കേരളത്തില്‍ വില്‍ക്കുന്ന സ്വര്‍ണത്തിന്റെ നല്ലൊരു പങ്കും കടത്ത് സ്വര്‍ണമാണെന്നാണ് വിലയിരുത്തപ്പെടുത്തത്. അതായത് നികുതി വെട്ടിച്ച് മറ്റു രാജ്യങ്ങളില്‍ നിന്നും കൊണ്ടു വരുന്നതും കണക്കില്‍പ്പെടുത്താതെ വില്‍പന നടത്തുന്നതുമായ സ്വര്‍ണം ഇതില്‍പെടും. ജ്വാലറികളുടെ ലാഭം തന്നെ ഇത്തരത്തില്‍ കണക്കില്‍പ്പെടാത്ത സ്വര്‍ണം വില്‍ക്കുന്നതിനെ അടിസ്ഥാനമാക്കിയാണ്. അതുകൊണ്ടു തന്നെയാണ് സ്വര്‍ണക്കടത്ത് പ്രശ്‌നം കത്തി നില്‍ക്കുമ്പോഴും വീണ്ടും വീണ്ടും സ്വര്‍ണക്കടത്ത് പിടികൂടുന്ന വാര്‍ത്തകള്‍ പുറത്ത് വരുന്നത്. ഇത് സ്വര്‍ണകടത്ത് ഇപ്പോഴും വ്യാപകമെന്നതിന് തെളിവാണ്. ഒരു രാജ്യത്തിന്റെ കോണ്‍സുലേറ്റ് സംവിധാനത്തെ പോലും മറയാക്കാന്‍ സാധിക്കുന്ന സ്വര്‍ണ കടത്ത് മാഫിയയുടെ ശക്തി എത്രമാത്രമാണന്നോ അത് നമ്മുടെ ഭരണസിരാകേന്ദ്രങ്ങളില്‍ എത്രമാത്രം ആഴത്തില്‍ വേരോട്ടം നടത്തിയെന്നോ ഇതുവരെയും മനസിലാക്കാന്‍ സാധിച്ചിട്ടില്ലെന്നതാണ് സത്യം.

കേരളത്തില്‍ ജി.എസ്.ടി ഇന്റലിജന്‍സ് എന്നൊരു സംവിധാനമുണ്ടെന്ന് ജനം തിരിച്ചറിയുന്നത് ഈ അടുത്തകാലത്താണ്. നികുതി വെട്ടിപ്പ് പിടികൂടാനുള്ള ഈ സംവിധാനം കൃത്യമായി പ്രവര്‍ത്തിച്ചിരുന്നുവെങ്കില്‍ ജ്വാലറി ലോബിയുടെ കള്ളക്കളി ഏറെകുറേ അവസാനിക്കുമായിരുന്നു. അതു നടക്കുന്നില്ല എന്നതാണ് സത്യം. കേരളത്തിലെ വന്‍കിട ജ്വാലറികള്‍ പോലും ഇപ്പോഴും സ്വര്‍ണം വാങ്ങുന്നതിന് കൃത്യമായ ബില്ലുകള്‍ നല്‍കാറില്ല. വന്‍കിട പര്‍ച്ചേസുകളെ പരമാവധി ബില്ലിനിന്നും ഒഴുവാക്കാന്‍ ശ്രമിക്കുകയും അതെ സമയം ചെറിയ പര്‍ച്ചേഴ്‌സുകള്‍ക്ക് കൃത്യമായ ബില്ലു നല്‍കുന്നതുമാണ് ജ്വാലറികളുടെ രീതിയെന്ന് ഒരു ജ്വാലറി ജീവനക്കാരന്‍ മലയാളി വാര്‍ത്തയോട് പറഞ്ഞു. വന്‍കിട പര്‍ച്ചേഴ്‌സില്‍ ജി.എസ്.ടി നികുതി ഒഴിവാക്കുമ്പോള്‍ വന്‍ തുക ലാഭം ലഭിക്കുമെന്നതിനാല്‍ ഉപഭോക്താക്കളും ഇതിനോട് സഹകരിക്കുന്നുണ്ട്. അതെ സമയം ഉപഭോക്താക്കള്‍ തുച്ഛമായ ലാഭത്തിന് വേണ്ടി കണ്ണടക്കുമ്പോള്‍ കോടികളുടെ ലാഭമാണ് നികുതി വെട്ടിച്ച് ഇതിലൂടോ ജ്വാലറി ഉടമകള്‍ക്ക് ലഭിക്കുന്നത്. ഇത്തരത്തില്‍ കോടികളുടെ നികുതി വെട്ടിപ്പ് ജ്വാലറികള്‍ നടത്തുകയാണ്. ഇത്തരത്തില്‍ നികുതി വെട്ടിപ്പ് നടത്താന്‍ തടസമാകുമെന്നതുള്ളത് തന്നെയാണ് ആഭരണ തൊഴിലാളി ക്ഷേമ നിധി ഇല്ലാതാക്കന്‍ ജ്വാലറി ഉടമകള്‍ ശ്രമിക്കാന്‍ കാരണം ഇതുതന്നെയാണ്.

