ലെത്തീഷ, ഓക്സിജന് സിലിണ്ടറുമായി സിവില് സര്വീസ് പരീക്ഷാഹാളിലേക്ക്!
ഈ വരുന്ന ജൂണ് രണ്ടിന് ലെത്തീഷയെ സിവില് സര്വീസ് പരീക്ഷ എഴുതിക്കാനുള്ള ഒരുക്കത്തിലാണ് പിതാവ് എരുമേലി പുത്തന്പീടികയില് അന്സാരിയും ഭാര്യ ജമീലയും. ഐഎഎസ് നേടുകയെന്ന നിശ്ചയദാര്ഢ്യത്തില് ഒരു വര്ഷമായി പരിശീലനത്തിലാണ് ഇരുപത്തഞ്ചുകാരിയായ ഈ എംകോംകാരി. അസ്ഥികള് പൊടിയുന്ന അപൂര്വരോഗം ബാധിച്ച ലെത്തീഷ വെല്ലുവിളികളെ അതിജീവിച്ച് ഉന്നത നിലയിലാണ് സ്കൂള്, കോളജ് പഠനം പൂര്ത്തിയാക്കിയത്.
ലെത്തീഷയ്ക്ക്് തനിയെ ശ്വസിക്കാനാവില്ല. പ്രാണവായു എപ്പോഴും കൂടെക്കരുതേണ്ട ലെത്തീഷയ്ക്കു തിരുവനന്തപുരം പൂജപ്പുരയിലെ പരീക്ഷാ ഹാളില് താത്കാലിക ഓക്സിജന് സംവിധാനം ആരോഗ്യവകുപ്പ് ഒരുക്കിക്കൊടുക്കും.
അച്ഛന്റെ ഒക്കത്തേറി സ്കൂളില് പോയിത്തുടങ്ങിയ ലെത്തീഷ അറിയപ്പെടുന്ന കലാകാരിയാണ്. നന്നായി പാടും, ചിത്രം വരയ്ക്കും, ഓര്ഗന് വായിക്കും. മുറുകെ പിടിച്ചാല് അസ്ഥികള് ഒടിയും. അതിനാല് ഏറെ സൂക്ഷിച്ചു പിതാവ് അന്സാരി കരുതലോടെ എടുത്താണു മകളെ സ്കൂളിലെത്തിച്ചിരുന്നത്.
പ്ലസ്ടു എരുമേലി സെന്റ് തോമസ് സ്കൂളിലും, ബിരുദവും ബിരുദാനന്തരബിരുദവും എരുമേലി എംഇഎസ് കോളജിലുമായി പഠനം പൂര്ത്തിയാക്കി. പഠിക്കാന് എത്തിയിടത്തൊക്കെ ലെത്തീഷയ്ക്കായി പ്രത്യേക ഇരിപ്പിടമൊരുക്കിക്കൊടുത്തു. മാതാപിതാക്കളുടെയും അധ്യാപകരുടെയും സഹപാഠികളുടെയും പ്രോത്സാഹനമാണ് എന്നും ലെത്തീഷയുടെ കൈമുതല്.
എല്ലാ വേദനകളെയും പുഞ്ചിരിയോടെ നോക്കിക്കാണുന്ന ലെത്തീഷയ്ക്ക് ശ്വസനസഹായി കൂടിയേ തീരൂ. ഇതിനായി യാത്രയില് സൂക്ഷിക്കാവുന്നതും ഇരിപ്പിടത്തില് ബന്ധിപ്പിക്കാവുന്നതുമായ ഒരു ഓക്സിജന് ബാഗ് തരപ്പെടുത്തിക്കൊടുക്കാമെന്നു മുഖ്യമന്ത്രിയുടെ ഉറപ്പ് ലഭിച്ചിട്ടുണ്ട്. കോട്ടയം ജില്ലാ കളക്ടര് പി.ആര്. സുധീര് ബാബു ഇതിനായി നടപടി ഏര്പ്പാടാക്കുകയും ചെയ്തു. എരുമേലി സര്വീസ് സഹകരണ ബാങ്കിലെ താത്കാലിക ജീവനക്കാരിയാണ് നിലവില് ലെത്തീഷ.
https://www.facebook.com/Malayalivartha