'അപ്നാ ഘര്' തുണയായി, പ്രളയബാധിതരായ ഇതരസംസ്ഥാന തൊഴിലാളികള് ജീവിതത്തിലേയ്ക്ക് വലതുകാല് വച്ചു കയറി!
പ്രളയത്തില് എല്ലാം തകര്ന്ന എഴുന്നൂറോളം പേര് ഒന്നിച്ച് ആശ്വാസത്തിന്റെ വലതുകാല് വച്ചു കയറിയത് പുതുതായി പണി കഴിപ്പിച്ച 'അപ്നാ ഘറിലേക്കാണ്'. ഇങ്ങനെയൊരു ഗൃഹപ്രവേശം ഇതാദ്യമാകും. അതെ, നമ്മുടെ വീട് എന്നു തന്നെ പറയാം.
ഇതരസംസ്ഥാന തൊഴിലാളികള്ക്കായി തൊഴില് വകുപ്പ് കഞ്ചിക്കോട്ടു പണി കഴിപ്പിച്ച പുത്തന് ഫ്ലാറ്റ് സമുച്ചയമായ 'അപ്നാ ഘര്' ഉദ്ഘാടനം ചെയ്യും മുന്പേ ദുരിതാശ്വാസ ക്യാംപായി തുറന്നു കൊടുക്കുകയായിരുന്നു. നാലു നിലകളിലായി എട്ടരക്കോടി രൂപ ചെലവില് നിര്മിച്ച കെട്ടിടം ഓഗസ്റ്റ് 12-ന് മുഖ്യമന്ത്രി പിണറായി വിജയന് ഉദ്ഘാടനം ചെയ്യാനിരുന്നതാണ്.
പ്രളയത്തെത്തുടര്ന്ന് മുഖ്യമന്ത്രിയുടെ പാലക്കാട്ടെ പരിപാടികള് റദ്ദാക്കിയതിനാല് ഉദ്ഘാടനം മാറ്റി. രോഗികളും ഭിന്നശേഷിക്കാരും വയോജനങ്ങളുമെല്ലാം പാലക്കാട് നഗരത്തിലെ ദുരിതാശ്വാസ ക്യാംപുകളില് ബുദ്ധിമുട്ടുന്നതു കണ്ടതിനെ തുടര്ന്ന് ഉദ്ഘാടനം ചെയ്യാത്ത കെട്ടിടം തുറന്നു കൊടുക്കാന് മന്ത്രി എ.കെ.ബാലനാണ് നിര്ദേശിച്ചത്. സാധാരണ ക്യാംപല്ല ഇത്. ജീവിതത്തില് ആദ്യമായാണ് ഇത്ര സൗകര്യത്തോടെ ജീവിക്കുന്നതെന്ന് ഇവിടെ താമസിക്കുന്നവര് സാക്ഷ്യം പറയുന്നു.
45,000 ചതുരശ്ര അടി വിസ്തൃതിയുള്ള കെട്ടിടത്തില് 64 മുറിയുണ്ട്. 32 അടുക്കള, 96 ശുചിമുറി, എട്ട് ഊണുമുറി, കുളിക്കാനും വസ്ത്രം അലക്കാനും വിശാലമായ സൗകര്യം. തട്ടുകളായി കട്ടിലുകള് ക്രമീകരിച്ചിട്ടുള്ള ഓരോ മുറിയിലും പത്തു പേര്ക്കെങ്കിലും താമസിക്കാം. മഴക്കെടുതിയില് ചിതറി പലയിടത്തായി താമസിച്ചിരുന്ന കുടുംബങ്ങളെല്ലാം ഇപ്പോള് അപ്നാഘറിലെ ഒരു മുറിയിലാണു കഴിയുന്നത്. ഏറ്റവും മികച്ച ഭക്ഷണം നല്കാന് കുടുംബശ്രീ സജീവമായുണ്ട്.
'രാവിലെ നല്ല ചായ കിട്ടി, പിന്നെ ഉപ്പുമാവ്, പുഴുങ്ങിയ മുട്ട, സാമ്പാര്, ഉപ്പേരി', ക്യാംപിലെ രുചികളെക്കുറിച്ച് പലര്ക്കും പറഞ്ഞു മതിയാകുന്നില്ല. ഭക്ഷണത്തിനെല്ലാം കൃത്യമായ സമയവും മെനുവുമൊക്കെയുണ്ട്. പൊലീസ്, റവന്യു, ആരോഗ്യം തുടങ്ങിയ വകുപ്പുകളിലെ ഉദ്യോഗസ്ഥരെല്ലാം സദാ കൂടെയുണ്ട്.
സേവനം ചെയ്യാന് കോളജ് വിദ്യാര്ഥികളും സന്നദ്ധ സംഘടനകളുമുണ്ട്. കുടുംബം സുരക്ഷിതമായതിനാല് പലരും പുറത്തേക്കു കൂലിപ്പണിക്കും പോയിത്തുടങ്ങി. അപ്നാ ഘര് എന്ന വാക്കിന്റെ അര്ഥം ശരിവയ്ക്കുന്ന രീതിയില് തന്നെയാണ് അവിടെ നിന്ന് ലഭിക്കുന്ന സേവനവും പരിചരണവുമെന്ന് തിരിച്ചറിയുന്ന അവര് പറയുന്നു ഇത് 'നമ്മുടെ സ്വന്തം വീട്' എന്ന 'അപ്നാ ഘര്' തന്നെ!
https://www.facebook.com/Malayalivartha