കോടതി കനിഞ്ഞില്ല... രഞ്ജിനി ക്യൂ തെറ്റിച്ചെന്ന കേസ് തുടരും; രണ്ടുമാസത്തിനകം തീര്‍പ്പ് കല്‍പ്പിക്കും
കേരളം സജീവമായി ചര്‍ച്ച ചെയ്ത വിമാനത്താവളത്തിലെ ക്യൂ പ്രശ്‌നത്തില്‍ രഞ്ജിനിയുടെ അപേക്ഷ കോടതി നിരസിച്ചു. നെടുമ്പാശേരി വിമാനത്താവളത്തില്‍ സഹയാത്രികരോട് അസഭ്യം പറഞ്ഞെന്ന കേസ് റദ്ദാക്കണമെന്നാവശ്യപ്പെട്ട് രഞ്ജിനി ഹരിദാസ് സമര്‍പ്പിച്ച ഹര്‍ജിയാണ് ഹൈക്കോടതി തള്ളിയത്. കേസിന്റെ വിചാരണ നാലുമാസത്തിനകം പൂര്‍ത്തിയാക്കാന്‍ ആലുവ മജിസ്‌ട്രേട്ട് കോടതിക്ക് ബി കമാല്‍പാഷ നിര്‍ദ്ദേശം നല്‍കി.
2013 മെയ് 16ന് വിമാനത്താവളത്തിലെ എമിഗ്രേഷന്‍ പരിശോധനയ്ക്കിടെ ക്യൂ തെറ്റിച്ചത് ചോദ്യംചെയ്ത കോട്ടയം ചെങ്ങളം സ്വദേശി കൊച്ചുറാണിയെയും ഭര്‍ത്താവിനെയും അസഭ്യം പറഞ്ഞുവെന്നാണ് കേസ്.
രഞ്ജിനി മോശമായി പെരുമാറിയെന്നാരോപിച്ച് കോട്ടയം ചെങ്ങളം സ്വദേശിനി കൊച്ചുറാണി ജോര്‍ജ് നല്‍കിയ പരാതിയില്‍ നെടുമ്പാശേരി പൊലീസ് രജിസ്റ്റര്‍ ചെയ്ത കേസും തന്നെ തടഞ്ഞവര്‍ക്കെതിരെ രഞ്ജിനി നല്‍കിയ കേസും കോടതിയുടെ പരിഗണനയിലുണ്ട്. വിദേശത്തുള്ള സാക്ഷികളെ ഒഴിവാക്കി രണ്ടു കേസുകളിലും നാല് മാസത്തിനകം തീര്‍പ്പുണ്ടാക്കണം.
എമിഗ്രേഷന്‍പരിശോധന കഴിഞ്ഞ് കസ്റ്റംസ് പരിശോധനയ്ക്കായുള്ള ക്യൂവില്‍ ബിനോയ് നില്‍ക്കുന്നതിനിടെ ഇദ്ദേഹത്തെ മറികടന്ന് രഞ്ജിനി ഹരിദാസ് ക്യൂവിന്റെ മുന്‍ നിരയിലേക്ക് കയറി നിന്നതിനെ ബിനോയ് ചോദ്യം ചെയ്തു. ഇതില്‍ കുപിതയായ രഞ്ജിനി തന്റെ കൂടെയുണ്ടായിരുന്ന മറ്റ് രണ്ട് പേരെ കൂടി ക്യൂവിന്റെ മുന്‍ നിരയിലേക്ക് കൊണ്ടുവന്നു. ഇതേ ചൊല്ലിയാണ് വാക്കുതര്‍ക്കം മുറുകിയത്. തുടര്‍ന്നാണ് കയ്യേറ്റ ശ്രമമുണ്ടായതെന്നാണ് ആക്ഷേപം. ഉടന്‍ തന്നെ രഞ്ജിനി മൊബൈല്‍ ഫോണിലൂടെ ഉന്നത പൊലീസുദ്യോഗസ്ഥരുമായി ബന്ധപ്പെട്ടു. തുടര്‍ന്ന് നെടുമ്പാശേരി പൊലീസ് വിമാനത്താവളത്തിന്റെ അകത്തെത്തിയാണ് രഞ്‌നിയില്‍ നിന്നും പരാതി സ്വീകരിച്ച ശേഷം ബിനോയിയെ അറസ്റ്റ് ചെയ്തത്. അമേരിക്കയില്‍ നിന്നും ഭാര്യയ്ക്കും രണ്ട് കുട്ടികള്‍ക്കുമൊപ്പം നാട്ടിലേക്ക് വരികയായിരുന്ന കോട്ടയം പൊന്‍കുന്നം സ്വദേശി ബിനോയിയെയാണ് അറസ്റ്റ് ചെയ്തത്.
എന്നാല്‍ സിസിടിവി പരിശോധനയെ തുടര്‍ന്ന് ബിനോയുടെ നിരപരാധിത്വം പോലീസിന് ബോധ്യമായി. തുടര്‍ന്ന് രഞ്ജിനിക്ക് എതിരേയും കേസ് രജിസ്റ്റര്‍ ചെയ്യുകയായിരുന്നു.
തനിക്കെതിരായ കേസ് വ്യാജമാണെന്ന് രഞ്ജിനിയുടെ ഹര്‍ജിയില്‍ പറയുന്നു. അതേസമയം സാക്ഷികളുടെയും സി.സി കാമറ ദൃശ്യങ്ങളുടെയും സഹായത്തോടെയാണ് കേസ് രജിസ്റ്റര്‍ ചെയ്തതെന്ന് സര്‍ക്കാര്‍ ഹൈക്കോടതിയില്‍ പറഞ്ഞു. സിസിടിവി ദൃശ്യങ്ങളില്‍നിന്ന് കുറ്റകൃത്യം നടന്നതായി വ്യക്തമാണെന്ന് പബ്ലിക് പ്രോസിക്യൂട്ടര്‍ ജിബു പി തോമസ് കോടതിയില്‍ ബോധിപ്പിച്ചു
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
