ക്യാപ്റ്റന് രാജ്കുമാറിന്റെ പൂത്തുമ്പി ടെറസില് പറന്നിറങ്ങി!
മനമൊന്നായി കേരളം പ്രളയത്തെ നേരിടുമ്പോള് രക്ഷാപ്രവര്ത്തനം മന്ദീഭവിക്കാതിരിക്കാന് സാഹസത്തെ ഒപ്പംകൂട്ടി ക്യാപ്റ്റന് പി.രാജ്കുമാര്. നാവികസേനയുടെ സീകിങ് 42 സി എന്ന വമ്പന് ഹെലികോപ്റ്റര് ഒരു വീടിനു മുകളില് അതിസാഹസികമായി ഇറക്കി 26 പേരെ രക്ഷിച്ച നാവിക സേനയുടെ തകര്പ്പന് രക്ഷാപ്രവര്ത്തന വിഡിയോയിലെ വീരനായകനാണ് ക്യാപ്റ്റന് പി.രാജ്കുമാര്.സമൂഹമാധ്യമങ്ങളില് കഴിഞ്ഞ ദിവസം തരംഗം സൃഷ്ടിച്ചു ഇദ്ദേഹത്തിന്റെ ഈ രക്ഷാപ്രവര്ത്തനം.
ഓഖി ദുരന്തസമയത്ത് മോശം കാലാവസ്ഥ വകവയ്ക്കാതെ രക്ഷാപ്രവര്ത്തനം നടത്തിയതിന് രാജ്യം ശൗര്യ ചക്ര മെഡല് നല്കി ആദരിച്ച വ്യക്തിയാണ് ഈ മലയാളി. കലിതുളളിയ കാലവര്ഷത്തില് ഓണം നിറം മങ്ങി കേരളം വെള്ളപ്പൊക്കക്കെടുതിയിലാണ്ടപ്പോള് ഒരു 'പൂത്തുമ്പി' പോലെ അങ്ങിങ്ങായി ഹെലികോപ്റ്റര് പറത്തി രക്ഷാദൗത്യങ്ങളിലായിരുന്നു അദ്ദേഹം. കൊച്ചി ദക്ഷിണ നാവിക സേനാ ആസ്ഥാനത്തിലെ ഐഎന്എസ് ഗരുഡയിലെ ഉന്നത ഉദ്യോഗസ്ഥനായ രാജ്കുമാര് പാലക്കാട് സ്വദേശിയാണ്.
ഇന്ത്യന് നാവികസേനയുടെ ഏറ്റവും വലിയ ഹെലികോപ്റ്ററുകളില് ഒന്നാണ് സീകിങ് 42 സി. ഇത്ര വലിയ ഹെലികോപ്റ്റര് മരങ്ങള്ക്കും മറ്റു കെട്ടിടങ്ങള്ക്കും ഇടയിലൂടെ സുരക്ഷിതമായി ഒരു വീടിനു മുകളില് ഇറക്കുകയെന്നത് നിസാരമല്ല. തികഞ്ഞ വൈദഗ്ധ്യമുള്ളവര്ക്കു മാത്രമേ ഇത് സാധിക്കുകയുള്ളൂവെന്ന് ഈ രംഗത്തെ വിദഗ്ധര് പറയുന്നു. രക്ഷാപ്രവര്ത്തനത്തിന്റെ ഭാഗമായി ഹെലികോപ്റ്റര് ഉയരത്തില് സ്ഥായിയായി നിര്ത്തി ആളുകളെ പ്രത്യേക ലോഹ റോപ്പിലൂടെ തൂക്കിയെടുക്കുകയാണെങ്കില് (വിന്ചിങ്) സമയനഷ്ടവും ഇന്ധനനഷ്ടവും ഏറെ വലുതാണ്. ക്യാപ്റ്റന് രാജ്കുമാറിന്റെ ധൈര്യവും കൃത്യമായ ഇടപെടലിലും രക്ഷാപ്രവര്ത്തനം വേഗം നടത്താന് സഹായിച്ചു.
സീകിങ് കോപ്റ്ററിന്റെ ബ്ലെയ്ഡുകള് കറങ്ങുന്നത് മിനിറ്റില് 203 തവണയാണ്. വലിയ മെയിന് റോട്ടര് ബ്ലെയ്ഡുകള് (കോപ്റ്ററിനു മുകളിലെ ഫാന് ലീഫുകള്) ഉള്ള സീകിങ് ഹെലികോപ്റ്റര് പരിമിതസ്ഥലത്ത് താഴെ എയര്ക്രാഫ്റ്റ് ഹാന്ഡിലിങ്ങിന് പോലും ആളില്ലാതെ സുരക്ഷിതമായി ഇറക്കുകയെന്നത് ഏറെ ബുദ്ധിമുട്ടുള്ള കാര്യവുമാണ്.
സാഹസികത നിറഞ്ഞ പ്രവര്ത്തികള് എന്നും ധൈര്യപൂര്വം ഏറ്റെടുത്ത വ്യക്തിയാണ് രാജ്കുമാര്. ഓഖി ദുരന്തം ഉണ്ടായപ്പോള് കടലില് കുടുങ്ങിയ മല്സ്യത്തൊഴിലാളികളെ വളരെ വേഗം കണ്ടെത്താനും രക്ഷിക്കാനും അദ്ദേഹത്തിനു സാധിച്ചിരുന്നു. ഈ സമയത്തെ മികച്ച പ്രവര്ത്തനത്തിനാണ് യുദ്ധേതരഘട്ടത്തില് ആത്മത്യാഗത്തോടെയുള്ള അര്പ്പണത്തിനു രാജ്യം നല്കുന്ന സൈനിക ബഹുമതിയായ 'ശൗര്യചക്ര' ക്യാപ്റ്റനെ തേടിയെത്തിയത്. നിര്ണായക സമയങ്ങളില് സീകിങ്ങ് കൂടാതെ നാവികസേനയുടെ ചേതക് ഹെലികോപ്റ്ററുകള് പറത്താനും ക്യാപ്റ്റന് രാജ്കുമാര് വിദഗ്ധനാണ്. പ്രധാനപ്പെട്ട വിഐപികള് വരുമ്പോള് പലപ്പോഴും ഇദ്ദേഹത്തിനാണ് ചുമതല.
ഇന്ത്യന് നാവികസേനയുടെ കൈവശം രണ്ടു തരം സീകിങ് ഹെലികോപ്റ്ററുകളാണ് ഉള്ളത്. സീകിങ്ങ് 42 ബിയും സീകിങ് 42 സിയും. ഇതില് ബി ഉപയോഗിക്കുന്നത് അന്തര്വാഹിനികളും കപ്പലുകളും കണ്ടെത്താനും അതിനെ നശിപ്പിക്കാനുമാണ്.
സൈനികരെ വിവിധ സ്ഥലങ്ങളിലേക്ക് കൊണ്ടു പോകാനും ദുരിതാശ്വാസരംഗത്ത് എയര് ആംബുലന്സ് ആയും, വിഐപി എസ്കോര്ട്ട്, സെര്ച്ച് ആന്ഡ് റെസ്ക്യൂ തുടങ്ങിയ ആവശ്യങ്ങള്ക്കും 42 സി ഉപയോഗിക്കുന്നു.
https://www.facebook.com/Malayalivartha