തട്ടിപ്പിലേക്ക് നയിച്ചത് റമ്മികളി; പണം പോയപ്പോള് ട്രഷറിയില് നിന്നും കൈയിട്ടുവാരി; റമ്മികളിച്ച് വഴി തെറ്റിയ സര്ക്കാര് ഉദ്യോഗസ്ഥന്; ബിജുലാല് തട്ടിപ്പുകാരനായത് ഇങ്ങനെ
ആരും കൊതിക്കുന്ന അഞ്ചക്ക ശമ്പളം കിട്ടുന്ന സര്ക്കാര് ജോലി. ഭാര്യ ഹയര് സെക്കന്ഡറി സ്കൂള് അധ്യാപിക. സാമ്പത്തിക ബുദ്ധിമുട്ടില്ല. എല്ലാം സുഗമമായി പോകുമ്പോള് പിന്നെ എന്തിന് ബിജുലാല് എന്ന വഞ്ചിയൂര് ട്രഷറിയിലെ സീനിയര് അക്കൗണ്ടന്റ് രണ്ടു കോടി രൂപയുടെ തിരുമറി നടത്തണം. ഇതിന് കാരണം ഓണ്ലൈന് ഗെയിമുകളുടെ നീരാളിപിടിത്തം തന്നെയാണ്. ഈ നീരാളി പിടുത്തത്തില് ഒരു തവണ പെട്ടാല് പിന്നെ രക്ഷപ്പെടുക വളരെ പ്രയാസമാണ്. ബിജുലാല് സ്ഥിരമായി ഓണ് ലൈന് റമ്മി കളിച്ചിരുന്നതായി അദ്ദേഹത്തിന്റെ ഭാര്യ സിമി പറയുന്നു. ഇതിലൂടെ ബിജുലാലിന് ലക്ഷങ്ങള് നഷ്ടപ്പെടുകയും ചെയ്തു. വീണ്ടും റമ്മി കളിച്ചു നഷ്ടപ്പെട്ട പണം തിരിച്ചു പിടിക്കാനായിരുന്നു ഇയാളുയെ അടുത്ത ശ്രമം. അതിനായി പണം കണ്ടെത്തിയത് ട്രഷറിയില് നിന്നും പണം തിരിമറി നടത്തിയാണെന്നു മാത്രം.
ബിജുലാലിനെ പോലുള്ള ഉന്നത വിദ്യാഭ്യാസവും സര്ക്കാര് ജോലിയും ഉള്ളവര് പോലും ഓണ്ലൈന് ഗെമിന്റെ തട്ടിപ്പുകളില് പെടുന്നു. അടുത്ത കാലത്തായി ഓണ്ലൈന് ഗെയിം തട്ടിപ്പുകള് കേരളത്തില് വലിയ തോതില് വര്ധിച്ചിരുന്നു. ലോക്ഡൗണ് കാലത്ത് ഓണ്ലൈന് ഗെയിം കളിക്കുന്നവരുടെയും തട്ടിപ്പിന് ഇരയാകുന്നവരുടെയും എണ്ണം വളരെയധികം വര്ധിച്ചിരുന്നു. പ്രായഭേദമില്ലാതെ കൗമാരക്കാരു മുതല് വീട്ടമ്മമാര് വരെ ഓണ്ലൈന് ഗെമിം തട്ടിപ്പില് ഇരയായിട്ടുണ്ട്. കോഴിക്കോട് നിന്നുള്ള വീട്ടമ്മക്ക് നഷ്ടമായത് മൂന്നര ലക്ഷം രൂപയാണ്. ഇവര് വീട്ടുജോലികള് ചെയ്ത് സമ്പാദിച്ച തുകയാണ് ഇത്തരത്തില് നഷ്ടമായത്. വീട്ടുപണിക്കായി മാറ്റി വച്ചിരുന്ന അഞ്ചു ലക്ഷം രൂപയാണ് ഒരു യുവാവ് റെമ്മി കളിയിലൂടെ നഷ്ടപ്പെടുത്തിയത്. ഇങ്ങനെ നിരവധി സംഭവങ്ങള് കേരളത്തില് ഉടനീളം റിപ്പോര്ട്ട് ചെയ്യപ്പെട്ടിട്ടുണ്ട്. എന്നാല് റിപ്പോര്ട്ട് ചെയ്യപ്പെട്ടതിലും അധികം റിപ്പോര്ട്ട് ചെയ്യാത്ത സംഭവങ്ങളാണ്. മാനഹാനി ഭയന്ന് ഇത്തരം സംഭവങ്ങള് ആരും റിപ്പോര്ട്ട് ചെയ്യാറില്ല.
