പുല്പള്ളി ആനപ്പന്തി കോളനിയിലെ ബിജുവിനും ഭാര്യയ്ക്കും തലനാരിഴയ്ക്ക് ജീവന് തിരികെക്കിട്ടി...കാട്ടാന തുമ്പിക്കൈയില് ചുറ്റിയെടുത്തതിന്റെ ഞെട്ടല് മാറാതെ രാധ!
പുല്പള്ളി ചീയമ്പം ആനപ്പന്തി കോളനിയില് കുടുംബാംഗങ്ങള്ക്കൊപ്പം ടിവി പരിപാടി കാണുന്നതിനിടെ ശുചിമുറിയില് പോകാനായി വീടിന്റെ പിന്വാതില് തുറന്നു പുറത്തിറങ്ങിയതായിരുന്നു രാധ. പരിസരത്തു വെളിച്ചമുണ്ടായിരുന്നില്ല. തിങ്കള് രാത്രി 11 മണിയോടെ പുറത്തിറങ്ങിയ ഭാര്യയുടെ കരച്ചില് കേട്ടെത്തിയ ബിജു കണ്ടത് കൊമ്പന്റെ തുമ്പിക്കൈയില് പിടയുന്ന ഭാര്യയെ. നിലവിളിച്ച് ഓടിയെത്തിയപ്പോള് രാധയെ വിട്ട് ആന ബിജുവിനുനേരെ തിരിഞ്ഞു.
ആനയുടെ തുമ്പിക്കൈ ദേഹത്തു തട്ടിയെങ്കിലും ബിജു തിരിഞ്ഞോടി അടുക്കളയില് കയറി പാത്രങ്ങളെടുത്തു കൊട്ടി ശബ്ദമുണ്ടാക്കി. ആന വീടിനരികിലേക്കു മാറിയതോടെ രാധ ഓടി വീടിനുള്ളില് കയറുകയായിരുന്നു. മുന്നോട്ടു നീങ്ങിയ ആന വീണ്ടും തിരിച്ചെത്തിയെങ്കിലും കുടുംബാംഗങ്ങളും സമീപത്തെ വീട്ടുകാരുമെല്ലാം ചേര്ന്നു ശബ്ദമുണ്ടാക്കിയതോടെ തേക്ക് കൂപ്പിലേക്കു നീങ്ങുകയായിരുന്നു.
വനപാലകര് വിവരമറിഞ്ഞു രാത്രിതന്നെ സ്ഥലത്തെത്തി. പഞ്ചായത്ത് അംഗം പ്രിയ മുരളി, ചീയമ്പം കോളനിയിലെ ഊരുമൂപ്പന് വി.വി.ബോളന് എന്നിവരും സ്ഥലത്തെത്തി. ഏതാനും ദിവസമായി ഈ കൊമ്പന് പരിസരത്തു ചുറ്റിനടക്കുന്നതായി കോളനിക്കാര് പറയുന്നു.
ആനപ്പന്തി കോളനിയിലും പരിസരത്തും രാത്രി പട്രോളിങ് ശക്തമാക്കുമെന്ന് വനംവകുപ്പ്. പ്രദേശത്ത് തൂക്കുവേലി സ്ഥാപിക്കുമെന്നും ചെതലയം റേഞ്ച് ഓഫിസര് അറിയിച്ചു.
പുല്പള്ളി, മുള്ളന്കൊല്ലി, പൂതാടി പഞ്ചായത്തുകളില് കൃഷിമേഖല പൂര്ണമായി തകര്ക്കുംവിധം കാട്ടാനശല്യം രൂക്ഷമാണ്. വനാതിര്ത്തിയില്നിന്ന് ഏറെ അകലെവരെ ആനയും മറ്റു മൃഗങ്ങളും എത്തുന്നു. ബസവന്കൊല്ലിയില് ശിവകുമാറിനെ കൊലപ്പെടുത്തിയ കടുവയെ ഇതുവരെ പിടികൂടാനായിട്ടില്ല.
കുടിയേറ്റ കാര്ഷിക മേഖലയിലെ അനിയന്ത്രിതമായ വന്യമൃഗ ശല്യത്തിനു പരിഹാരം ആവശ്യപ്പെട്ട് കാര്ഷിക പുരോഗമന സമിതി സമരത്തിനിറങ്ങുന്നു.
ജനത്തിന്റെ ജീവനും സ്വത്തിനും സംരക്ഷണം നല്കാന് ബാധ്യതയുള്ള സര്ക്കാരും വനംവകുപ്പും ഇക്കാര്യത്തില് തികഞ്ഞ അലംഭാവം പുലര്ത്തുകയാണ്. ഈ സാഹചര്യത്തിലാണു നിലനില്പിനായുള്ള സമരം ശക്തമാക്കാനുള്ള തീരുമാനം.
അനീഷ് കെ.തോമസ് അധ്യക്ഷത വഹിച്ചു. സംസ്ഥാന അധ്യക്ഷന് പി.എം.ജോയി ഉദ്ഘാടനം ചെയ്തു. വത്സ ചാക്കോ, ടി.പി.ശശി, മാത്യു സഖറിയ, വെട്ടുവേലില് കുഞ്ഞുമോന്, ബ്ലെസന് ചെരിവുപുരയിടം, ഷാജി മുത്തുമാക്കുഴി, കെ.കെ.നാരായണന് എന്നിവര് പ്രസംഗിച്ചു.
https://www.facebook.com/Malayalivartha