വന്യമൃഗങ്ങളുടെ സഞ്ചാരകഥകളില്‍, ഇന്ത്യയില്‍ ഇതുവരെ രേഖപ്പെടുത്തപ്പെട്ട ഏറ്റവും ദൈര്‍ഘ്യമേറിയ യാത്ര നടത്തിയ കഥ രണ്ടര വയസ്സുള്ള ഈ ആണ്‍ കടുവയുടേതാണ്. സ്വന്തമേധാവിത്വം സ്ഥാപിയ്ക്കാവുന്ന പ്രദേശം തേടിയാണോ, ഇര തേടിയാണോ ഈ യാത്ര എന്ന് ഇനിയും വ്യക്തമായിട്ടില്ല.

മഹാരാഷ്ട്രയിലെ അതിന്റെ വാസസ്ഥലമായിരുന്ന വന്യമൃഗ സംരക്ഷണ കേന്ദ്രത്തില്‍ നിന്നും ഇക്കഴിഞ്ഞ ജൂണിലാണ് ഈ വരയന്‍ പുലി യാത്ര ആരംഭിച്ചത്. ഈ മൃഗത്തില്‍ ഒരു റേഡിയോ കോളര്‍ ഘടിപ്പിച്ചിട്ടുള്ളതിനാല്‍ ഇത് എവിടെയാണുള്ളതെന്ന് എപ്പോള്‍ വേണമെങ്കിലും കണ്ടു പിടിയ്ക്കാനാവും. അങ്ങനെയാണ് വയലേലകളും, ജലപാതകളും, ഹൈവേകളും താണ്ടി ഈ കടുവ അയല്‍ സംസ്ഥാനം വരെ സഞ്ചാരം നടത്തിക്കഴിഞ്ഞു എന്ന് കണ്ടെത്തിയത്. കഴിഞ്ഞ അഞ്ചു മാസത്തെ സഞ്ചാരത്തിനിടയില്‍ ഒരേ ഒരു പ്രാവശ്യമാണ് മനുഷ്യരുമായി സംഘര്‍ഷം ഉണ്ടായ സാഹചര്യമുണ്ടായത്. അവന്‍ വിശ്രമിച്ചിരുന്ന കുറ്റിക്കാട്ടിനുള്ളിലേയ്ക്ക് പ്രവേശിയ്ക്കാന്‍ ശ്രമിച്ച സംഘത്തിലെ ഒരാളിനാണ് അബദ്ധത്തില്‍ പരുക്കേറ്റത്.

മഹാരാഷ്ട്രയിലെ തിപേശ്വര്‍ വന്യ മൃഗ സംരക്ഷണ കേന്ദ്രത്തിലെ ടി -വണ്‍ എന്ന് പേരിട്ടിട്ടുള്ള ഒരു പെണ്‍ കടുവയ്ക്ക് ജനിച്ച മൂന്ന് ആണ്‍ കടുവക്കുഞ്ഞുങ്ങളില്‍ ഒരാളാണ് സി-വണ്‍ എന്ന് പേരുള്ള ഈ സഞ്ചാരിക്കടുവ. ഇക്കഴിഞ്ഞ ഫെബ്രുവരിയില്‍ തിപേശ്വര്‍ വന്യ മൃഗ സംരക്ഷണ കേന്ദ്രത്തില്‍ വച്ചാണ് ഇതിന് റേഡിയോ കോളര്‍ ഘടിപ്പിച്ചത്. അടുത്തിടെ മണ്‍സൂണിന്റെ ആരംഭത്തോടെയാണ് , അതുവരെ വന്യ മൃഗ സങ്കേതത്തിന്റെ കാട്ടിലും മേട്ടിലും ചുറ്റിനടന്നിരുന്ന സി -വണ്‍, അനുയോജ്യമായ വാസ സ്ഥലം തേടി ഇറങ്ങി പുറപ്പെട്ടത്. ജൂണ്‍ അവസാനത്തോടെ സങ്കേതം വിട്ടിറങ്ങിയ അവന്‍ ഇത് വരെ മഹാരാഷ്ട്രയുടെ ഏഴ് ജില്ലകളും താണ്ടി അയല്‍ സംസ്ഥാനമായ തെലങ്കാനയില്‍ എത്തിയിട്ടുണ്ട്. ആദ്യ ആഴ്ചയുടെ അവസാനം മഹാരാഷ്ട്രയിലെ തന്നെ മറ്റൊരു വന്യ മൃഗ സങ്കേതത്തിന്റെ വനപ്രദേശത്ത് അവന്‍ കാണപ്പെട്ടിരുന്നു.

സി - വണ്ണിന്റെ സഞ്ചാരപഥം നേര്‍ രേഖയിലല്ല എന്നാണ് നിരീക്ഷണത്തില്‍ നിന്നും മനസ്സിലാകുന്നത് എന്നാണ് വന്യ മൃഗ സങ്കേത അധികൃതര്‍ പറയുന്നത് . ജി പി എസ് സാറ്റലൈറ്റ് വഴി ലഭ്യമാകുന്ന വിവരങ്ങള്‍ ഓരോ മണിക്കൂറിലും പരിശോധിച്ചാണ് പ്രസ്തുത വരയന്‍ പുലിയുടെ അതാത് സമയത്തെ സാന്നിധ്യം മനസ്സിലാക്കിയിരുന്നത്. റേഡിയോ കോളര്‍ ഘടിപ്പിച്ച ശേഷമുള്ള കഴിഞ്ഞ 9 മാസത്തിനിടയില്‍ ഇത്തരത്തിലുള്ള 5000-ത്തോളം വരുന്ന ഡാറ്റാ ലഭ്യമായിട്ടുണ്ട്.

