ഉരുള്പൊട്ടിവന്ന കാഴ്ചയുടെ ഭീതി മനസ്സില് നിന്നു മാറാതെ കുഞ്ഞുകുട്ടികള്
ചെറുതോണിയില് ഉരുള്പൊട്ടിയത് നേരിട്ട് കണ്ടതും അതില് അകപ്പെടാതിരിക്കാന് പ്രാണഭീതിയില് പാഞ്ഞതും ഇപ്പോഴും ജോയലിന്റേയും ജോസ്മിയുടേയും മനസ്സില് ഒരിക്കലും മാഞ്ഞുപോകാനാവാത്ത വിധം പതിഞ്ഞ് കിടപ്പുണ്ട്. വിറപൂണ്ട ഹൃദയത്തോടെ ആ രംഗങ്ങള് അവര് വീണ്ടും ഒന്ന് ഓര്ത്തെടുത്തു.
'ഞാന് മുറിക്കകത്ത് കട്ടിലില് പുതപ്പും പുതച്ച് കിടക്കുകയായിരുന്നു. അമ്മ വീടിന് പുറകുവശത്ത് പശുവിന്റെ അടുത്തായിരുന്നു. വലിയപാറക്കല്ല് ഉരുണ്ടുവരുന്ന ഒച്ച കേട്ടാണ് ഞാന് ചാടി എഴുന്നേറ്റത്. വീടിന്റെ വാതില് വഴി നോക്കിയപ്പോള് വലിയ മരങ്ങള് മുന്നിലൂടെ ഒഴുകി പോകുന്നത് കണ്ടു. അപ്പോള് അമ്മ നിലവിളിച്ചുകൊണ്ട് വീടിനകത്തേക്ക് ഓടിക്കയറി വന്നു. ഓടി രക്ഷപ്പെടാന് അമ്മ കരഞ്ഞുകൊണ്ട് പറയുന്നുണ്ടായിരുന്നു. ഇതിനിടയില് അനിയത്തിമാരുടെ കൂട്ടക്കരച്ചിലായി. അമ്മ, ജിയന്നയെ കൈക്ക് പിടിച്ച് പുറത്തേക്ക് ഓടി. ഞങ്ങളും പുറകെ ഓടുകയായിരുന്നു' ജോയല് പറഞ്ഞു നിര്ത്തി. ആ കണ്ണുകളില് അപ്പോഴും ഭയം നിഴലിട്ടിരുന്നു.
'വലിയ ഒച്ചകേട്ട് ഞാനും ജിയന്നയും ജനല് വഴി പുറത്തേക്ക് നോക്കി. അപ്പോള് ഒരു മല ഞങ്ങളുടെ മുന്നിലൂടെ ഒഴുകിപ്പോകുന്നത് കണ്ടു. വലിയ ഇടിമുഴക്ക ഒച്ചയായതിനാല് ഞങ്ങള് പേടിച്ച് വിറച്ചുപോയി. വീടിന് മുകളിലും മുറികളിലും മൊത്തം കറുത്തപൊടിയും ചെളിയും മൂടിയതിനാല് ഒന്നും കാണത്തില്ലായിരുന്നു. അമ്മയും ചേട്ടനും ഓടിവന്ന് ഞങ്ങളെ പിടിച്ചുകൊണ്ട് ഓടുകയായിരുന്നു. അത് ഓര്ക്കുമ്പോള് പേടിയാകുന്നു' ജോസ്മി പറഞ്ഞു.
കഞ്ഞിക്കുഴി ചുരുളി ആല്പ്പാറയില് ചൊവ്വാഴ്ച ഉണ്ടായ ഉരുള്പൊട്ടലില് മാലേപറമ്പില് ബിജുവിന്റെ ഭാര്യ ഷീന(32) മക്കളായ ജോയല് (13), ജിയന്ന(10), ജോസ്മി (12) എന്നിവരാണ് പൊട്ടിയൊഴുകിയ ഉരുളിനിടയിലൂടെ ഓടി രക്ഷപ്പെട്ടത്. രാവിലെ 7.30-നായിരുന്നു സംഭവം. മലമുകളില്നിന്ന് പാറക്കെട്ടുകള്ക്കിടയിലൂടെ ഭീകരശബ്ദത്തോടെ പൊട്ടിവന്ന ഉരുള് ബിജുവിന്റെ വീടിന്റെ മുറ്റം ചേര്ന്നുള്ള സ്ഥലം ഉള്പ്പെടെ ഒഴുക്കി താഴേക്ക് പതിച്ചു.
ഈ സമയം ബിജു അയല്വാസിയുമായി സംസാരിച്ച് നില്ക്കുകയായിരുന്നു. ഷീബയും കുഞ്ഞുങ്ങളും വീട്ടിലുണ്ടായിരുന്നു. ബിജു നോക്കുമ്പോള് പരിസരമാകെ പാറപ്പൊടി നിറഞ്ഞിരുന്നു. ഒന്നും കാണാന് കഴിഞ്ഞില്ല. അലറിവിളിച്ച് ബിജു വീട്ടിലേക്ക് കയറാന് ശ്രമിച്ചെങ്കിലും അയല്വാസി തടുത്തുനിര്ത്തി. ഭയന്ന് നിലവിളിച്ചുപോയെങ്കിലും ഷീന ഈ സമയം ഔചിത്യബോധത്തോടെ പ്രവര്ത്തിച്ചു. പാറപ്പൊടിക്കിടയിലൂടെ കുഞ്ഞുങ്ങളുമായി പുറത്തെത്തി. സീന ഒരു കുട്ടിയെ കൈക്ക് പിടിച്ചും മറ്റ് രണ്ട് കുട്ടികള് മുമ്പും പുറകുമായി നിലവിളിച്ചുകൊണ്ടും ചെളിയിലൂടെ ഓടി ബിജുവിന്റെ അരികിലെത്തി. വീടിന്റെ മുകളിലേക്ക് ഉരുള് പതിക്കാതിരുന്നതാണ് ഇവര്ക്ക് രക്ഷയായത്.
ഉരുള്പൊട്ടലില് പാറശ്ശേരിയില് ആന്റണിയുടെ ഒരേക്കര് സ്ഥലവും കൃഷിയും പൂര്ണമായും ഒലിച്ചുപോയി. താഴ്ഭാഗത്തായി റോഡരികില് സ്ഥിതിചെയ്തിരുന്ന ഗവ.ഹോമിയോ ഡിസ്പെന്സറിയില് വെള്ളം കയറി മൂടപ്പെട്ടു. കഞ്ഞിക്കുഴി പഞ്ചായത്ത് പ്രസിഡന്റ് ഷീബാ ജയന്റെ നേതൃത്വത്തില് ഉദ്യോഗസ്ഥസംഘം സ്ഥലത്ത് എത്തി. ബിജുവും കുടുംബവും ഉള്പ്പെടെ ഈ പ്രദേശത്ത് ഉണ്ടായിരുന്ന ഒമ്പത് കുടുംബങ്ങളെ മാറ്റി പാര്പ്പിക്കാനുള്ള നടപടികള് ഉദ്യോഗസ്ഥര് സ്വീകരിച്ചു.
https://www.facebook.com/Malayalivartha