റോളര്കോസ്റ്റര് റൈഡിനു ശേഷം 4 വയസ്സുകാരന് പക്ഷാഘാതം
അമേരിക്കയില് അമ്യൂസ്മെന്റ് പാര്ക്കിലെ റോളര് കോസ്റ്റര് റൈഡിന് ശേഷം വീട്ടിലേയ്ക്കു മടങ്ങിയ നാലുവയസ്സുകാരന് പക്ഷാഘാതം. റൈഡിലെ അതിവേഗത മൂലം തല, മുഖം, തലച്ചോര് എന്നിവിടങ്ങളിലേയ്ക്ക് രക്തം എത്തിക്കുന്ന കരോറ്റിഡ് ആര്ട്ടറി മുറിഞ്ഞാണ് കുട്ടിക്ക് പക്ഷാഘാതമുണ്ടായത്. ഇതിനു മുന്പും ഇത്തരം സംഭവങ്ങളുണ്ടായതായി റിപ്പോര്ട്ട് ചെയ്യപ്പെട്ടിട്ടുണ്ടെങ്കിലും അതൊക്കെ മുതിര്ന്ന ആള്ക്കാര്ക്കായിരുന്നു. എന്നാലും പത്തുവയസ്സില് താഴെയുളള കുട്ടികളുടെ കഴുത്തിലെ പേശികള് പൂര്ണ്ണമായും വികസിച്ചിട്ടില്ലാത്തതിനാല് ഇത്തരത്തിലെ പെട്ടെന്നുളള ചലനങ്ങള് അവര്ക്ക് പെട്ടെന്ന് ദോഷം ചെയ്യുമെന്ന് ഡോക്ടര്മാര് പറയുന്നു.
രണ്ട് തവണ റോളര് കോസ്റ്റര് റൈഡിനു ശേഷം സ്വന്തം സംസ്ഥാനത്തേയ്ക്ക് മടങ്ങവേ വിമാനത്തില് വച്ചാണ് കുട്ടിയ്ക്ക് ഛര്ദ്ദി ആരംഭിച്ചത്. ഉടന്തന്നെ മുഖത്തിന്റെ ഇടതുഭാഗം മരവിച്ചു പോയി. തിരിച്ച് വീട്ടിലെത്തിയപ്പോഴേയ്ക്കും കുട്ടിയ്ക്ക് നടക്കാന് കഴിയാത്ത അവസ്ഥയായി.മാതാപിതാക്കള് കുട്ടിയെ ഉടന്തന്നെ തൊട്ടടുത്ത ആശുപത്രിയിലെത്തിച്ച് സ്കാന് ചെയ്തപ്പോഴാണ് ആര്ട്ടറി മുറിഞ്ഞതും പക്ഷാഘാതമാണെന്നും തിരിച്ചറിഞ്ഞത്.
ആറുമാസം നീണ്ട ചികിത്സയ്ക്കൊടുവിലാണ് കുട്ടിയുടെ ചലനഗതി ഏകദേശമൊന്ന് സാധാരണ നിലയിലായത്. പൊതുവേ കാണപ്പെടുന്ന റോളര് കോസ്റ്ററുകളേക്കാള് ഉയരവും വേഗതയും കൂടിയ ഭീമന് റോളര് കോസ്റ്ററുകളാണ് കൂടുതല് ആപത്ക്കരം. ഇതു കൂടാതെ കാഴ്ചശക്തിയില്ലാതാക്കുന്ന ഗ്ലൗക്കോമ, നേത്രാന്തരപടലം വേര്പെട്ടുപോകുക, സെറിബ്രല് സ്പൈനല് ദ്രവം പുറത്തേയ്ക്കൊഴുകുക എന്നിങ്ങനെയുളള ഗുരുതര ആരോഗ്യപ്രശ്നങ്ങളും ഇത്തരം റൈഡുകളേത്തുടര്ന്ന് സംഭവിക്കാറുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha