പുതുജീവന് പകര്ന്ന ഡോക്ടര്മാര്ക്കും പരിചരിച്ചവര്ക്കും സ്നേഹാഭിവാദ്യം പകര്ന്ന് ആനന്ദ വനജ ആശുപത്രി വിട്ടു
അമേരിക്കക്കാരിയായ സന്നദ്ധ പ്രവര്ത്തകയായ ആനന്ദ വനജ (59) കടുത്ത പനിയും മറ്റും ബാധിച്ചു തീര്ത്തും അവശനിലയില് കഴിഞ്ഞ 16-നാണ് കൊല്ലം റെയില്വേ സ്റ്റേഷനില് എത്തുന്നത്. ആരോഗ്യ പ്രവര്ത്തകര് ആംബുലന്സില് പാരിപ്പള്ളി മെഡിക്കല് കോളജ് ആശുപത്രിയില്പ്രവേശിപ്പിച്ചു. ആശുപത്രിയില് എത്തുമ്പോള് ഒരു ചുവടുപോലും നടക്കാന് കഴിയാത്ത അവസ്ഥയായിരുന്നു. കോവിഡ് ഇല്ലെന്ന് പരിശോധനയില് വ്യക്തമായെങ്കിലും ശ്വാസംമുട്ടല് ഉള്പ്പെടെയുള്ള മറ്റു രോഗങ്ങള് വല്ലാതെ വലച്ചു. തന്മൂലം പാരിപ്പള്ളി മെഡിക്കല് കോളജ് ആശുപത്രിയിലെ ഐസലേഷന് വാര്ഡില് പിന്നെയും കഴിയേണ്ടി വന്നു.
ആഴ്ചകള് നീണ്ട ചികിത്സയിലും പരിചരണത്തിലും രോഗങ്ങള് ഭേദമായി. ഇന്നലെ രാവിലെ ഡിസ്ചാര്ജ് ചെയ്തു. ഡോക്ടര്മാര്, നഴ്സുമാര്, മറ്റു ജീവനക്കാര് ചേര്ന്ന് ഊഷ്മളമായ യാത്രയയപ്പ് നല്കി. ചികിത്സയിലൂടെ പുതുജീവന് പകര്ന്ന ഡോക്ടര്മാര്ക്കും പരിചരിച്ചവര്ക്കും സ്നേഹാഭിവാദ്യം പകര്ന്ന് ആനന്ദ വനജ ആശുപത്രി വിട്ടു.
ഉറച്ച ചുവടുകള് മുന്നോട്ടു വയ്ക്കുമ്പോഴും ജീവിതത്തിലേക്ക് പിടിച്ചു കയറ്റിയവരെ തിരിഞ്ഞു നോക്കി കൈകള് വീശി, കണ്ണുകളില് നിന്ന് സ്നേഹാശ്രുകണങ്ങള് പൊഴിഞ്ഞു. ഇവിടെ നിന്ന് അട്ടപ്പാടിയിലേക്കാണ് വനജയുടെ യാത്ര. ജില്ലാ മെഡിക്കല് ഓഫിസില് നിന്ന് ഏര്പ്പെടുത്തിയ ആംബുലന്സിലാണ് യാത്ര തിരിച്ചത്.
വനജയുടെ മാതാപിതാക്കള് മാതാ അമൃതാനന്ദമയി ശിഷ്യരാണ്. അമൃതാനന്ദമയിയാണ് ആനന്ദ വനജ എന്ന പേരിട്ടത്.
https://www.facebook.com/Malayalivartha