ഫ്രഞ്ച് ഗയാനയില്‍ നിന്നും കഴിഞ്ഞ മെയ്മാസം 26-നാണ് 'ജിസാറ്റ്11' വിക്ഷേപിക്കാന്‍ തീരുമാനിച്ചിരുന്നത്. എന്നാല്‍ വിക്ഷേപണത്തിന്റെ അവസാന ഘട്ടത്തില്‍ ഉപഗ്രഹത്തില്‍ സാങ്കേതിക തകരാറുണ്ടെന്ന് ശാസ്ത്രജ്ഞര്‍ മനസിലാക്കുകയും, വിക്ഷേപണം റദ്ദാക്കി ഉപഗ്രഹത്തെ തിരികെ വിളിക്കുകയും ചെയ്തിരുന്നു. ഇന്ത്യ വിക്ഷേപിച്ചതില്‍ വച്ച് ഏറ്റവും ഭാരം കൂടിയ ഉപഗ്രഹമായ ജിസാറ്റ്11 വലിയപക്ഷി അഥവാ ബിഗ് ബേഡ് എന്ന ഓമനപേരിലാണ് അറിയപ്പെടുന്നത്.

ഇന്ന് പുലര്‍ച്ചെ ഇന്ത്യന്‍ സമയം 2.07-നാണ് ഐ.എസ്.ആര്‍.ഒ അഭിമാനനേട്ടം കൈവരിച്ചത്. ഇത് വരെ ഇന്ത്യ വിക്ഷേപിച്ചതില്‍ വച്ചേറ്റവും ഭാരം കൂടിയ ഉപഗ്രഹത്തെ ഭ്രമണപഥത്തിലെത്തിച്ചാണ് ഐ.എസ്.ആര്‍.ഒ കരുത്ത് കാട്ടിയത്. 5,845 കിലോഗ്രാമാണ് ഈ ഭീമന്റെ ഭാരം. ഏരിയന്‍ സ്‌പേസ് എന്ന കമ്പനിയില്‍ നിന്നും വാടകയ്‌ക്കെടുത്ത ഏരിയന്‍ 5 റോക്കറ്റില്‍ ഏതാണ്ട് 600 കോടി രൂപ ചെലവിലാണ് ജി സാറ്റ് 11 വിക്ഷേപിച്ചിരിക്കുന്നത്.

പ്രധാനമന്ത്രിയുടെ ഡിജിറ്റല്‍ ഇന്ത്യ എന്ന സ്വപ്ന പദ്ധതിക്ക് കരുത്തേകാനുതകുന്നതാണ് 'ജിസാറ്റ്11'. വാര്‍ത്താ വിനിമയ മേഖലയ്ക്ക് കരുത്തേകാന്‍ 40 ട്രാന്‍സ്‌പോണ്‍ണ്ടറുകളാണ് ഈ ഉപഗ്രഹത്തിലുള്ളത്. ഭാരത് നെറ്റ് എന്ന പദ്ധതിയില്‍ രാജ്യത്തെ വിദൂരമായ ഗ്രാമങ്ങളിലും ഇന്റര്‍നെറ്റ് ലഭ്യമാക്കാനാണ് കേന്ദ്രസര്‍ക്കാര്‍ പദ്ധതിയിട്ടിരിക്കുന്നത്. ഇന്നലെ വിക്ഷേപിച്ച 'ജിസാറ്റ്11'ന് പിന്നാലെ അടുത്തവര്‍ഷം ജിസാറ്റ് 20 ഐ.എസ്.ആര്‍.ഒ വിക്ഷേപിക്കുന്നതോടെ ഭാരത് നെറ്റ് എന്ന ലക്ഷ്യം പൂര്‍ത്തീകരിക്കാനാവും.

ബ്രോഡ് ബാന്‍ഡ് സേവനങ്ങളെ ശക്തിപ്പെടുത്തി ഇന്ത്യയിലെ വിവിധ മേഖലകളിലെ വാര്‍ത്താവിനിമയ സംവിധാനങ്ങള്‍ക്ക് വേഗം കൂട്ടുക എന്ന ലക്ഷ്യത്തോടെ വിക്ഷേപിച്ച ജിസാറ്റ്11-ന് 15 വര്‍ഷമാണ് പ്രതീക്ഷിത ആയുസ്. സിഗ്‌നലുകളുടെ വിനിമയത്തിന് ഉതകുന്ന 40 ട്രാന്‍സ്‌പോണ്‍ഡറുകളാണ് ഉപഗ്രഹത്തിലുള്ളത്. ഈ ഗണത്തില്‍പ്പെട്ട ജിസാറ്റ്19, ജിസാറ്റ്29 എന്നിവ നേരത്തേ വിക്ഷേപിച്ചിരുന്നു.

കേബിള്‍ വഴിയുള്ള ഇന്റര്‍നെറ്റ് സംവിധാനങ്ങള്‍ കടന്നുചെല്ലാന്‍ കഴിയാത്ത ഉള്‍പ്രദേശങ്ങളില്‍ ഉപഗ്രഹ സഹായത്തോടെ ഇന്റര്‍നെറ്റ് സേവനം ഉറപ്പാക്കുകയാണ് ലക്ഷ്യം. വിമാനങ്ങളില്‍ ഇന്റര്‍നെറ്റ് സേവനം ഉപയോഗിക്കാനും ഉപഗ്രഹം സഹായിക്കും.