നിര്ധനരുടെ വിശപ്പടക്കാന് ജില്ലാ ഭരണകൂടം ആവിഷ്ക്കരിച്ച പദ്ധതി: 'നുമ്മ ഊണ്', ഒരു ലക്ഷത്തിലധികം പേര്ക്ക് സൗജന്യഭക്ഷണം നല്കി
എറണാകുളം കലക്ടര് മുഹമ്മദ് സഫിറുല്ല പഴമക്കാരുടെ ഉപദേശം അക്ഷരാര്ഥത്തില് നടപ്പാക്കുകയാണ്. വിശക്കുന്നവര്ക്ക് ഊണ് കൊടുക്കാനായില്ലെങ്കില് ഊട്ടു പുരയെങ്കിലും കാട്ടിക്കൊടുക്കണമെന്നാണ് പഴമക്കാരുടെ ഉപദേശം. എറണാകുളം ജില്ലാ ഭരണകൂടം ഒരു വര്ഷം കൊണ്ടു 'നുമ്മ ഊണ്' പദ്ധതിയിലൂടെ വിശപ്പൊടുക്കിയത് ഒരു ലക്ഷത്തിലധികം പേര്. ഇവരെല്ലാം കയ്യില് കാശില്ലാതെ വിശന്നു വലഞ്ഞവര്.
'നുമ്മ ഊണ്' പദ്ധതി പെട്രോനെറ്റ് എല്എന്ജി ഫൗണ്ടേഷന്റെയും കേരള ഹോട്ടല് ആന്ഡ് റസ്റ്ററന്റ് അസോസിയേഷന്റെയും സഹകരണത്തോടെയാണ് നടപ്പാക്കുന്നത്.
സൗജന്യ ഉച്ചഭക്ഷണത്തിനുള്ള കൂപ്പണ്, എറണാകുളം ജില്ലയിലെ ആള്ത്തിരക്കുള്ള കേന്ദ്രങ്ങളില് വിതരണം ചെയ്യുന്നതാണു പദ്ധതി. ഈ കൂപ്പണ് സമീപത്തെ ഹോട്ടലുകളില് നല്കിയാല് ഭക്ഷണം ലഭിക്കും. കലക്ടറേറ്റ് ഉള്പ്പെടെയുള്ള സര്ക്കാര് ഓഫിസുകള്, റെയില്വേ സ്റ്റേഷനുകള്, ബസ് സ്റ്റാന്ഡുകള്, ആശുപത്രികള് എന്നിവിടങ്ങളിലാണു സൗജന്യ ഭക്ഷണ കൂപ്പണ് നല്കുന്നത്.
കൂപ്പണുമായി ചെല്ലുന്നവര്ക്കു സൗജന്യ ഭക്ഷണം നല്കാന് 20 ഹോട്ടലുകളെ ചുമതലപ്പെടുത്തി. ഹോട്ടലുകാര് കൂപ്പണ് ഹാജരാക്കുമ്പോള് ഊണിന്റെ വില ജില്ലാ ഭരണകൂടം നല്കും. പല ആവശ്യങ്ങള്ക്കായി വരുന്ന പൊതുജനങ്ങളില് സാമ്പത്തിക ശേഷി കുറഞ്ഞവര്ക്കാണു സൗജന്യ ഉച്ചഭക്ഷണം.
കൈവശം പണമില്ലാത്തതിനാല് ഉച്ചഭക്ഷണം കഴിക്കാത്ത ഒട്ടേറെ പേര് സര്ക്കാര് ഓഫിസുകളിലും മറ്റും, പല ആവശ്യങ്ങള്ക്കു കാത്തു നില്ക്കേണ്ടി വരുന്നതു ശ്രദ്ധയില്പ്പെട്ടതിനെത്തുടര്ന്നാണു കലക്ടര് മുന്കയ്യെടുത്തു നുമ്മ ഊണ് പദ്ധതിക്കു രൂപം നല്കിയത്.
