പൊരിവെയിലിലും തളരാതെ, ഒറ്റക്കാലില് നിന്നുകൊണ്ട് പണിയെടുക്കുന്നു സുബ്രഹ്മണ്യന്
തമിഴ്നാട് പഴനി സ്വദേശി സുബ്രഹ്മണ്യന് ജീവിക്കാനും കുടുംബം പോറ്റാനും പൊരിവെയിലില് ഒറ്റക്കാലില് നിന്ന് വിശ്രമമില്ലാതെ കേബിള് കുഴിയെടുക്കുകയാണ്. കല്പ്പറ്റ- പടിഞ്ഞാറത്തറ റോഡിലാണ് സുബ്രമണ്യന് പൊരിവെയിലിലും കേബിള് കുഴിയെടുക്കുന്നത്. 1.30 മീറ്റര് ആഴത്തില് ഒരു മീറ്റര് നീളത്തില് കുഴിയെടുത്താല് 110 രൂപ ലഭിക്കും.
17-ാം വയസിലാണ് കൂലിപ്പണിക്കായി ആദ്യമായി കേരളത്തിലെത്തുന്നത്. ഇപ്പോള് 57-കാരനായ സുബ്രമണ്യന് നാല്പത് വര്ഷമായി കേരളത്തില് എല്ലാ ജില്ലകളിലും കൂലിപ്പണിയെടുത്തുകഴിഞ്ഞു. ഭാര്യയും മകനും നാട്ടിലായതിനാല് ഇടയ്ക്കൊക്കെ നാട്ടില് പോയി താമസിക്കും.
ഒരിക്കല് റോഡരികില് ബിഎസ്എന്എല്ലിനുവേണ്ടി കേബിള് കുഴിയെടുക്കുന്നതിനിടെ 1994-ല് രാമനാട്ടുകരയില് വച്ച് ചരക്ക് ലോറിയിടിച്ചാണ് സുബ്രഹ്മണ്യന്റെ ഇടതു കാല് നഷ്ടമായത്. കോഴിക്കോട് മെഡിക്കല് കോളജ് ആശുപത്രിയില് മാസങ്ങളോളം ചികിത്സയിലായിരുന്നു. പിന്നെ നാട്ടില് പോയി കുറച്ചു കാലം വിശ്രമിച്ചു. നഷ്ടപരിഹാരമോ ഇന്ഷ്വറന്സ് തുകയോ ലഭിച്ചില്ല.
ചികിത്സാ ചെലവും ജോലിയില്ലായ്മയും കാരണം കുടുംബം പ്രതിസന്ധിയിലായതോടെ വാക്കറിന്റെ സഹായത്തോടെ വീണ്ടും കേരളത്തിലെത്തി. ഒറ്റക്കാലില് നിന്ന് കേബിള് കുഴിയെടുക്കാനുള്ള ശ്രമം ആദ്യം പരാജയപ്പെട്ടെങ്കിലും പിന്നീട് കഠിനമായ ശ്രമത്തിലൂടെ വിജയം കണ്ടു. ബിഎസ്എന്എല്ലിനെ കൂടാതെ മറ്റ് മൊബൈല് ഫോണ് സേവനദാതാക്കള്ക്കു വേണ്ടിയും വാട്ടര് അഥോറിറ്റിക്ക് വേണ്ടിയും കുഴി എടുക്കുമായിരുന്നു.
അക്കാലത്ത് സുബ്രഹ്മണ്യന്റെ സംഘത്തില് സ്ത്രീകള് അടക്കം നാല്പത് പേര് വരെ ഉണ്ടാകുമായിരുന്നു. ഇന്ന് ഇത്തരം ജോലികള്ക്ക് യന്ത്രം ഉപയോഗിക്കാന് തുടങ്ങിയതോടെ ജോലി കുറഞ്ഞു. ഇപ്പോള് സംഘത്തില് നാലഞ്ച് പേര് മാത്രമേയുള്ളൂ. കടുത്ത ചൂടില് ശാരീരിക അസ്വസ്ഥതകളും ക്ഷീണവും ഉണ്ടങ്കിലും ചെയ്യുന്ന തൊഴിലില് സംതൃപ്തനാണ് സുബ്രഹ്മണ്യന്.
https://www.facebook.com/Malayalivartha