ഈ അച്ഛനും അമ്മയും മനസ്സ് തുറന്നൊന്ന് ചിരിച്ചിട്ട് രണ്ടു വര്ഷവും മൂന്നു മാസവും!
ഒറ്റപ്പാലത്തെ തോട്ടക്കര വെട്ടുകാട്ടുതൊടിയില് രാജേഷ്കുമാര് (36)ശ്രുതി (26) ദമ്പതികള് കാത്തിരിക്കയാണ്, തങ്ങളുടെ രണ്ടു വയസ്സുള്ള മകന്റെ കുഞ്ഞു മുഖത്തൊരു പുഞ്ചിരി വിരിഞ്ഞു കാണാന്! പ്രായം, രണ്ടു വയസ്സും മൂന്നു മാസവും തികഞ്ഞെങ്കിലും ഈ കുഞ്ഞിനു കഴുത്തുറച്ചിട്ടു പോലുമില്ല. ഈ ദമ്പതികളുടെ മകന് അതുല് രാജ്, ജനിച്ചു ദിവസങ്ങള്ക്കുള്ളില് അപസ്മാരത്തിന്റെ ലക്ഷണങ്ങള് കാണിച്ചു തുടങ്ങി. ഇതിനു ചികിത്സ തുടരുന്നതിനിടെ ന്യുമോണിയ ബാധ.
തൃശൂര് മെഡിക്കല് കോളജ് ആശുപത്രിയിലും തിരുവനന്തപുരം ശ്രീചിത്ര ആശുപത്രിയിലുമായി തീവ്രപരിചരണ വിഭാഗത്തിലും വാര്ഡിലുമായി മാസങ്ങളോളം കിടന്നു. പരിശോധനകള് പലതു കഴിഞ്ഞു. തുടര്ച്ചയായ അപസ്മാരം തലച്ചോറില് സൃഷ്ടിക്കുന്ന പ്രശ്നങ്ങളും കുഞ്ഞിനെ ബാധിച്ചിട്ടുണ്ട്.
ഇപ്പോള് ദിവസവും അഞ്ചു തരം ഗുളികകളാണു രണ്ടു നേരങ്ങളിലായി കഴിപ്പിക്കുന്നത്. ദ്രവരൂപത്തില് ഭക്ഷണം. ശബ്ദങ്ങളോടു ചെറിയ തോതില് പ്രതികരിക്കും. അത്തരം ചില പ്രതികരണങ്ങളിലാണ് കുഞ്ഞു ചിരിച്ചെന്നു കുടുംബം ആശ്വാസം കണ്ടെത്തുന്നത്. മൂത്തമകന് അനഘ്രാജ്(5) യുകെജി വിദ്യാര്ഥി.
മരപ്പണിക്കാരനാണു രാജേഷ് കുമാര്. കുഞ്ഞിന്റെ ചികിത്സയ്ക്കും കുടുംബത്തിന്റെ ആവശ്യങ്ങള്ക്കും ആശ്രയം ആശാരിപ്പണിയില് നിന്നുള്ള വരുമാനം മാത്രം. ഈ ലോക്ഡൗണ് കാലത്തു പണിയും വരുമാനവും മുടങ്ങിയിരിക്കുന്നു-ഇതും ജീവിതമാണ്!
https://www.facebook.com/Malayalivartha