പാക്കിസ്ഥാനില്‍നിന്ന് 23 വര്‍ഷങ്ങള്‍ക്കുശേഷം അവളെത്തിയത് ആ മലയാളി ഡോക്ടറെത്തേടി!
ഹൃദയത്തില്‍ വൈരം നിറച്ച് ശത്രുക്കളായി രണ്ട് ഭൂപ്രദേശങ്ങളിലായി കഴിയുന്ന ജനവിഭാഗത്തിലൊന്നില്‍ നിന്നുകൊണ്ട് അവള്‍ തിരഞ്ഞത് ശത്രുപക്ഷത്തിലുള്ള ഒരാളെ ആയിരുന്നു. അതാകട്ടെ അവളുടെ ഹൃദയത്തിന്റെ ആരോഗ്യപ്രശ്‌നങ്ങള്‍ക്ക് സ്വാന്തനവും പരിഹാരവും നല്‍കുന്നതിന് ആ ഒരേയൊരാള്‍ക്കു മാത്രമേ കഴിയൂ എന്നുറച്ച് വിശ്വസിച്ചുകൊണ്ടായിരുന്നു.
കേരളത്തില്‍ നിന്നും മൂവായിരത്തി അഞ്ഞൂറോളം കിലോമീറ്ററുകള്‍ അകലെയുള്ള പാകിസ്താനി നഗരമായ കരോറിലിരുന്ന് ഒരു കുടുംബം കഴിഞ്ഞ ഏതാനും മാസങ്ങളായി അന്വേഷിച്ചത് മലയാളിയായ പീഡിയാട്രിക്ക് കാര്‍ഡിയോ തൊറാസിക് സര്‍ജന്‍ ഡോ. ജോണ്‍ വല്ല്യത്തിനെ ആയിരുന്നു. ഒടുവില്‍ അവര്‍ ബിലീവേഴ്‌സ് ചര്‍ച്ച് മെഡിക്കല്‍കോളജ് ആശുപത്രിയുടെ വെബ്‌സൈറ്റില്‍ അദ്ദേഹത്തെ കണ്ടെത്തി.
നമ്മില്‍ നിന്നും എന്നോ വിഭജിക്കപ്പെട്ടു പോയ ആ മണ്ണില്‍ നിന്നും ഇന്ത്യയുടെ ഇങ്ങേക്കോണിലുള്ള ചെറുപട്ടണത്തിലേക്ക് അവര്‍ എത്തി. അഫിയ എന്ന ഇരുപത്തിമൂന്നുകാരിയുടെ സങ്കീര്‍ണ്ണ ഹൃദയ ശസ്ത്രക്രിയക്കായി ശത്രുക്കളായി തുടരുന്ന രണ്ടു രാജ്യങ്ങള്‍ക്കിടയിലെ ദൂരമാണ് ആ കുടുംബം സഞ്ചരിച്ചത്.
ജന്മനാ ഹൃദയത്തകരാറുമായി പിറന്ന കുട്ടിയായിരുന്നു അഫിയ. ജനിച്ച് ഏതാനും ദിവസങ്ങള്‍ക്കുള്ളില്‍ തന്നെ കടുത്ത ശ്വാസംമുട്ടലും ശരീരത്തില്‍ നീലനിറവും കണ്ടതിനെത്തുടര്‍ന്ന് മസ്‌ക്കറ്റിലെ റോയല്‍ ആശുപത്രിയില്‍ പ്രവേശിപ്പിക്കപ്പെട്ടു. റോയല്‍ ആശുപത്രിയിലെ കാര്‍ഡിയോളജി വിഭാഗം മേധാവി അഫിയയുടെ ശസ്ത്രക്രിയ നടത്തുന്നതില്‍ സംശയം പ്രകടിപ്പിച്ചപ്പോള്‍ അഞ്ചുമാസം പ്രായമുള്ള അഫിയയുടെ ശസ്ത്രക്രിയ നടത്താന്‍ ആശുപത്രിയിലെ കാര്‍ഡിയോ തൊറാസിക് സര്‍ജനായിരുന്ന ഡോ. ജോണ്‍ വല്യത്ത് തീരുമാനിച്ചു. 1998 ല്‍ നടന്ന ആ ശസ്ത്രക്രിയയും അഫിയയുടെ 13-ാം വയസില്‍ നടന്ന രണ്ടാമത് ശസ്ത്രക്രിയയും വിജയംകണ്ടു. ശേഷം കുടുംബം പാക്കിസ്ഥാനിലേക്ക് മടങ്ങി. അഫിയ വളര്‍ന്നു.
