വരാനിരിക്കുന്ന കളികള്... ശ്രീകുമാര് മേനോന് തന്നെ അപായപ്പെടുത്തുമെന്ന് ഭയക്കുന്നുവെന്ന് മഞ്ജുവാര്യര് പരാതിപ്പെടുമ്പോള് യഥാര്ത്ഥത്തില് ഞെട്ടിയത് മലയാളികള്; പരസ്യത്തിന്റെ രാജാവായ ശ്രീകുമാര് മേനോനും സിനിമയിലെ രാജകുമാരിയുമായ മഞ്ജുവാര്യരും ഏറ്റുമുട്ടുമ്പോള്
ശ്രീകുമാര് മേനോന് തന്നെ അപായപ്പെടുത്തുമെന്ന് ഭയക്കുന്നുവെന്ന് മലയാള സിനിമയിലെ ലേഡി സൂപ്പര് സ്റ്റാര് മഞ്ജു വാര്യര് ഡി ജി പി യ്ക്ക് പരാതിയുമായി എത്തിയപ്പോള് യഥാര്ത്ഥത്തില് ഞെട്ടിയത് മലയാളികളാണ്. ഏറ്റവുമടുത്ത പരസ്യ രംഗത്തെ അതികായനും സിനിമാ രംഗത്തെ ലേഡി സൂപ്പര് സ്റ്റാറും പരസ്പരം ഏറ്റുമുട്ടുകയാണ്.
പരസ്യചിത്ര സംവിധായകന്, ചലച്ചിത്ര സംവിധായകന് എന്നീ നിലകളില് പ്രശസ്തനായ വി എ ശ്രീകുമാര് മേനോന് എതിരെയാണ് താരം എത്തിയിരിക്കുന്നത്. കല്യാണിന്റെ പരസ്യങ്ങളിലൂടെയാണ് പരസ്യചിത്ര രംഗത്ത് ശ്രീകുമാര് മേനോന് പ്രശസ്തനാവുന്നത്. അതേസമയം മലയാളികള്ക്കിടയില് ശ്രീകുമാര് മേനോന് പ്രശസ്തനാവുന്നത് ദിലീപ് മഞ്ജു വാര്യര് കുടുംബ പ്രശ്നങ്ങളോടെയാണ് എന്നത് ശ്രദ്ദേയം.
പുഷ് ഇന്റഗ്രറ്റഡ് കമ്മ്യൂണിക്കേഷന്സ് ആയിരുന്നു ശ്രീകുമാര് മേനോന്റെ പരസ്യകമ്പനിയുടെ പേര്. പരസ്യകല, ബ്രാന്ഡിങ്ങ്, സ്ട്രാറ്റജിക് കണ്സള്ട്ടിങ്ങ്, പബ്ലിക് റിലേഷന്സ്, ഡിജിറ്റല് ഈവന്റ്സ്, സെലിബ്രറ്റി മനേജ്മെന്റ്, എന്റര്റ്റെയിന്മെന്റ് ഇന്ഫ്രാസ്ട്രക്ചര് വികസന മേഖലകളിലായിരുന്നു ഈ കമ്പനി പ്രവര്ത്തിച്ചിരുന്നത്. ഒരു കാലത്ത് അമിതാഭ് ബച്ചന്, സച്ചിന് ടെന്റുല്ക്കര്, പുനീത് രാജ്കുമാര്, ചിരഞ്ജീവി തുടങ്ങി ഒട്ടനവധി സൂപ്പര് താരങ്ങളുടെ ബ്രാന്റ് കൈകാര്യം ചെയ്തിരുന്നത് ശ്രീകുമാര് ആയിരുന്നു.
സിനിമകളില് മാത്രമല്ല സാമൂഹിക വിഷയങ്ങളിലും ശ്രീകുമാര് മുന്പന്തിയില് തന്നെയാണ് . ശബരിമലയില് യുവതി പ്രവേശം അനുവദിച്ച സുപ്രീംകോടതി വിധിയില് നിലപാട് വ്യക്തമാക്കിയും സംവിധായകന് ശ്രീകുമാര് മേനോന് എത്തിയിരുന്നു . ശബരിമലയില് യുവതികള് പോകരുത് എന്ന് വിശ്വസിക്കുന്നവരാണ് കേരളത്തിലെ ഭൂരിഭാഗം സ്ത്രീകളെന്നും അവര്ക്കൊപ്പമാണ് താന് എന്ന് ശ്രീകുമാര് മേനോന് വ്യക്തമാക്കിയിരുന്നു . 28 പ്രാവശ്യം മല ചവിട്ടിയിട്ടുണ്ടെന്നും പറയുന്നു.
