ്രദേശത്തു കഴിഞ്ഞ ഒരാഴ്ചയായി ലക്ഷക്കണക്കിനു തുമ്പികളെയാണു കാണുന്നത്. ബീച്ചിലെ കാറ്റാടിമരങ്ങളുടെ തുഞ്ചത്താണു വിശ്രമം. സൂര്യാസ്തമയത്തിനു ശേഷം ഓരോ സംഘങ്ങളായി യാത്ര തുടങ്ങും. 
പശ്ചിമഘട്ട പ്രദേശങ്ങളിലെ ശുദ്ധജല സ്രോതസ്സുകളിലാണു തുമ്പികള്‍ ജനിക്കുന്നത്. ചെറിയ ഇനത്തില്‍പ്പെട്ട ജീവജാലങ്ങളുടെ ഏറ്റവും വലുതും സംഘം ചേര്‍ന്നുമുള്ള ദേശാന്തര യാത്രയാണ് ഓണത്തുമ്പികളുടേത്.
എറണാകുളത്തിനു പുറമേ തിരുവനന്തപുരം ജില്ലയിലെ തീരപ്രദേശങ്ങളില്‍ നിന്നും ഓണത്തുമ്പികള്‍ ആഫ്രിക്കന്‍ യാത്ര നടത്തുന്നതായി കണ്ടെത്തിയിട്ടുണ്ട്. യാത്രയ്ക്കിടയില്‍ മാലദ്വീപില്‍ മാത്രമാണ് ഇവ കുറച്ചുസമയം വിശ്രമിക്കുക. 
ജൂണില്‍ തെക്കുപടിഞ്ഞാറന്‍ കാലവര്‍ഷത്തിനൊപ്പം തുമ്പികള്‍ മടങ്ങിയെത്തും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha