കഴിഞ്ഞ തിങ്കളാഴ്ച രാത്രി 8.32ന് മുംബൈ വ്യോമഗതാഗത നിയന്ത്രണ കേന്ദ്രത്തിലേക്ക് ഒരു വിമാനത്തില്‍ നിന്നും അപകടസന്ദേശമെത്തുന്നു. എന്‍ജിന് തീപിടിച്ച് വിമാനം കൂപ്പുകുത്തുകയാണെന്നായിരുന്നു സന്ദേശം. വേറൊന്നും സന്ദേശത്തില്‍ വ്യക്തമാക്കുന്നില്ല. ഏതു വിമാനമാണ്? പറക്കുന്നത് ഏത് ഭാഗത്താണ് ? എന്താണ് സംഭവിച്ചത് ഒന്നിനും ധാരണയില്ല. സന്ദേശം കേട്ട് ഉദ്യോഗസ്ഥരെല്ലാം ഞെട്ടി. രാത്രിയിലും ഉണര്‍ന്നിരിക്കുന്ന മുംബെ നഗരത്തിന്റെ ഏതെങ്കിലും ഭാഗത്താണോ വിമാനം കൂപ്പ് കുത്തുന്നത് ഒന്നും വ്യക്തമല്ല. അതിനിടെ വിമാനമേതെന്ന് ഉദ്യോഗസ്ഥര്‍ തിരിച്ചറിഞ്ഞു. ഇന്ത്യയിലെ ഏറ്റവും ധനികനായ മുകേഷ് അംബാനിയുടെ പേരില്‍ രജിസ്റ്റര്‍ ചെയ്ത എയര്‍ബസ്.
പരിഭ്രാന്തരായ ഉദ്യോഗസ്ഥര്‍ വിമാനം എവിടെയാണെന്ന് അന്വേഷണം തുടങ്ങുമ്പോള്‍ അതാ വിമാനത്തില്‍നിന്നും വീണ്ടും സന്ദേശമെത്തുന്നു. സമയം 8.38. പൈലറ്റ് പറഞ്ഞു, വിമാനം ഡല്‍ഹി ലാഹോര്‍ മസ്‌കറ്റ് പാതയില്‍ പറന്നുകൊണ്ടിരിക്കുകയാണ്. എന്‍ജിന് തീപിടിച്ച വിമാനം കടലില്‍ ഇറക്കുകയാണെന്ന് സന്ദേശം തുടര്‍ന്നു.
എ.ടി.സി ഉടന്‍ ഡല്‍ഹിയിലെയും മസ്‌കറ്റിലെയും എയര്‍ട്രാഫിക് കേന്ദ്രങ്ങളില്‍ ബന്ധപ്പെട്ടു. അത്തരമൊരു സംഭവം നടന്നതായി വിവരം ലഭിച്ചിട്ടില്ലെന്നും ആ റൂട്ടിലുള്ള മറ്റു വിമാനങ്ങളും അസാധാരണമായ ഒന്നും കണ്ടില്ലെന്നുമായിരുന്നു അവിടങ്ങളില്‍ നിന്നുള്ള മറുപടി. താമസിയാതെ റേഡിയോ സന്ദേശത്തിന്റെ ഉറവിടം കണ്ടുപിടിക്കാന്‍ ശ്രമമായി. ഉറവിടം കണ്ടെത്തിയ ഉദ്യോഗസ്ഥര്‍ അമ്പരന്നു. അത് സ്വകാര്യ ജെറ്റ് വിമാനങ്ങള്‍ നിറുത്തിയിടുന്ന ഹാംഗറില്‍ നിന്നായിരുന്നു. അവിടെ പാര്‍ക്ക് ചെയ്തിരുന്ന വിമാനങ്ങള്‍ പരിശോധിക്കാനായി ഒരു സംഘം നീങ്ങി. അവര്‍ കണ്ടത് മുകേഷ് അംബാനിയുടെ വിമാനം തന്നെ, ഭാര്യ നിതാ അംബാനിക്ക് 44 ാം പിറന്നാളിന് സമ്മാനിച്ച വിമാനം, എയര്‍ ബസ് 319. എന്നാല്‍, വിമാനത്തില്‍ ആരുമുണ്ടായിരുന്നില്ല. തുടര്‍ന്ന് സംഭവം സിവില്‍ ഏവിയേഷന്‍ ഡയറക്ടര്‍ക്ക് റിപ്പോര്‍ട്ട് ചെയ്തു.
വിമാനത്തിലെ എമര്‍ജന്‍സി സംവിധാനങ്ങള്‍ പൈലറ്റ് പരിശോധിച്ചതായിരിക്കും എന്നാണ് എ.ടിസി പറയുന്നത്. എന്നാല്‍, പരിശോധന എ.ടി.സിയെ മുന്‍കൂട്ടി അറിയിച്ചിട്ടായിരിക്കണം എന്നത് നിര്‍ബന്ധമാണ്. ഇവിടെ പൈലറ്റ് എ.ടി.സിയുമായി ബന്ധപ്പെടാന്‍ മറന്നതായിരിക്കാം.
മുകേഷ് അംബാനി ഭാര്യ നിതയ്ക്ക് 44ാം പിറന്നാള്‍ സമ്മാനമായി കൊടുത്തതാണ് 242 കോടി രൂപ വിലവരുന്ന എയര്‍ബസ് 319 എന്ന വിമാനം. രാജ്യത്തുള്ള എറ്റവും വലിയ വിമാനങ്ങളില്‍ ഒന്നാണിത്.വിമാനത്തില്‍ കിടപ്പുമുറി, കുളിമുറി, ഓഫീസ് മുറി, മ്യൂസിക് സിസ്റ്റം, സാറ്റലൈറ്റ് ടെലിവിഷന്‍, കണ്ണിനിമ്പം തരുന്ന ലൈറ്റിംഗ് സംവിധാനത്തോടെയുള്ള ബാര്‍ തുടങ്ങി വിപുലമായ സജ്ജീകരണങ്ങളുണ്ട്

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha