ദുരിതാശ്വാസ ഫണ്ടിലേക്കെത്തി, ലക്ഷങ്ങളുടെ വിലയുള്ള ഒരു 490 രൂപ!
ചരിത്രത്തിലെ വലിയ പ്രതിസന്ധിയിലൂടെ കേരളം കടന്നുപോകുമ്പോള് ഉള്ളവനും ഇല്ലാത്തവനും അണ്ണാറക്കണ്ണനും തന്നാലായത് എന്ന രീതിയില് സഹായഹസ്തം നീട്ടുന്ന കാഴ്ചയാണ് എങ്ങും. ജാതിയോ മതമോ രാഷ്ട്രീയമോ ഭാഷയോ നോക്കാതെ സഹായപ്രവാഹം പുരോഗമിക്കുമ്പോഴാണ് ഒരു വിദ്യാര്ഥിയുടെ ഫെയ്സ്ബുക്ക് പോസ്റ്റ് ചര്ച്ചയാവുന്നത്.
പ്രളയബാധിത പ്രദേശത്ത് എത്തിയ മധ്യപ്രദേശുകാരനായ വിഷ്ണുവിനെ പറ്റി അറിഞ്ഞതാണ്, മുഖ്യമന്ത്രിയുടെ ദുരിതാശ്വാസ ഫണ്ടിലേക്ക് സഹായം നല്കാന് ബായ് ഇന്ദിരാ കൃഷ്ണന് എന്ന സാധാരണ വിദ്യാര്ഥിക്ക് പ്രേരണ ആയത്.
മധ്യപ്രദേശുകാരന് വിഷ്ണു, കമ്പിളിപ്പുതപ്പുകള് വില്ക്കുന്ന കച്ചവടക്കാരനാണ്. എന്നാല് കേരളത്തിലെ മഴക്കെടുതിയും ദുരിതാശ്വാസകേന്ദ്രത്തില് കഴിയുന്നവരുടെ പ്രയാസവും അറിഞ്ഞപ്പോള് താന് വില്ക്കാന് കൊണ്ട് വന്ന മുഴുവന് കമ്പിളിപ്പുതപ്പുകളും വിലവാങ്ങാതെ ദുരിതബാധിതര്ക്ക് നല്കാന് തീരുമാനിക്കുക ആയിരുന്നു. ആ മനസിന്റെ നന്മയെ മുഖ്യമന്ത്രി വരെ പ്രശംസിച്ചതാണ്. ആ വിഷ്ണു ഇന്ന് കേരളത്തിന് ഒരു പ്രചോദനം കൂടി ആയിരിക്കുകയാണ്.
ഏറെ സാമ്പത്തിക ബുദ്ധിമുട്ടുകള്ക്കിടയില് പോണ്ടിച്ചേരിയില് പഠിക്കുന്ന ഈ മലയാളി വിദ്യാര്ഥി ഓണത്തിന് നാട്ടിലേക്ക് വരാന് കരുതി വച്ച 490 രൂപ മുഖ്യമന്ത്രിയുടെ ദുരിതാശ്വാസ ഫണ്ടിലേക്ക് നല്കി. അക്കൗണ്ടില് ആകെ അവശേഷിച്ച തുകയാണ് ഈ വിദ്യാര്ഥി നല്കിയത്. അതിന് പ്രചോദനമായത് വിഷ്ണു നല്കിയ ആ കമ്പളിപ്പുതപ്പുകളായിരുന്നു.
ഫെയ്സ്ബുക്ക് പോസ്റ്റിന്റെ പൂര്ണരൂപം:
കടുത്ത സാമ്പത്തിക പരിമിതികളില്പ്പെട്ടിരിക്കുമ്പോഴാണ് പോണ്ടിച്ചേരി സെന്റ്രല് യൂണിവേഴ്സിറ്റിയില് അഡ്മിഷന് ലഭിക്കുന്നത്. യൂണിവേഴ്സിറ്റി ഹോസ്റ്റല് പോലും കണ്ടെത്താന് കഴിയാതിരുന്നപ്പോളാണ് ജോസഫേട്ടനും (Joseph Pv) , ശ്രീകുമാര് ചേട്ടനും ( Sreekumar B Mundakathil), പ്രവീണ് ചേട്ടനും ഒക്കെ ഓടിയെത്തുന്നത്. അവരുടെസ്നേഹം കൊണ്ടുമാത്രമാണ് പോണ്ടിക്കുള്ള വണ്ടിക്കൂലിപോലും കൈയില് വന്നത്. ഹോസ്റ്റല് ഫീയും സെമസ്റ്റര് ഫീയുമൊക്കെ അവര് തന്ന പൈസ കൊണ്ട് അടച്ചു തീര്ത്തു. ബാക്കിയുണ്ടായിരുന്ന പൈസ ഓണത്തിന് വീട്ടിലേക്ക് പോകാന് മാറ്റി വച്ചതാണ്. ട്രെയിന് ബുക്ക് ചെയ്യാന് സേവിംഗ്സ് അക്കൗണ്ടിലെ തുക തികയാത്തതിനാല് യാത്ര ജനറല് കമ്പാര്ട്ട്മെന്റില് മതിയെന്ന് തീരുമാനമെടുത്തിരിക്കുമ്പോഴാണ് കേരളത്തില് നിന്നും മഴക്കെടുതി വാര്ത്തകള് എത്തുന്നത്.
ജീവിതം കൈയില് പിടിച്ച് കുടുംബത്തോടൊപ്പം ഒരു വലിയ വിഭാഗം ദുരിതാശ്വാസ ക്യാമ്പുകളിലേക്ക് പലായനം ചെയ്യുന്നത് നിസഹായനായി നോക്കി നില്ക്കുവാനെ കഴിയുമായിരുന്നുള്ളൂ. അപ്പോഴാണ് മധ്യപ്രദേശുകാരന് വിഷ്ണുവിന്റെ കഥ അറിയുന്നത്. വില്ക്കാനായി കൊണ്ടുവന്ന മുഴുവന് ബ്ലാങ്കറ്റുകളും ദുരിതാശ്വാസ നിധിയിലേക്ക് സംഭാവന ചെയ്തവന്. ദുരിതമനുഭവിക്കുന്നവര്ക്കൊപ്പം നില്ക്കേണ്ടത് എന്റെകൂടി കടമയാണ്. അതുകൊണ്ടുതന്നെ അക്കൗണ്ടില് ബാക്കിയുണ്ടായിരുന്ന 490 രൂപയും CMO Kerala യുടെ അക്കൗണ്ടിലേക്ക് ട്രാന്സ്ഫര് ചെയ്തു.
https://www.facebook.com/Malayalivartha