ആഭരണ തൊഴിലാളി ക്ഷേമനിധിയിലേക്ക് ഉടമകള്‍ അടക്കേണ്ട വിഹിതം വില്‍പനയുടെ 0.25 ശതമാനം മുതല്‍ 0.10 ശതമാനം വരെയാണ്. ഇതൊരു ചെറിയ തുകയെന്നു തോന്നുമെങ്കിലും കേരളത്തിലെ ജ്വാലറികളുടെ വില്‍പനയുടെ യഥാര്‍ത്ഥകണക്ക് എടുക്കുകയാണെങ്കില്‍ വളരെ വലിയ തുകയാണ്. ജ്വാലറികളില്‍ നടക്കുന്ന വില്‍പനയെ സംബന്ധിച്ച് തൊഴിലാളികള്‍ക്ക് ധാരണയുണ്ടാകും. അതുകൊണ്ടു തന്നെ ക്ഷേമനിധിലേക്കുള്ള വിഹിതം കുറയുമ്പോള്‍ തൊഴിലാളികള്‍ അതിനെ ചോദ്യം ചെയ്യും. ഇത് കണക്കിലെ കള്ളക്കളി പുറത്ത് വരാന്‍ കാരണവുമാകും. ഇതു മുന്നില്‍ കണ്ടാണ് ജ്വാലറി ഉടമകള്‍ കേരള ആഭരണ തൊഴിലാളി ക്ഷേമനിധി ബോര്‍ഡിനെ ഷോപ്പിംഗ് ആന്റ് കോമേഴ്‌സല്‍ ബോര്‍ഡുമായി ലയിപ്പിക്കാന്‍ ശ്രമിച്ചതും അതിന് സര്‍ക്കാര്‍ അനുമതി നല്‍കിയതും. ഇതിനായി ജ്വാലറി ലോബി സര്‍ക്കാരിന് മേല്‍ കനത്ത സമ്മര്‍ദമാണ് നടത്തിയതെന്ന് ആഭരണ തൊഴിലാളി സംഘടനകള്‍ പറയുന്നു. ഉടമകളില്‍ നിന്നും സെസ് പിരിക്കാന്‍ സര്‍ക്കാരിന് സാധിച്ചുമില്ല. കോടതിയില്‍ നിന്നും സെസ് അടക്കുന്നതിന് ജ്വാലറി ഉടമകള്‍ സ്‌റ്റേയും വാങ്ങിയിരുന്നു. എന്നാല്‍ പുതിയ ഹൈക്കോടതി ഉത്തരവില്‍ സെസ് അടക്കാന്‍ ഉടമകളോട് ആവശ്യപ്പെട്ടിട്ടുണ്ട്. എന്നാല്‍ സെസ് പിരിക്കുന്ന കാര്യത്തില്‍ സര്‍ക്കാരിന് ഇപ്പോള്‍ താല്‍പര്യമില്ല. ഇതെല്ലാം സര്‍ക്കാര്‍ കൈകോര്‍ക്കുന്നത് സ്വര്‍ണക്കടത്ത് മാഫിയക്കൊപ്പമാണെന്നതിന് സംശയം വര്‍ധിപ്പിക്കുകയാണ്.

കേരളത്തില്‍ വടക്കന്‍ കേരളം മധ്യകേരളത്തില്‍ തൃശ്ശൂറും കേന്ദ്രകരിച്ച് പ്രവര്‍ത്തിക്കുന്ന ജ്വാലറികളിലാണ് ഇത്തരത്തില്‍ നികുതി വെട്ടിച്ച് സ്വര്‍ണം വില്‍ക്കുന്നത് വ്യാപകമായി നടക്കുന്നത്. കള്ളപണം വെളുപ്പിക്കാന്‍ ഏറ്റവും മികച്ച മാര്‍ഗമായിയാണ് സ്വര്‍ണക്കടത്തിനെ കാണുന്നത്. നാട്ടിലെത്തികഴിഞ്ഞാന്‍ വില്‍പന നടത്താന്‍ ഒരു തടസമില്ല എന്നതു തന്നെയാണ് സ്വര്‍ണക്കടത്തിന് പ്രോത്സാഹനമാകുന്നത്. നികുതി വെട്ടിപ്പിന് കാരണമാകുന്ന മാറ്റൊരു മണ്ടന്‍ തീരുമാനമാണ് ഹോള്‍മാര്‍ക്ക് ചെയ്യാനുള്ള അനുമതി വന്‍കിട ജ്വാലറികള്‍ക്ക് തന്നെ നല്‍കിയത്. അത്തരത്തില്‍ അവര്‍ ഹോള്‍മാര്‍ക്ക് അവരുടെ ഇഷ്ടത്തിന് അനുലരിച്ച് സ്വര്‍ണാഭാരണങ്ങളില്‍ നടത്താം 916 യില്‍ ക്വാളിറ്റി പറയുന്ന സ്വര്‍ണാഭരണത്തിന്റെ ക്വാളിറ്റി 915യാണെങ്കില്‍ പോലും ജ്വാലറികള്‍ ലാഭമുണ്ടാക്കുക കോടികളാണ്. ഇത്തരത്തില്‍ ജ്വാലറികള്‍ നടത്തുന്ന ഒരു തട്ടിപ്പും സര്‍ക്കാരിന്റെയോ ധനവകുപ്പിന്റെയോ ശ്രദ്ധയില്‍പ്പെടുന്നില്ല എന്നത് സര്‍ക്കാര്‍ ജ്വാലറി മാഫിയയുടെ നിയന്ത്രണത്തിലാണെന്നതിനുള്ള തെളിവാണ്.