അധ്യാപകരുടെയും നാട്ടുകാരുടേയും പ്രതീക്ഷകള്‍ പൂവണിയിച്ചുകൊണ്ട് കായിക മത്സരങ്ങളില്‍ മിന്നുന്ന വിജയം കാഴ്ചവെച്ച് മുന്നേറുകയാണ് കണ്ണുരിലെ മലയോര ഗ്രാമമായ ചീത്തപ്പാറയിലെ വടക്കേക്കര രാജന്‍, പുഷ്പ ദമ്പതികളുടെ മകള്‍ നവ്യശ്രീ എന്ന പ്ലസ്ടു വിദ്യാര്‍ഥിനി.

നാടും നാട്ടുകാരും അനുമോദനങ്ങളും ബഹുമതികളും നല്‍കി പ്രോല്‍സാഹിപ്പിക്കുമ്പോഴും ഈ വിദ്യാര്‍ഥിനിയുടെ കഷ്ടപ്പാടു നിറഞ്ഞ ജീവിതസാഹചര്യങ്ങള്‍ പലരും അന്വേഷിച്ചില്ല.

മണ്‍കട്ടകള്‍ക്കൊണ്ട് നിര്‍മ്മിച്ച ഓടിട്ട അവളുടെ വീട് വനമേഖലയോട് ചേര്‍ന്നു കിടക്കുന്ന കുന്നിന്‍ മുകളിലാണ്. വീട്ടില്‍ നിന്നും നേരം പുലരും മുമ്പ് കായിക പരിശീലനത്തിനായി കിലോമീറ്ററുകള്‍ ഒറ്റയ്ക്ക് നടന്നാണ് സ്‌കൂളിലേക്ക് പോയിരുന്നത്.കാര്‍ഷിക ജോലികള്‍ ചെയ്തു കുടുംബത്തെ നയിക്കുന്ന പിതാവ് രാജനും,അമ്മ പുഷ്പയ്ക്കും മക്കളുടെ ഭാവിയെക്കുറിച്ച് ആകുലതകളുണ്ടെങ്കിലും വലിയ ആഗ്രഹമായി എന്നും നിലനില്‍ക്കുന്നത് സുരക്ഷിതമായൊരു വീടെന്ന സ്വപ്‌നമാണ്.

വലിയ കാറ്റില്‍ കുലുങ്ങുന്ന വീടിനുള്ളില്‍ ഇവര്‍ പേടിയോടെ കഴിയുന്നു. മഴക്കാലങ്ങളില്‍ വീടിനുള്ളിലേക്ക് പെയ്തിറങ്ങുന്ന മഴത്തുള്ളികള്‍ വീടിനുള്ളിലെ സാധനങ്ങളെ വെള്ളത്തിലാക്കുകയാണ്. സ്‌കൂള്‍ വിദ്യാര്‍ഥിനിയായ ഇളയ മകള്‍ ശ്രീനന്ദയും ,ചേച്ചി നവ്യശ്രീയും പ്ലാസ്റ്റിക് ചാക്ക് വലിച്ചുകെട്ടിയാണ് പുസ്തകങ്ങളെ മഴയില്‍ നിന്നും രക്ഷിക്കുന്നത്. ഓണ്‍ലൈന്‍ പഠനത്തിനായി സുമനസുകള്‍ ടിവി നല്‍കിയിരുന്നു. എന്നാല്‍, രാവിലെയുള്ള കോടമഞ്ഞുകാരണം ടിവിയുടെ ഡിഷിനും മൊബൈല്‍ ഫോണിനും സിഗ്‌നല്‍ ലഭിക്കാതായതോടെ ഇവരുടെ പഠനമെന്ന പ്രതീക്ഷയും നിലച്ചു.

ഇവരെ പട്ടിണിയിലേക്ക് തള്ളിവിടാതിരിക്കുന്നത് അവരുടെ 2 പശുക്കളാണ്്. ഓണ്‍ലൈന്‍ പഠനം മുന്നോട്ട് പോകാനാകാതെ വന്നതോടെ മാതാപിതാക്കള്‍ക്കൊപ്പം ആകെയുള്ള 25 സെന്റ് സ്ഥലത്തെ കൃഷിപ്പണികളും പശുക്കള്‍ക്കുള്ള പുല്ല് ശേഖരിക്കുന്ന പ്രവര്‍ത്തികളുമായി മുന്നോട്ട് പോവുകയാണ് നവ്യശ്രീ എന്ന കായികതാരം.