യാത്രാച്ചെലവിനുള്ള ചില്ലറത്തുട്ടുകള് തപ്പിയെടുത്തു പല കാര്യങ്ങള്ക്കായി പുറത്തേക്കിറങ്ങുന്ന നിര്ധനരുടെ വിശപ്പടക്കാന് ജില്ലാ ഭരണകൂടം ആവിഷ്ക്കരിച്ച പദ്ധതിയുടെ മേന്മ രാഷ്ട്രപതി ഭവന് വരെയെത്തി. കലക്ടര് മുഹമ്മദ് സഫിറുല്ലയെ രാഷ്ട്രപതി ഭവനില് ക്ഷണിച്ചു വരുത്തിയാണ് അഭിനന്ദിച്ചത്. നുമ്മ ഊണ് പദ്ധതിയെക്കുറിച്ച് അറിഞ്ഞ രാഷ്ട്രപതിയുടെ സെക്രട്ടറി സഞ്ജയ് ഗോത്താരിയാണു കലക്ടറെ രാഷ്ട്രപതി ഭവനിലേക്കു വിളിപ്പിച്ചത്.
ആശയം രൂപപ്പെട്ടതും സ്പോണ്സര്മാരുടെ സഹകരണത്തോടെ അതു നടപ്പാക്കിയ രീതിയുമെല്ലാം കലക്ടര് വിശദീകരിച്ചു. കൂപ്പണുമായി ചെല്ലുന്നവര്ക്കു ഭക്ഷണം പാഴ്സലായി നല്കാതെ ഹോട്ടലില് തന്നെ കഴിക്കാന് സൗകര്യം നല്കണമെന്നു നിര്ദേശിച്ചിട്ടുണ്ട്. ഉള്ളവനും ഇല്ലാത്തവനും ഒരേ മേശയില് ഭക്ഷണം കഴിക്കണമെന്ന കാഴ്ചപ്പാടാണ് ഇതിനു പിന്നില്.
'നുമ്മ ഊണ്' പദ്ധതി ആദ്യം ഏര്പ്പെടുത്തിയത് കലക്ടറേറ്റിലാണ്. ഉച്ച ഭക്ഷണം കഴിക്കാന് കയ്യില് പണമില്ലാത്തവര്ക്കു കലക്ടറേറ്റ് കൗണ്ടറില് നിന്നു സൗജന്യ കൂപ്പണ് നല്കിത്തുടങ്ങിയതു 2018 ഫെബ്രുവരി ഒന്നു മുതലായിരുന്നു. കലക്ടറേറ്റ് കന്റീനിലും സമീപത്തെ അളകാപുരി ഹോട്ടലിലും കൂപ്പണുമായി ചെന്നാല് ഉച്ചഭക്ഷണം സൗജന്യം. അതേ ആഴ്ച തന്നെ എറണാകുളം സൗത്ത് റെയില്വേ സ്റ്റേഷനിലും നുമ്മ ഊണ് പദ്ധതി നടപ്പാക്കി. ഇവിടത്തെ ആര്യാസ് ഹോട്ടല്, ആര്യാഭവന്, മുഗള് ഹോട്ടല് എന്നിവിടങ്ങളില് കൂപ്പണുമായി ചെല്ലുന്നവര്ക്കാണു സൗജന്യ ഭക്ഷണം.
പണമില്ലാത്തതിന്റെ പേരില് വിശന്നു വലയരുതെന്ന കാഴ്ച്ചപ്പാടാണു പദ്ധതിക്കു പിന്നിലുള്ളത്. ഒട്ടേറെ പേര്ക്കു ഇതു പ്രയോജനം ചെയ്യുന്നുണ്ട്. 'നുമ്മ ഊണ്' പദ്ധതി കൂടുതല് കേന്ദ്രങ്ങളിലേക്കു വ്യാപിപ്പിക്കാനുള്ള ചര്ച്ച നടക്കുകയാണ്. വിശപ്പ് രഹിത ജില്ലയാണു ലക്ഷ്യം.
