ജീവന് രക്ഷാവലയം തീര്ത്ത ആ കരങ്ങളുടെ ഉടമ ഇന്ന് വാര്ദ്ധ്യക്യത്തിന്റെ അവശതകളുമായി കഴിയുന്നു എന്നറിഞ്ഞപ്പോള് സ്നേഹചുംബനവുമായി മന്ത്രി എത്തി!
സി പി എം-കാരനായ മന്ത്രി എ.കെ.ബാലന്, തലശ്ശേരി ബ്രണ്ണന് കോളജിലെ പഴയ കെഎസ്യുക്കാരനെ കാണാനെത്തി. സുഹൃത്തിന്റെ നെറ്റിയില് ചുംബിച്ചുകൊണ്ട് മന്ത്രി എ.കെ.ബാലന് പറഞ്ഞു: ' നീയില്ലായിരുന്നെങ്കില് അന്നു കോളജ് മുറ്റത്ത് ഞാനും കുത്തേറ്റു വീഴുമായിരുന്നു'. ബ്രണ്ണന് കാലത്തിന്റെ ഓര്മകളില് രണ്ടു പേരുടെയും കണ്ണുകള് നിറഞ്ഞു. ബ്രണ്ണന് കോളജില് എസ്എഫ്ഐ നേതാവായിരുന്ന എ.കെ.ബാലനും കെഎസ്യു പ്രവര്ത്തകനായിരുന്ന എടക്കാട് ലക്ഷമ്ണനുമായുള്ള സൗഹൃദത്തിനു ജീവന്റെ വിലയാണ്.
കണ്ണൂര് താഴെചൊവ്വയിലെ വീട്ടില് അസുഖബാധിതനായി വിശ്രമിക്കുന്ന ലക്ഷ്മണനെക്കാണാന് ഇന്നലെയാണ് ബാലനെത്തിയത്. പഴയ സഹപാഠിയെ കണ്ടപ്പോള് എ.കെ.ബാലന് ആ കോളേജ് ദിനങ്ങള് ഓര്ത്തെടുത്തു: '1973-74 ല് ബ്രണ്ണന് കോളജിലെ എസ്എഫ്ഐ ചെയര്മാനായിരുന്നു ഞാന്. അന്നു കോളജില് എസ്എഫ്ഐ-കെഎസ്യു സംഘര്ഷം പതിവാണ്. കെഎസ്യു പ്രവര്ത്തകനായിരുന്നെങ്കിലും ലക്ഷ്മണന് സംഘര്ഷങ്ങളുടെ ഭാഗമായിരുന്നില്ല.
ഇടക്കിടെ സംഘര്ഷം ഉണ്ടാവുമെങ്കിലും ആരും ആയുധം ഉപയോഗിച്ചിരുന്നില്ല. പക്ഷേ ഒരു ദിവസം അതും സംഭവിച്ചു. എസ്എഫ്ഐ പ്രവര്ത്തകനായ അഷ്റഫ് കുത്തേറ്റുവീണു. അക്രമികളുടെ അടുത്ത ലക്ഷ്യം എസ് എഫ് ഐ-ക്കാരനായ ഏ കെ ബാലനായിരുന്നു. ആയുധവുമായി അവര് ഏ കെ ബാലന്റെ നേര്ക്കുവന്നപ്പോള് ലക്ഷ്മണന് ഓടിയെത്തി തടഞ്ഞു. ലക്ഷ്മണനും ഒപ്പമുള്ള സുഹൃത്തുക്കളും ചേര്ന്ന് ബാലനു രക്ഷാവലയം തീര്ത്തു. ലക്ഷ്മണന് തടഞ്ഞില്ലായിരുന്നെങ്കില് അഷ്റഫിനെപ്പോലെ അന്ന് ബാലനും കുത്തേറ്റുവീഴുമായിരുന്നു.
ആശുപത്രിയില് പ്രവേശിപ്പിക്കപ്പെട്ട അഷ്റഫ് കുറച്ചുനാളുകള്ക്കു ശേഷം മരിച്ചു. ബാലന് പറഞ്ഞുനിര്ത്തിയപ്പോള് ലക്ഷ്മണന്റെ കണ്ണുനിറഞ്ഞിരുന്നു. ഇടറിത്തുടങ്ങിയ വാക്കുകളില് ലക്ഷ്മണന് എന്തോ പറഞ്ഞുതുടങ്ങിയപ്പോഴേക്കും ബാലന് ചേര്ത്തുപിടിച്ചു. ആ നെറ്റിയില് വീണ്ടും ചുംബിച്ചു. പത്രപ്രവര്ത്തകനും അധ്യാപകനുമായിരുന്ന ലക്ഷ്മണനുമായി കോളജ് കാലത്തിനു ശേഷവും ബാലന് സൗഹൃദം തുടര്ന്നിരുന്നു. അടുത്തിടെ അസുഖബാധിതനായി ആശുപത്രിയിലായപ്പോള് കാണാനുമെത്തിയിരുന്നു.
https://www.facebook.com/Malayalivartha