അപാര മെയ് വഴക്കം; ദേ വന്നു, ദേ പോയി പുതുശേരി; ജനതാ പാര്ട്ടിയില് നിന്നു തുടങ്ങിയ ചാട്ടം ഇനി എങ്ങോട്ട്? ചാടിയ പാര്ട്ടിയിലെല്ലാം ഉമ്മന്ചാണ്ടിക്ക് വേണ്ടി ചാരപ്പണി ചെയ്തു, ഇപ്പോള് കോണ്ഗ്രസ് കൈപിടിക്കുമോ എന്ന് കണ്ടറിയണം
കേരളാ കോണ്ഗ്രസ് രാഷ്ട്രീയത്തിലെ ദേശാടനപക്ഷിയായ ജോസഫ് എം പുതുശേരി മാണിക്കൂടു വിട്ട് അടുത്ത കൂടുതേറി പറന്നിരിക്കുന്നു. സ്ഥിരമായ ഒരു പാര്ക്കല് ചില്ലയില്ലാത്ത പുതുശേരി 61 വയസിനിടെ ഏതൊക്കെ, എവിടെയൊക്കെ, ആരുടെയൊക്കെ കൊമ്പിലും കൂട്ടിലും മാളത്തിലും അഭയം തേടി എന്ന് അദ്ദേഹത്തിനു പോലും അറിയില്ല. ഇപ്പോഴിതാ ഒരുപാട് അഭയാര്ഥികള് ചേക്കേറിയിരിക്കുന്ന ജോസഫിന്റെ കൂട്ടിലേക്കാണ് പുതുശേരിയുടെ പോക്ക്. അതല്ല വാതില് തുറന്നു കിട്ടിയാല് കോണ്ഗ്രസിന്റെ കൂട്ടിലേക്കും പറന്നു കയറാന് പുതുശേരിക്കു മടിയില്ലെന്നാണ് കേള്വി. ഉള്ളതു പറയാമല്ലോ പത്തംതിട്ട നിയമസഭാ സീറ്റ് കണ്ടും കൊതിച്ചുമാണ് ഇക്കുറി ജോസ് കെ മാണിയെ വിട്ട് പുതിയ ലാവണത്തിലേക്കുള്ള പുതുശേരി പ്രയാണംപോലും.
കേരള രാഷ്ട്രീയം അറിയാവുന്നവരും അരിയാഹാരം കഴിക്കുന്നവരുമായ എല്ലാവര്ക്കും അറിയാം കല്ലൂപ്പാറക്കാരന് പുതുശേരി 20 കൊല്ലം ആര് ബാലകൃഷ്ണപിള്ളയുടെ കൂട്ടിലായിരുന്നുവെന്ന്. പുതുശ്ശേരിയുടെ രാഷ്ട്രീയ പ്രവര്ത്തനം ആരംഭിക്കുന്നത് ജനതാ പാര്ട്ടിയിലൂടെയായിരുന്നു. അന്ന് തിരുവല്ല കെ.എസ്.ആര്.ടി.സി സ്റ്റാഡില് പൊതുപരിപാടിക്കെത്തിയ കെ.എം മാണിയെ കരിംകൊടി കാണിക്കാന് മുന്നില് നിന്നയാള് പിന്നീട് മാണിയൂടെ കാലുപിടിക്കാന് അദ്ദേഹം പോകുന്നിടത്തെല്ലാം ഓടി നടക്കുന്നതും കേരളം കണ്ടു. കേരള കോണ്ഗ്രസിലെ ഒരു പിളര്പ്പില് പിള്ളയുടെ കുടിയിലെത്തിയശേഷം പിന്നെ അവിടത്തെ തള്ളും ഭള്ളും കേട്ടാണ് ഈ കല്ലൂപ്പാറക്കാരന് വളര്ന്നത്. കാര്യമായി ഒന്നും സംസാരിക്കാന് അറിയില്ലെങ്കിലും അല്പം സമുദായ സ്വാധീനമൊക്കെ അവസരോചിതമായി പ്രയോഗിച്ച് പിടിച്ചുനില്ക്കാന് ആള് വിരുതനാണ്. അടി കളി പഠിച്ച് 1991ലും 2001ലും 2006ലും കല്ലൂപ്പാറയില് നിന്ന് നിയമസഭ പറ്റി. അതിനിടെ കൊട്ടാരക്കരയില് പിള്ളയെ ഉപേക്ഷിച്ച പറന്ന് നേരേ പാലായിലെത്തി മാണിസാറിനു വലം വെച്ചു ദക്ഷിണ കൊടുത്തു. തലേന്നു രാത്രി കൊട്ടാരക്കരയിലുണ്ടായിരുന്ന പുതുശേരി നേരെ വെളുത്തപ്പോള് പാലായിലെത്തിയ വിവരം അറിഞ്ഞ ബാലകൃഷ്ണപിള്ള ഞെട്ടിയിരുന്നു.