കാക്കനാട് നുമ്മ ഊണ് പദ്ധതി തുടങ്ങിയ 2018 ജനുവരി 26 മുതല് ഏപ്രില് 30 വരെ സൗജന്യ കൂപ്പണ് വഴി ഉച്ചഭക്ഷണം കഴിച്ചവര് 6,000 പിന്നീടുള്ള മാസങ്ങളില് കൂപ്പണ് വാങ്ങിയവരുടെ എണ്ണം: മേയ് 2,349, ജൂണ് 6,770, ജൂലൈ 9,746, ഓഗസ്റ്റ് 8,765, സെപ്റ്റംബര് 8,589, ഒക്ടോബര് 9,086, നവംബര് 9,540, ഡിസംബര് 9,738, ഈ വര്ഷം ജനുവരി 9,433, ഫെബ്രുവരി 9,356, മാര്ച്ച് 10,752. ആകെ 1,00,124.
കൂപ്പണ് വിതരണ കേന്ദ്രങ്ങള്
കലക്ടറേറ്റ്
താലൂക്ക് ഓഫിസുകള്
കണയന്നൂര്, കൊച്ചി,
കുന്നത്തുനാട്, പറവൂര്,
മൂവാറ്റുപുഴ
പെരുമ്പാവൂര്, അങ്കമാലി
മുനിസിപ്പല് ഓഫിസുകള്
കെഎസ്ആര്ടിസി
സ്റ്റാന്ഡുകള്
എറണാകുളം, ആലുവ, മൂവാറ്റുപുഴ
റെയില്വേ സ്റ്റേഷനുകള്
എറണാകുളം സൗത്ത്,
നോര്ത്ത്, അങ്കമാലി
പിറവം, മട്ടാഞ്ചേരി
ഗവ.ആശുപത്രികള്
പൂണിത്തുറ (വൈറ്റില)
വില്ലേജ് ഓഫിസ്
കോതമംഗലം പൊലീസ്
എയ്ഡ് പോസ്റ്റ്.
ഭക്ഷണം ലഭിക്കുന്ന ഹോട്ടലുകള്
കാക്കനാട്: കലക്ടറേറ്റ് കന്റീന്, അളകാപുരി ഹോട്ടല്
എറണാകുളം സൗത്ത്:
മുഗള് ഹോട്ടല്, ആര്യാസ് ഹോട്ടല്, ആര്യാഭവന്, ഗോകുല് ഊട്ടുപുര
എറണാകുളം നോര്ത്ത്:
റാം നിവാസ് ഹോട്ടല്,
ബ്ലൂസ്റ്റാര് ഹോട്ടല്
എറണാകുളം കെഎസ്ആര്ടിസി: അമ്പാടി ഹോട്ടല്,
ഡീലക്സ് ഹോട്ടല്
വൈറ്റില: മുരുകാ ഹോട്ടല്,
നാലുകെട്ട് ഹോട്ടല്
മട്ടാഞ്ചേരി: പിപി ഹോട്ടല്,
സ്വാദ് റസ്റ്ററന്റ്
കൊച്ചി:
കുന്നംപുറം അങ്കിള്സ് റസ്റ്ററന്റ്, ലക്കി സ്റ്റാര് ഹോട്ടല്
വൈപ്പിന്: ടോപ് ഹോം ഹോട്ടല്, ആല്വിന് ഹോട്ടല്
പെരുമ്പാവൂര്: കുടുംബശ്രീ കന്റീന്, മലബാര് പാലസ്,
രാജലക്ഷ്മി ഹോട്ടല്,
ഇന്ദ്രപ്രസ്ഥ ഹോട്ടല്
പറവൂര്: ഹോട്ടല് സ്വാഗത്,
ഷേണായിസ് ലഞ്ച് ഹോം
ആലുവ: സാഗര് ഹോട്ടല്,
താഹൂര് ഹോട്ടല്
മൂവാറ്റുപുഴ: ഭാരത് ഹോട്ടല്,
പാലസ് ഹോട്ടല്,
സിറ്റി ഹോട്ടല്, നാന ഹോട്ടല്,
മഹാറാണി ഹോട്ടല്
കോതമംഗലം: ഹോട്ടല് മേള, ഹോട്ടല് ശ്രീ കൃഷ്ണ
അങ്കമാലി: ഹോട്ടല് ശരവണ, ഹോട്ടല് ചിപ്പീസ്,
നെല്വയല് ഹോട്ടല്,
ഈഡന് പാര്ക്ക് ഹോട്ടല്
പിറവം: ഐശ്വര്യ ഹോട്ടല്
https://www.facebook.com/Malayalivartha