അതെ സമയം ബിജുലാലിനെതിരെ സര്ക്കാര് നിലപാടു കടുപ്പിക്കുകയാണ്. ഇന്നലെ ഇയാളെ പിരിച്ചുവിടാന് സര്ക്കാര് തീരുമാനിച്ചിരുന്നു. എന്നാല് നോട്ടീസ് നല്കാരെ നേരിട്ട് ബിജുലാലിനെ പിരിച്ചുവിടുന്നത് കോടതി വഴി ഇയാള്ക്ക് വീണ്ടും സര്വീസില് തിരിച്ചെത്താന് അവസരം നല്കുന്നതാണ്. ഇതിനിടെ വഞ്ചിയൂര് സബ് ട്രഷറി തട്ടിപ്പ് കേസ് അന്വേഷണം ജില്ലാ െ്രെകംബ്രാഞ്ചിന് കൈമാറി. അസി. കമ്മീഷണര് സുല്ഫിക്കറിന്റെ നേതൃത്വത്തിലെ സംഘമാകും കേസില് അന്വേഷണം നടത്തുക. സൈബര് സെല്ലിലെ ഉദ്യോഗസ്ഥരും സംഘത്തിലുണ്ട്. തട്ടിപ്പ് പുറത്തു വന്ന് മൂന്നു ദിവസമായിട്ടും മുഖ്യപ്രതിയെ പിടികൂടിയില്ലെന്നത് വലിയ പ്രതിഷേധത്തിന് ഇടയാക്കുന്നുണ്ട്. ഇതിന് പിന്നാലെയാണ് കേസ് അന്വേഷണം ജില്ലാ ക്രൈംബ്രാഞ്ചിന് കൈമാറിയത്. ഇന്ന് തന്നെ പ്രതിയെ പിടികൂടാനുള്ള സാധ്യത തെളിയുന്നതായാണ് പോലീസ് വ്യക്തമാക്കുന്നത്,
ജില്ലാ ട്രഷറി ഓഫീസറുടെയും ടെക്നിക്കല് കോഓര്ഡിനേറ്ററുടെയും ഭാഗത്ത് വീഴ്ചയുണ്ടായെന്നാണ് കണ്ടെത്തല്. 74ലക്ഷം ഓവര്ഡ്രാഫ്റ്റ് ഉണ്ടായിരുന്ന ബിജുലാല് രണ്ട് കോടി തട്ടിച്ചപ്പോള് ബാധ്യത മാറുകയും ഒരുലക്ഷത്തി ഇരുപത്താറായിരം അക്കൗണ്ടിലേക്ക് എത്തുകയും ചെയ്തു.ഇതില് നിന്ന് ഭാര്യയുടെ അക്കൗണ്ടിലേക്ക് 63ലക്ഷം മാറ്റിയെന്നുമാണ് കണ്ടെത്തല്. ചൂതാട്ടത്തില് പണം നഷ്ടപ്പെട്ടതാണ് തട്ടിപ്പിന് പ്രേരിപ്പിച്ചതെന്നാണ പോലീസ് നിഗമനം.
https://www.facebook.com/Malayalivartha