ബഹാവുദ്ദീന്‍ സക്കറിയാസ് സര്‍വകലാശാലയില്‍ ഐ.ടി ബിരുദാനന്തര ബിരുദ വിദ്യാര്‍ഥിനിയായ അവള്‍ക്ക് അടുത്ത ശസ്ത്രക്രിയ നടത്താനായി പാക്കിസ്ഥാനിലെ വമ്പന്‍ ആശുപത്രികളെയും വിദഗ്ദ്ധ ഡോക്ടര്‍മാരെയും സന്ദര്‍ശിച്ചെങ്കിലും പാക്കിസ്ഥാന്‍ ആശുപത്രികളിലെ ഡോക്ടര്‍മാര്‍ ശസ്ത്രക്രിയയ്ക്ക് 40 ശതമാനം വിജയ സാധ്യതയേ കല്‍പ്പിച്ചുള്ളൂ.
അതോടെ, മുന്‍പ് ശസ്ത്രക്രിയ നടത്തിയ ഡോ. ജോണ്‍ വല്യത്തിന്റെ അര്‍പ്പണ മനോഭാവത്തിലും വൈദഗ്ധ്യത്തിലും വിശ്വാസമുണ്ടായിരുന്ന ആ കുടുംബം അന്നു മുതല്‍ അദ്ദേഹത്തെ തിരയാന്‍ ആരംഭിച്ചു. മാസങ്ങള്‍കൊണ്ടാണ് വല്ല്യത്തിനെ അവര്‍ കണ്ടുപിടിച്ചത്. ജൂലൈ ആദ്യവാരം ബിലീവേഴ്‌സ് ആശുപത്രിയിലെത്തിയ അഫിയ ആറുമണിക്കൂര്‍ നീണ്ട ശസ്ത്രക്രിയയ്ക്കു വിധേയയായി. ഡോ. ജോണ്‍ വല്ല്യത്തിനൊപ്പം ഡോ. കണ്ണന്‍ ആര്‍ നായര്‍, അനസ്‌തെറ്റിസ്റ്റുകളായ ഡോ.സജിത്ത്‌സുലൈമാന്‍, ഡോ.ബെന്‍സണ്‍ ഏബ്രഹാം, ഹാര്‍ട്ട്‌ലങ് മെഷീന്‍ ടെക്‌നീഷ്യന്മാരായ സലിം, അനന്തിത, അനസ്‌തേഷ്യ ടെക്ക്‌നീഷ്യന്മാരായ സെന്തില്‍, ബിബിന്‍ കൂടാതെ ആറു പേരടങ്ങുന്ന നഴ്‌സിങ് സംഘം. ശസ്ത്രക്രിയയില്‍ കൂടെയുണ്ടായിരുന്നു. ഐ.സി.യുവിലെ നാല് ദിവസങ്ങള്‍ക്ക് ശേഷം അഫിയയെ മുറിയിലേക്ക് മാറ്റി. തുടര്‍ന്ന് പരിചരണങ്ങള്‍ക്ക് ശേഷം ഈ മാസമാദ്യം അവര്‍ പാകിസ്താനിലേക്ക് മടങ്ങി.
https://www.facebook.com/Malayalivartha
