ശരീരഭാഗങ്ങള്‍ വാതുവയ്ച്ചുകൊണ്ടുള്ള ചീട്ടുകളി, തോല്‍ക്കുന്നവര്‍ അവ മുറിച്ചു നല്‍കണം!
പച്ചകുത്തിന്റെ ചിഹ്നശാസ്ത്രത്തില്‍ അഗ്രഗണ്യനായ അര്‍ക്കാഡി ബ്രോണികോവിന്റെ റഷ്യന്‍ ക്രിമിനല്‍ ടാറ്റൂസ് ആന്‍ഡ് പ്ലേയിങ് കാര്‍ഡ്‌സ്, റഷ്യന്‍ ജയിലറകളിലെ വിചിത്ര കഥകളിലേയ്ക്ക് വെളിച്ചം വീശുന്ന പുസ്തകമാണ്. ഫ്യുവല്‍ പബ്ലിഷേഴ്‌സ് ആണ് പുസ്തകം പുറത്തിറക്കുന്നത്. കുറ്റവാളികള്‍ തടവില്‍ കഴിയുമ്പോള്‍ നടത്തുന്ന ചീട്ടുകളി എന്ന ക്രൂരവിനോദത്തിന്റെ നേര്‍ചിത്രമാണ് ഈ പുസ്തകം. സ്റ്റാലിന്റെ കാലത്തുണ്ടായിരുന്ന സൈബീരിയയിലെ ഗുലാഗ് ക്യാമ്പുകളിലെ പൈശാചികതയുടെ സാഹചര്യങ്ങളിലാണ് ഇപ്പോഴത്തെ ഈ ഭയാനകമായ അതിക്രമങ്ങളുടെ വേരുകളുള്ളത്.
മിത്തുകളെക്കാള്‍ നിഗൂഢമായ, ചോരയുടെ മണം പേറുന്ന കഥകള്‍. ഫ്യൂയല്‍ പുറത്തിറക്കിയ റഷ്യന്‍ ക്രിമിനല്‍ ടാറ്റൂ ആര്‍ക്കൈവ് സീരീസിലെ പുതിയ പുസ്തകത്തിലാണ് ജയിലറയിലെ ചീട്ടുകളി വിവരിക്കുന്നത്. കരളുറപ്പുള്ളവര്‍ക്ക് വായിക്കാം. ജയിലുകളില്‍ ചീട്ടുകളിക്ക് നിരോധനമാണ്. എന്നാല്‍, ഈ നിരോധനത്തിന് പുല്ലുവിലയും. ക്രൂരമായ സമയം കൊല്ലിയാണ് ജയിലുകളിലെ കൊടും കുറ്റവാളികള്‍ക്ക് ഈ കളി. ചൂതാട്ടത്തിന്റെ മറ്റൊരു ഭാവം. ജയിലില്‍ ലഭിക്കുന്ന സാധാരണ വസ്തുക്കള്‍ കൊണ്ടാണ് ഇവര്‍ ചീട്ടുകള്‍ നിര്‍മിക്കുന്നത്. പെട്ടെന്ന് ഒളിപ്പിക്കാന്‍ പാകത്തില്‍ ഉള്ളം കൈയില്‍ ഒതുങ്ങുന്ന വലിപ്പമാണ് ചീട്ടുകള്‍ക്ക്.
ചീട്ടുകള്‍ തയ്യാറായിക്കഴിഞ്ഞാല്‍ എതിരാളിക്കായുള്ള വേട്ടയാണ്. എതിരാളിയെ കണ്ടെത്തിക്കഴിഞ്ഞാല്‍ വാശിയേറിയ പോരാട്ടം. ആദ്യം കൈയിലുള്ള വസ്തുക്കളാണ് വാതുവയ്ക്കുന്നത്. പണവും ഭക്ഷണവും സിഗരറ്റും അങ്ങനെ പോകും. പിന്നീട് ശരീരഭാഗങ്ങള്‍ തന്നെ വാതുവയ്ക്കും. കണ്ണ്, ചെവി, വിരലുകള്‍ അങ്ങനെ. ഇതിനൊക്കെ പ്രത്യേകം പേരുകളുമുണ്ട്. പോയിമെറ്റ് വെട്ടോച്ക്കു എന്നു പറഞ്ഞാല്‍ മറ്റ് കുറ്റവാളികളുടെ സാന്നിധ്യത്തില്‍ തോല്‍ക്കുന്നവര്‍ വിരല്‍ മുറിച്ചു നല്‍കുക എന്നാണ്. പോയിമെറ്റ് പെല്‍മന്‍ ചെവി മുറിച്ചു നല്‍കലാണ്. മുറിഞ്ഞ ഭാഗത്ത് ചാരം പുരട്ടും. പോയിമെറ്റ് ഫറു എന്നാല്‍ കണ്ണ് ചൂഴ്ന്നു നല്‍കണം. ചൂഴ്‌ന്നെടുക്കുന്ന കണ്ണുകള്‍ എല്ലാവര്‍ക്കും കാണാന്‍ പാകത്തില്‍ മേശമേല്‍ പ്രദര്‍ശിപ്പിക്കുകയും വേണം.
ഇതിനൊക്കെ പുറമെ ചിലപ്പോള്‍ സഹ തടവുകാരുടെ ജീവന്‍ വരെ പണയം വച്ചും ചീട്ടു കളിക്കും. തോല്‍ക്കുന്നവന്‍, നാണംകെടുത്തുന്ന ചിത്രങ്ങള്‍ സ്വന്തം ശരീരത്തില്‍ പച്ചകുത്തേണ്ട ഗതികേടുമുണ്ടാകും ഈ കളിയില്‍. ആ ക്രൂരത നിറഞ്ഞ പ്രാകൃതമായ കുറ്റവാളികളുടെ വിനോദമാണ് ഈ പുസ്തകത്തിലൂടെ ലോകത്തിനു മുന്നില്‍ തുറന്നു വയ്ക്കുന്നത്. ചീട്ടുകളുടെ 150-ഓളം അപ്രകാശിത ചിത്രങ്ങള്‍ ഉള്‍പ്പെടുത്തിയിട്ടുണ്ട് ഈ പുസ്തകത്തില്‍.
https://www.facebook.com/Malayalivartha