മോഹന്ലാലിനെ നായകനാക്കി ഒരുക്കിയ ഒടിയന് ആണ് സംവിധാനം ചെയ്ത ആദ്യ മലയാള ചിത്രം. ഈ സിനിമയില് മഞ്ജു പ്രധാന വേഷം ചെയ്തിരുന്നു . ആശീര്വാദ് സിനിമാസിന്റെ ബാനറില് ആന്റണി പെരുമ്പാവൂരാണ് ബ്രഹ്മാണ്ഡ ചിത്രം നിര്മ്മിച്ചത്. എന്നാല് ഈ സിനിമയെ തുടര്ന്നാണ് ട്വിസ്റ്റ് വന്നിരിക്കുന്നത്. തന്റെ ലെറ്റര് ഹെഡും രേഖകളും ദുരുപയോഗപ്പെടുത്തുമെന്നു ഭയമുണ്ടെന്നും മഞ്ജു വാര്യര് പരാതിയില് പറയുന്നു. ഒടിയന് ശേഷമുള്ള സൈബര് ആക്രമണത്തിന് പിന്നില് ശ്രീകുമാര് മേനോനാണ്. തനിക്കെതിരെ ചിലര് സംഘടിതമായ നീക്കം നടത്തുന്നുവെന്നും മഞ്ജു വാര്യര് പരാതിയില് പറയുന്നു.
മഞ്ജുവിന്റെ പരാതിയ്ക്കെതിരെ ശ്രീകുമാര് മേനോന് ശക്തമായ ഭാഷയിലാണ് പ്രതികരിച്ചത്. എന്നാലും എന്റെ പ്രിയപ്പെട്ട മഞ്ജു....നീ എന്താണ് ഈ ചെയ്തുകൊണ്ടിരിക്കുന്നത് എന്നാണ് ശ്രീകുമാര് മേനോന് ചോദിച്ചു. നിനക്കറിയാമല്ലോ നിന്റെ സുഹൃത്തുക്കളും ബന്ധുക്കളും ആയ എത്രപേര് എത്രപ്രാവശ്യം പറഞ്ഞു കാര്യം കഴിഞ്ഞാല് ഉപകാരം ചെയ്തവരെ ചവിട്ടി മെതിച്ചു പോകുന്നവളാണ് നീ എന്ന്. സ്നേഹപൂര്വവും നിര്ബന്ധപൂര്വവുമുള്ള സമ്മര്ദ്ദങ്ങളും, ഭീഷണികളും അതിജീവിച്ചുകൊണ്ട് നിനക്ക് കൂട്ടായി നിന്ന എന്നെ നീ തോല്പ്പിച്ചു കളഞ്ഞല്ലോ . ഞാന് നിനക്കായി കേട്ട പഴികള്, നിനക്കായി അനുഭവിച്ച വേദനകള്, നിനക്കായി കേട്ട അപവാദങ്ങള്. നിന്റെ കൂടെ, പറഞ്ഞ വാക്ക് കാക്കുവാന് ഉറച്ചു നിന്നപ്പോള് ഉണ്ടായ ശത്രുക്കള്, നഷ്ടപെട്ട ബന്ധങ്ങള്. എന്റെ ബുദ്ധിയിലും സ്നേഹത്തിലും നീ ഉണ്ടാക്കി കൂട്ടിയ നേട്ടങ്ങള്, എല്ലാം നീ എത്ര വേഗമാണ് മറന്നതെന്നും ശ്രീകുമാര് മേനോന് ചോദിക്കുന്നു.
അതേസമയം ഈ സംഭവത്തില് ഒരു വമ്പന് ട്വിസ്റ്റാണ് പ്രതീക്ഷിക്കുന്നത്. മഞ്ജുവിന് പിന്തുണയുമായി ആരെല്ലാം എത്തും, സംവിധായകന് പിന്തുണയുമായി ആരെല്ലാം എത്തുമെന്നും കാത്തിരുന്ന് കാണാം. സിനിമ ലോകത്ത് സ്ത്രീകളുടെ പ്രശ്നം ഏറ്റെടുക്കുന്ന ഡബ്ലിയുസിസി മഞ്ജുവിന് പിന്തുണയുമായി എത്തുമോ എന്നും കണ്ടറിയാം.
"
https://www.facebook.com/Malayalivartha