ഒരു വര്ഷം കഴിയുമ്പോഴും ദേവിക കാണാമറയത്ത്...!
വയനാട് പനമരത്തെ പരിയാരം കാട്ടുനായ്ക്ക കോളനിയിലെ ബാബുവിന്റെയും മിനിയുടെയും കണ്ണ് ഇനിയും തോര്ന്നിട്ടില്ല. കഴിഞ്ഞ ജൂലൈ 28-ന് ഉച്ചകഴിഞ്ഞു മൂന്നര വരെ ചേച്ചിമാരോടും കുഞ്ഞമ്മയ്ക്കും ഒപ്പം കളിച്ചു കൊണ്ടിരുന്ന, പാല് പുഞ്ചിരി മാറാത്ത അവരുടെ മകള് ഒന്നര വയസ്സുകാരി ദേവിക പെട്ടെന്ന് അപ്രത്യക്ഷമാകുകയായിരുന്നു. മകള് എവിടെയെന്ന് അറിയാതെ വിങ്ങുന്ന മനസ്സുമായി ദേവികയുടെ കുടുംബം.
കോളനിക്ക് സമീപത്തെ പനമരം വലിയ പുഴയില് കുട്ടി വീണതാകാം എന്ന സംശയത്തെ തുടര്ന്ന് അഗ്നിശമന സേന, പൊലീസ്, പനമരം സിഎച്ച് റെസ്ക്യൂ ടീം, കല്പറ്റ തുര്ക്കി ജീവന് രക്ഷാസമിതി, സെറ്റ് പിണങ്ങോട്, നാട്ടുകാര് എന്നിവരുടെ നേതൃത്വത്തില് ദിവസങ്ങളോളം തിരച്ചില് നടത്തിയെങ്കിലും കണ്ടെത്താന് കഴിഞ്ഞില്ല. ഒടുവില് തിരച്ചില് അവസാനിപ്പിച്ച് പൊലീസ് മറ്റുവഴികളിലും അന്വേഷിച്ചു. പക്ഷേ ഒരു വര്ഷം കഴിഞ്ഞും ദേവിക എവിടെയെന്ന് മാത്രം കണ്ടെത്താന് കഴിഞ്ഞിട്ടില്ല.
അധികൃതര് അന്ന് സ്ഥലം സന്ദര്ശിച്ചപ്പോള് കോളനിയുടെ ദുരവസ്ഥ നേരില് കണ്ടു മനസ്സിലാക്കുകയും കരാറുകാരന് പാതി വഴിക്ക് ഉപേക്ഷിച്ച് പോയ ബാബുവിന്റെ വീട് പൂര്ത്തീകരിക്കുന്നതിന് നടപടി എടുക്കുമെന്ന് അറിയിക്കുകയും ചെയ്തതാണ്. പക്ഷേ ഇന്നും പ്ലാസ്റ്റിക് ഷീറ്റ് കൊണ്ട് മറച്ച കൂരയ്ക്കുളളില് തന്നെയാണ് 7 അംഗങ്ങളുള്ള കുടുംബം കഴിയുന്നത്.
അധികൃതര് ആശ നല്കി പറ്റിക്കുമ്പോഴും ചുമര് മാത്രമായി ഒതുങ്ങിയ വീട്ടില് മകളെ കാണാതായ നീറ്റലോടെ കഴിയുന്നു.
https://www.facebook.com/Malayalivartha