എസ്ബിടി ജനറല്‍ മാനേജരായിരുന്ന നന്ദകുമാര്‍ 1996 മേയ് 23-നാണ് ലക്ഷണമൊത്ത കൊമ്പനെ ഗുരുവായൂരില്‍ നടയിരുത്തിയത്. കൊമ്പന്റെ ജനനം 1972-ല്‍ എന്നാണു രേഖ. ഉത്സവങ്ങളിലെ താരമാണു നന്ദന്‍. തൃശൂര്‍ പൂരത്തില്‍ പാറമേക്കാവിന്റെ കോലമെഴുന്നള്ളിക്കുന്ന കൊമ്പന്‍. 306 സെന്റിമീറ്റര്‍ ഉയരം. ഏഷ്യയിലെ ഏറ്റവും ഭാരമുള്ള ആന. 7100 കിലോ ഗ്രാം ഭാരം.

21 വര്‍ഷം മുന്‍പ് നന്ദന്റെ മുന്‍കാലില്‍ ചെറിയൊരു മുഴയും പഴുപ്പും കണ്ടു. പുന്നത്തൂര്‍ക്കോട്ടയില്‍ 1999 ഒക്ടോബര്‍ 5-ാം തീയതി മുഴ നീക്കാന്‍ ശസ്ത്രക്രിയ നടത്തിയപ്പോള്‍ അതിനുള്ളില്‍ ഒരു വെടിയുണ്ട. ഡോക്ടര്‍മാര്‍ക്ക് അദ്ഭുതമായി. ക്ഷേത്രത്തില്‍ നടയിരുത്തുമ്പോള്‍ വെടിയേറ്റതിന്റെ ലക്ഷണങ്ങള്‍ ശ്രദ്ധയില്‍ പെട്ടിരുന്നില്ല.

കാട്ടില്‍ കഴിയുമ്പോള്‍ നായാട്ടുകാരുടെ വെടിയേറ്റതാണോ? വെടിവച്ചത് കൊല്ലാനായിരുന്നോ, നാട്ടില്‍ കുറുമ്പുകാട്ടിയതിന് കിട്ടിയ ശിക്ഷയാണോ, അതുമറിയില്ല. മുന്നില്‍ നിന്നായിരുന്നു വെടി. കൊണ്ടതു വലത്തേ മുന്‍കാലിലും.

ഏതായാലും സര്‍ജറിക്കു ശേഷം നന്ദന് കാര്യമായ അസുഖങ്ങളൊന്നും ഉണ്ടായിട്ടില്ല. ഇപ്പോള്‍ പുന്നത്തൂര്‍ക്കോട്ടയില്‍ മദപ്പാടിലാണ് നന്ദന്‍.

നന്ദന്റെ കാലില്‍ നിന്നു വെടിയുണ്ട നീക്കിയ ദിവസം പുന്നത്തൂര്‍ക്കോട്ടയിലെ 'ഓപ്പറേഷന്‍ തിയറ്ററില്‍' 5 ശസ്ത്രക്രിയകള്‍ നടന്നു. കൊമ്പന്‍ ബാലുവിന്റെ പുറത്തെ വ്രണം ഉണങ്ങാന്‍ മേജര്‍ സര്‍ജറി. ഈ ആനയെ 2 മണിക്കൂര്‍ ബോധരഹിതനാക്കി 'കൗണ്ടര്‍ ഓപ്പണിങ് സര്‍ജറി' നടത്തി. ലക്ഷ്മണന്‍, ശങ്കരനാരായണന്‍, ദാമോദര്‍ദാസ് എന്നീ ആനകള്‍ക്കും അന്നാണ് ശസ്ത്രക്രിയ നടത്തിയത്. ഡോക്ടര്‍മാരായ കെ.സി.പണിക്കര്‍, മുരളീധരന്‍ നായര്‍, രാധാകൃഷ്ണ കൈമള്‍, പി.ബി.ഗിരിദാസ്, കണ്ണന്‍ മുത്തുമാണിക്യം എന്നിവര്‍ നേതൃത്വം നല്‍കി.