കടലക്കച്ചവടം എന്ന ഹോട്ട് ജോബ്! മാസം 72,000 രൂപ വരെ വരുമാനം
ചെറിയൊരു ഗ്യാസ് സിലിണ്ടറും കുറച്ചു പേപ്പര്കെട്ടുകളുമായി ചട്ടിയില് ചട്ടുകം തട്ടുന്ന ശബ്ദവുമായി ഒരു ഉന്തുവണ്ടി കടന്നുപോകുന്നത് നാമൊക്കെ വഴിയോരത്തും ബസ് സ്റ്റാന്ഡിലുമൊക്കെ നില്ക്കുമ്പോഴത്തെ സ്ഥിരം നഗരക്കാഴ്ചകളില് ഒന്നാണല്ലോ? അതെ... കടലക്കച്ചവടക്കാരനെ കുറിച്ചു തന്നെയാണ് പറഞ്ഞുവരുന്നത്.
പ്രസന്നഭാവത്തോടെയല്ലാതെ കടലക്കച്ചവടക്കാരെ കാണാന് കിട്ടില്ല. മനം നിറഞ്ഞിങ്ങനെ ചിരിക്കാന് അവര്ക്ക് കഴിയുന്നതെന്തുകൊണ്ടെന്ന് അറിയാമോ? ജോലിയുള്ളൊരാള്ക്ക് നല്ല വരുമാനമില്ലെങ്കില് ഇങ്ങനെ ചിരിക്കുമോ? അങ്ങനെ ചിന്തിക്കുമ്പോഴാണ് നാട്ടില് പറയുന്നൊരു തമാശയുടെ പ്രസക്തി മനസ്സിലാകുന്നത്. അംബാനി മലയാളിയാണെങ്കില്, എന്തുണ്ട് വിശേഷമെന്നു ചോദിച്ചാല്, ഓ അങ്ങനെ തട്ടിമുട്ടിയൊക്കെ പോകുന്നു, എന്ന് മറുപടി പറയുമെന്ന്! ചുരുക്കത്തില് ലോകത്തിലെ ഏറ്റവും വലിയ സമ്പന്നന്മാരെന്ന് നമ്മള് കരുതുന്നവരെല്ലാം ധനസമൃദ്ധിയില് കണ്ണുമടച്ച് അര്മാദിക്കുന്നവരാണെന്ന് കരുതരുത്, അവരുടെ പാട് അവര്ക്കേ അറിയൂ എന്നാണ് വ്യംഗം. തട്ടിമുട്ടിയൊക്കെയങ്ങ് കഴിഞ്ഞുകൂടുന്നു എന്ന ഈ മനോഭാവം പക്ഷേ, കടല കച്ചവടക്കാരില് കാണാനാകില്ല. അതിന്റെ കാരണമറിയണോ?
കേട്ടോളൂ.. ഒരു കിലോ പച്ചക്കടലയ്ക്ക് വില, ഒരു 80 മുതല് 95 രൂപയോളം വരും. ഒരു ദിവസം ഏകദേശം 10 കിലോയോളം പച്ചക്കടല വറുത്തെടുത്തു വില്ക്കുന്നു. അതായത്, 900 രൂപയുടെ കച്ചവടം. ഒരു പൊതി 50 ഗ്രാമോളമേ വരൂ. അതിനു 10 രൂപ. അതായത് ഒരു കിലോ പച്ചക്കടലയില് നിന്നും ശരാശരി 20 പൊതി കിട്ടും. അതു വിറ്റാല് കിട്ടുന്നത് 200 രൂപ! ചുരുക്കത്തില് എണ്പതോ തൊണ്ണൂറ്റിയഞ്ചോ രൂപ ചെലവ് ചെയ്ത് കടല വാങ്ങിവറുത്ത് വിറ്റാല് കിട്ടുന്നത് 200 രൂപ! കടലക്കച്ചവടം ഒരു ഹോട്ട് ജോബ് ആണെന്ന് ആരും സമ്മതിച്ചുതരും!
ഇതില് ഗ്യാസ്, പേപ്പര് എന്നീ ചെലവുകള് കിഴിച്ചാല് ഒരു കിലോയില് 50 രൂപയേ ലാഭം കിട്ടൂവെന്നാണ് കടക്കാരന് പറയുന്നത്. ആ കണക്കത്ര കാര്യമായെടുക്കേണ്ട, കാരണം ഒരു കിലോ പഴയ പേപ്പറിന് 15 രൂപയോളമേ വിലയുള്ളൂ. ഒരു കിലോ പേപ്പറൊന്നും വേണ്ടല്ലോ അവര്ക്ക് ഒരുദിവസം കടല പൊതിയാന്! അതുകൊണ്ട് നമുക്കൊരു 80 രൂപ ലാഭം കണക്കാക്കാം. അതായത് 10 കിലോ വിറ്റാല് കിട്ടുന്നത് 800 രൂപ! ഒരു ദിവസം 30 കിലോ കടല വരെ വില്ക്കുന്നവരുണ്ട്. അപ്പോള് കണക്ക് വീണ്ടും മാറുന്നു. ദിവസ ലാഭം 2,400 രൂപയാകും!
ഇനി ആ രീതിയില് മാസവരുമാനമൊന്ന് കണക്കാക്കിനോക്കിയാലോ? മാസം 30 ദിവസവും കടല വിറ്റാല് വരുമാനം 72,000 രൂപ! അഞ്ചുദിവസം ലീവെടുത്താല്പോലും 60,000 രൂപ വരുമാനം കിട്ടും. സാധാരണക്കാരില് ആര്ക്കുണ്ട് ഇത്രയും മാസവരുമാനം? കടലക്കച്ചവടക്കാരെ സാധാരണക്കാരെന്നാണ് നാമൊക്കെ പറയുന്നത്, അല്ലാതെ ധനാഢ്യരെന്ന് ഒന്നുമല്ലെന്ന കാര്യവും മറക്കരുത്!
കൊതിപ്പിക്കുന്ന രണ്ടാമത്തെ കാര്യം ജോലി സമയമാണ്. പലരും ഉച്ചകഴിഞ്ഞേ കച്ചവടം തുടങ്ങൂ. 3 മണി മുതല് രാത്രിയൊരു 8-9 മണി വരെ. 5-6 മണിക്കൂര് ജോലി. ജോലിക്കാരനും കടയുടമയും എല്ലാം ഒരാള് തന്നെയെന്നതിനാല് ആരെയും കാക്കുകയോ ആരോടും ചോദിക്കുകയോ പറയുകയോ വേണ്ടാതാനും! എന്താ, കടലക്കച്ചവടം ജോറാണെന്ന് തോന്നുന്നില്ലേ?
https://www.facebook.com/Malayalivartha