കണ്ണൂരില് കിയാല്-ന്റെ ജലാഭിവാദ്യത്തിലേക്ക് വലിയ സ്വപ്നം പറന്നിറങ്ങി!
വിമാനത്തിന്റെ ഇരമ്പം കേട്ടുതുടങ്ങിയപ്പോള് മൊബൈല് കണ്ണുകള് ഉള്പ്പെടെ എല്ലാവരുടെ കണ്ണുകളും മാനത്തേക്കായിരുന്നു. എയര് ഇന്ത്യ എക്സ്പ്രസിന്റെ വെളുപ്പും ചുവപ്പും ചാര്ത്തിയ വലിയ യാത്രാ വിമാനം ടെര്മിനലിനു മുകളിലൂടെ കിഴക്കുഭാഗത്തേക്ക്.. മേഘക്കീറുകള്ക്കിടയില് മറഞ്ഞ വിമാനം റണ്വേയെ വലംവച്ചു പടിഞ്ഞാറുവശത്തേക്ക്.. 6 തവണ ആകാശത്തുവട്ടമിട്ടു പറന്നശേഷം 11.26-നാണ് കിഴക്കുവശത്തെ റണ്വേയില് ലാന്ഡ് ചെയ്തത്. വിമാനത്താവളത്തില് സജ്ജമാക്കിയ ഡോപ്ലര് വെരിഹൈ ഫ്രീക്വന്സി ഓംനി റേഞ്ച് (ഡിവിഒആര്) എന്ന ഉപകരണത്തിന്റെ സഹായത്തോടെയായിരുന്നു ലാന്ഡിങ്.
ഡിവിഒആറാണ് വിമാനത്താവളത്തിന്റെ സ്ഥാനത്തെപ്പറ്റിയുള്ള കൃത്യമായ വിവരങ്ങള് വിമാനത്തിനു കൈമാറുന്നത്. ടെര്മിനലിന് അഭിമുഖമായി നീങ്ങിയ വിമാനത്തിനു കണ്ണൂര് വിമാനത്താവള കമ്പനിയുടെ (കിയാല്) ഫയര് ആന്ഡ് റസ്ക്യു വിഭാഗം ജലാഭിവാദ്യം നല്കി.
കര്ണാട സ്വദേശിയായ കമാന്ഡര് ക്യാപ്റ്റന് എ.എസ്.റാവുവാണ് വിമാനം പറത്തിയത്. ഫസ്റ്റ് ഓഫിസര് ക്യാപ്റ്റന് അരവിന്ദ് കുമാര്, സീനിയര് കാബിന് ക്രൂ സൈന മോഹന്, 4 എയര്ക്രാഫ്റ്റ് മെയിന്റനന്സ് എന്ജിനീയര്മാര്, 2 സുരക്ഷാ ഉദ്യോഗസ്ഥര്, കൊമേഴ്സ്യല് വിഭാഗം ഉദ്യോഗസ്ഥന് എന്നിവരാണ് വിമാനത്തിലുണ്ടായിരുന്നത്.
വിമാനത്തില് നിന്ന് എയ്റോബ്രിജ് വഴി പുറത്തിറങ്ങിയ പൈലറ്റുമാരും എയര്ഇന്ത്യ എക്സ്പ്രസിന്റെ ഉദ്യോഗസ്ഥരും ഉള്പ്പെട്ട പത്തംഗ സംഘത്തെ കിയാല് എംഡി വി.തുളസീദാസിന്റെ നേതൃത്വത്തില് സ്വീകരിച്ചു. ചീഫ് ഓപറേറ്റിങ് ഓഫിസറുടെ ചുമതലയുള്ള എക്സിക്യുട്ടീവ് ഡയറക്ടര് (എന്ജിനീയറിങ്) കെ.പി.ജോസ്, ചീഫ് പ്രൊജക്ട് എന്ജിനീയര് ഇന് ചാര്ജ് കെ.എസ്.ഷിബുകുമാര്, അഡ്മിനിസ്ട്രേഷന് മാനേജര് ടി.അജയകുമാര്, ചീഫ് സെക്യൂരിറ്റി ഓഫിസര് മണിയറ വേലായുധന്, ഓപറേഷന്സ് വിഭാഗം സീനിയര് മാനേജര് ബിനു ഗോപാല്, ഡിജിഎം (എടിസി) ജി.പ്രദീപ് കുമാര്, ഡിജിഎം (സിഎന്എസ്) വി.എന്.മുരളീധരന്, എജിഎം (സിഎന്എസ്) ജാക്സണ് പോള്, സീനിയര് മാനേജര് (സിഎന്എസ്) ടിജോ ജോസഫ്, ഡപ്യുട്ടി പ്രൊജക്ട് മാനേജര് (എഇകോം) രാജേഷ് പൊതുവാള്, ഫയര് ആന്ഡ് റസ്ക്യു വിഭാഗം മാനേജര് ഇ.ഷൗക്കത്തലി, കിയാല് പ്രൊജക്ട് എന്ജിനീയര്മാരായ എം.സി.ജയരാജ്(ഇലക്ട്രിക്കല്), ബിജു(സിവില്), തുടങ്ങിയവരും ഒപ്പമുണ്ടായിരുന്നു.എയര് ഇന്ത്യാ എയര്ട്രാന്സ്പോര്ട്ട് സര്വീസസ് ലിമിറ്റഡിന്റെ സതേണ് റീജനല് കോഓര്ഡിനേറ്റര് എ.വി.മോഹനന്, എയര്ഇന്ത്യ എക്സ്പ്രസ് ജനറല് മാനേജര് (സതേണ് റീജന്) മുരുകയ്യന്, ചീഫ് ഓഫ് എയര്പോര്ട്ട് സര്വീസസ് എബി ജോര്ജ്, കണ്ണൂര് സ്റ്റേഷന് കോഓര്ഡിനേറ്റര് മുനീബ് തുടങ്ങിയവരും എത്തിയിരുന്നു.
കണ്ണൂര് വിമാനത്താവളത്തില് ഇറങ്ങിയ ആദ്യ വനിതയെന്ന നേട്ടം ഇനി സൈനയ്ക്കു സ്വന്തം. ബാലരാമപുരം എന്നു പറയുമ്പോള് തിരുവനന്തപുരത്തുകാര്ക്ക് ഓര്മ്മയിലെത്തുന്നത് കൈത്തറി ഗ്രാമമാണ്. എയര്ഇന്ത്യ എക്സ്പ്രസിന്റെ സീനിയര് കാബിന് ക്രൂവായ സൈന ബാലരാമപുരം സ്വദേശിനിയാണ്. 8 വര്ഷമായി എയര്ഇന്ത്യ എക്സ്പ്രസില് ജോലി ചെയ്യുന്നു. കൈത്തറിയുടെ തറവാടായ കണ്ണൂരിലേക്കുള്ള പരീക്ഷണ പറക്കലിന്റെ ഭാഗമാവാന് കഴിഞ്ഞത് ഭാഗ്യമായി കണക്കാക്കുന്നുവെന്നും ഏറെ സന്തോഷമുണ്ടെന്നും സൈന പറഞ്ഞു. പച്ചപ്പിനിടയില് തെളിഞ്ഞ റണ്വേയുടെ കാഴ്ച മനംകവരുന്നതായിരുന്നുവെന്നു നിലത്തിറങ്ങിയശേഷം പറയുമ്പോള് സൈന മോഹന്റെ മുഖത്ത് സന്തോഷത്തിളക്കം.
https://www.facebook.com/Malayalivartha