ഇത്തരത്തില്‍ ഒരു യാത്ര നടത്തുന്നത് ഭക്ഷണമോ, അനുയോജ്യമായ വാസ സ്ഥലമോ, ഇണയേയോ തേടിയാവണം എന്നാണ് വൈല്‍ഡ് ലൈഫ് ഇന്‍സ്റ്റിറ്റ്യൂട്ട് ഓഫ് ഇന്ത്യയിലെ സീനിയര്‍ ബയോളജിസ്റ്റ് ആയ ഡോക്ടര്‍ ബിലാല്‍ ഹബീബ് പറയുന്നത്. സാധാരണയായി ഇന്ത്യയിലെ പുള്ളി പുലികളുടെ ആവാസ മേഖല ഇപ്പോള്‍ ഏറെക്കുറെ നിറഞ്ഞു കഴിഞ്ഞു. അതിനാല്‍ പുതുതായി എത്തുന്ന കടുവകള്‍ പുതിയ ഇടം തേടിയാലേ പറ്റുകയുള്ളൂ എന്നതാണ് സ്ഥിതി എന്ന് അദ്ദേഹം തുടര്‍ന്ന് പറഞ്ഞു.

പകല്‍ സമയങ്ങളില്‍ ഒളിഞ്ഞിരിയ്ക്കുകയും കാട്ടുപന്നികളെയും കന്നുകാലികളെയും ആഹാരമാക്കി കൊണ്ട് രാത്രി കാലങ്ങളില്‍ മാത്രം സഞ്ചാരം നടത്തുകയും ചെയ്യുന്നത്് ആയിരുന്നു ഇതിന്റെ രീതി . അബദ്ധത്തില്‍ ഒരാളെ പരുക്കേല്‍പ്പിയ്ക്കേണ്ടി വന്ന ആ സാഹചര്യം ഒഴിച്ചാല്‍ മനുഷ്യരുമായി ഗൗരവകരമായ സംഘര്‍ഷം ഉണ്ടായ സാഹചര്യങ്ങള്‍ ഒന്നും ഈ വരയന്‍ പുലിയുടെ സഞ്ചാരകാലത്ത് ഉണ്ടായിട്ടില്ല എന്നും ഡോക്ടര്‍ ഹബീബ് ഉറപ്പിച്ചു പറഞ്ഞു.

തങ്ങളുടെ പിന്നാമ്പുറത്തു കൂടി ഇത്തരത്തില്‍ ഒരു കടുവ സഞ്ചാരം നടത്തുന്നുണ്ടെന്ന കാര്യം ഇതുവരെ ആരും അറിഞ്ഞിട്ടില്ല. എങ്കിലും എന്തെങ്കിലും പ്രതിസന്ധികള്‍ ഉണ്ടാകുന്നതിനു മുന്‍പ് ഇതിനെ വീണ്ടും പിടികൂടി, ഇപ്പോള്‍ അത് ഉള്ള പ്രദേശത്തിന് അടുത്തുള്ള ഏതെങ്കിലും ഉള്‍വനത്തിലേക്ക് കടത്തി വിടുന്നതാണ് നല്ലതെന്ന് വനം വകുപ്പ് അധികൃതര്‍ അഭിപ്രായപ്പെട്ടു.

അത് കൂടാതെ അതിന്മേല്‍ ഘടിപ്പിച്ചിട്ടുള്ള റേഡിയോ കോളറിന്റെ ബാറ്ററിയുടെ 80 %-ത്തോളം ഉപയോഗിച്ച് കഴിഞ്ഞതിനാല്‍ റേഡിയോ കോളര്‍ പ്രവര്‍ത്തനരഹിതമാകാനും സി -വണ്ണുമായി അധികൃതര്‍ക്കുള്ള സമ്പര്‍ക്കം നഷ്ടപ്പെടാനും സാധ്യത ഉണ്ട് എന്നും ആശങ്ക ഉണ്ട്. കടുവകളുടെ എണ്ണത്തില്‍ ഇപ്പോള്‍ ഇന്ത്യയില്‍ വര്‍ദ്ധനവ് ഉണ്ടായിട്ടുണ്ട് . എന്നാല്‍ അവയുടെ ആവാസ മേഖലയുടെ വ്യാപ്തി ചുരുങ്ങുകയാണ് ചെയ്തത്. അതുപോലെ തന്നെ അവയ്ക്ക് ഇരയും പഴയതു പോലെ ലഭ്യമല്ലാതായിട്ടുണ്ട്.

വേട്ടയാടപ്പെടാവുന്ന മൃഗങ്ങളുടെ 500 എണ്ണമെങ്കിലും ഉള്ളതും, പെറ്റു പെരുകി കൊണ്ടിരിയ്ക്കുന്നതുമായ ഒരു കൂട്ടം മൃഗങ്ങള്‍ എങ്കിലും ഭക്ഷണ ലഭ്യത ഉറപ്പാക്കുന്ന കരുതല്‍ ശേഖരം അഥവാ 'ഫുഡ് ബാങ്ക് ' പോലെ ഓരോ കടുവയ്ക്കും അതിന്റെ ആവാസ വ്യവസ്ഥിതിയില്‍ വേണം എന്നാണ് വിദഗ്ദര്‍ പറയുന്നത്.