മനുഷ്യനും വളര്‍ത്തുമൃഗങ്ങളും തമ്മിലുള്ള ആത്മബന്ധത്തിന്റെ എത്രയോ കഥകള്‍ നമ്മള്‍ കേട്ടിരിക്കുന്നു.

മരിച്ചു പോയ ഉടമയ്ക്കായി എത്രയോ കാലം റെയില്‍വേസ്‌റേഷന് മുന്നില്‍ കാത്തിരുന്ന പട്ടിയുടെ കഥ. ഉടമ മരിച്ചുപോയതിന്റെ പേരില്‍ ഭക്ഷണം കഴിക്കുന്നത് ഉപേക്ഷിച്ച പൂച്ചയുടെ കഥ. അങ്ങനെ, സാമാന്യത്തില്‍ കവിഞ്ഞ വൈകാരികത മനുഷ്യനുമായി വെച്ചുപുലര്‍ത്തിയ എത്രയോ മൃഗങ്ങളുടെ കഥകള്‍. മരിച്ചുപോയ വളര്‍ത്തുപൂച്ചയെ, സ്വന്തം മകളെന്ന പോലെ കരുതി ആണ്ടിന് പത്രത്തില്‍ പടംവെച്ച് ഓര്‍മ്മക്കുറിപ്പുകൊടുക്കുന്ന സ്‌നേഹനിര്‍ഭരരായ മനുഷ്യരുടെ കഥകള്‍.

എന്നാല്‍, താന്‍ മരിക്കുമ്പോള്‍ പൂര്‍ണാരോഗ്യത്തോടെ ഇരിക്കുന്ന തന്റെ വളര്‍ത്തുപട്ടിയെയും ദയാവധത്തിന് വിധേയയാക്കി ഒപ്പം അടക്കണം എന്ന് വില്‍പത്രത്തില്‍ എഴുതിവെച്ചിട്ടുപോയ ഒരു സ്ത്രീയെപ്പറ്റിയുള്ള വാര്‍ത്തകളാണ് ഇപ്പോള്‍ അമേരിക്കയിലെ വിര്‍ജിനിയയില്‍ നിന്നും പുറത്തുവന്നിരിക്കുന്നത്.

എമ്മ എന്ന സങ്കരയിനം പട്ടിയ്ക്ക് ഇത്തരത്തില്‍ ദയാവധം നടത്തിയത് അമേരിക്കയില്‍ ഒട്ടേറെ ചര്‍ച്ചകള്‍ക്കും പ്രതിഷേധങ്ങള്‍ക്കും കാരണമായിട്ടുണ്ട്. ആ പട്ടിയ്ക്ക് യാതൊരു ആരോഗ്യപ്രശ്‌നങ്ങളും ഉണ്ടായിരുന്നില്ല എന്നതായിരുന്നു പ്രതിഷേധങ്ങള്‍ക്ക് പിന്നിലെ കാരണം.

'ക്രൂരവും മനസ്സലിവില്ലാത്തതുമായ പ്രവൃത്തി' എന്നാണ് പ്രദേശവാസികളായ പലരും ആ സംഭവത്തെ വിശേഷിപ്പിച്ചത്. 'എമ്മയുടെ നിഷ്‌കളങ്കമായ ആ മുഖം കണ്ടിട്ട് എങ്ങനെ വകവരുത്താന്‍ തോന്നി ?' എന്നാണ് ഒരാള്‍ പ്രതികരിച്ചത്.

തന്റെ വളര്‍ത്തുപട്ടിയെ, മരണശേഷം ദയാവധം നടത്തി, വൈദ്യുതശ്മശാനത്തില്‍ ദഹിപ്പിച്ച്, ചിതാഭസ്മം ഒരു കുടത്തിലാക്കി തന്റെ കല്ലറയില്‍ തന്നെ അടക്കണം എന്ന് വളരെ കൃത്യമായിത്തന്നെ, എമ്മയുടെ ഉടമയായ സ്ത്രീ തന്റെ വില്‍പത്രത്തില്‍ എഴുതി വെച്ചുകളഞ്ഞു! ചെസ്റ്റര്‍ ഫീല്‍ഡിലെ മൃഗസംരക്ഷണ വകുപ്പുകാര്‍ ആ പട്ടിയുടെ ജീവന്‍ രക്ഷിക്കാന്‍ പരമാവധി ശ്രമിച്ചു നോക്കി. നിഷ്‌കളങ്കത തുളുമ്പുന്ന മുഖമുള്ള ആ പട്ടിയെ തങ്ങള്‍ നോക്കിക്കോളാമെന്നും, നല്ലൊരു ഉടമയെ തപ്പിപ്പിടിച്ച് ദത്തെടുപ്പിച്ചോളാമെന്നും അവര്‍ പരമാവധി വാദിച്ചുനോക്കിയെങ്കിലും, പട്ടിയുടെ ഉടമ വില്‍പത്രം നടപ്പിലാക്കാന്‍ ഏല്‍പ്പിച്ചിരുന്ന വക്കീല്‍ വഴങ്ങിയില്ല.

വിര്‍ജീനിയ സ്റ്റേറ്റില്‍ ഇപ്പോള്‍ നിലവിലുള്ള നിയമപ്രകാരം ഇത്തരത്തില്‍ ദയാവധം നടത്താനുള്ള അവകാശം തങ്ങളുടെ വളര്‍ത്തു പട്ടികള്‍ക്കുമേല്‍ ഉടമകള്‍ക്ക് നല്‍കുന്നുണ്ട്. രണ്ടാഴ്ചക്കാലം മാത്രമേ എമ്മയെ പരിചരിച്ചുള്ളുവെങ്കിലും, പൂര്‍ണ്ണാരോഗ്യവതിയായ അവളെ നിര്‍ദയം 'ദയാ'വധത്തിന് ഇരയാക്കിയത്, ചെസ്റ്റര്‍ഫീല്‍ഡിലെ മൃഗസംരക്ഷകരെയും സങ്കടത്തിലാഴ്ത്തിയിരിക്കുകയാണ് .