അവസാനം കല്ലൂപ്പാറ മണ്ഡലം തന്നെ ഇല്ലാതായപ്പോള് സീറ്റു തന്നില്ലെങ്കില് അടുത്ത കളം പറ്റുമെന്നറിഞ്ഞ് വനവാസത്തിനു പോയി. ഇതിനിടെയാണ് കേരളാ കോണ്ഗ്രസ് പുതുശ്ശേരി പാര്ട്ടിക്ക് ടിയാന് രൂപം നല്കിയത്. പുതുശ്ശേരിയല്ലാതെ വെറെയൊരു പൂച്ച കുട്ടി പോലും ആ പാര്ട്ടിലേക്ക് വന്നില്ല. ഈ രാഷ്ട്രീയ വനവാസം അവസാനിപ്പിച്ചത് മാണി സാര് വീണ്ടും അഭയം നല്കിയപ്പോളാണ്. തിരുവല്ല സീറ്റ് വിക്ടര് ടി തോമസിന് കൊടുത്തതില് മുഖം വീര്പ്പിച്ചും കുശുമ്പുപറഞ്ഞു നടന്ന ടിയാനെ പിന്നെയും തലോടി മാണി സാര് മഹാമനസ്കനായി. അങ്ങനെ 2016ല് തിരുവല്ല സീറ്റില് ഒന്നു പരീക്ഷിച്ചുനോക്കി. തിരുവല്ലയില് മാത്യു ടി തോമസിനോടു പൊട്ടിയ പുതുശേരി വലിഞ്ഞും തിരിഞ്ഞും നില്പ്പായിരുന്നു. അങ്ങനെയിരിക്കെ ഈ പുതുശേരിക്ക് കേരള കോണ്ഗ്രസ് വക്താവ് എന്ന പദവി നല്കി കെഎം മാണി ആദരിച്ചിരുന്നു. ആ വക്താവാണ് ഒരു കാലവര്ഷം കഴിയും മുന്പ് വസന്തകാലം പ്രതീക്ഷിച്ച് പുതിയ ലാവണം തേടുന്നത്. രാഷ്ട്രീയ ചതുരംഗക്കളിയിലെ ഊ കൊച്ചുവിദഗ്ധന് മന്ത്രിയാകാന് ഒരു വേള പഠിച്ച പണി പതിനെട്ടും നോക്കിയിട്ടു നടന്നില്ല. അവസാനം കേരള കോണ്ഗ്രസ് എം ചീഫ് വിപ്പ് സ്ഥാനം എന്ന പൂച്ചെണ്ട് സ്വന്തമാക്കി.
പാര്ട്ടികള് മാറി മാറി പറന്നിറങ്ങുമ്പോഴും എന്നും കോണ്ഗ്രസിനേട് പുതുശ്ശേരി നല്ല അടുപ്പം പുലര്ത്തിയിരുന്നു. പിള്ള ഗ്രൂപ്പിലെയും മാണി ഗ്രൂപ്പിലെയും ഉള്പാര്ട്ടി രഹസ്യം കോണ്ഗ്രസിലെത്തിക്കുന്ന നല്ലൊരു ചാരനായിരുന്നു പുതുശ്ശേരി. കോണ്ഗ്രസിലെ എ വിഭാഗത്തിനോടും ഉമ്മന്ചാണ്ടിയോടും മമത വച്ചു പുലര്ത്തിയ അദ്ദേഹത്തിന്റെ കൈപിടിക്കാന് ഒരിക്കല് പോലും കോണ്ഗ്രസ് തയ്യാറായില്ലെന്നു മാത്രം. മാണി സാറിന്റെ മരണശേഷം ചോറിങ്ങും കൂറങ്ങും എന്ന മട്ടില് പുതുശേരിയുടെ നില്പ്പു കണ്ടവരൊക്കെ ടിയാന് മറുകണ്ടം ചാടാന് ഓങ്ങിനില്ക്കുകയാണെന്ന് ഗണിച്ചിരുന്നു. മാണി സാറിന്റെ കാലത്തു തന്നെ പി.ജെ ജോസഫിനോട് അഭിമുഖ്യം പുതുശ്ശേരി കാട്ടിയിരുന്നുവെങ്കിലും പിന്നീട് സ്വന്തം താല്പര്യങ്ങല് മുന് നിര്ത്തി മാത്രമാണ് ജോസ് പക്ഷത്ത് തുടര്ന്നത്. ഇതു തന്നെ സംശയം ജനിപ്പിച്ചിരുന്നതാണ്. കോട്ടയത്ത് കഴിഞ്ഞ മാസങ്ങളില് നടന്ന ജോസ് കെ മാണി യോഗങ്ങളിലൊക്കെ അകത്ത് കയറാതെ വാതിലിനു മുന്നിലും പുറത്തും നിന്ന് ഇദ്ദേഹം നിരീക്ഷണം നടത്തുന്നതായി ശരീരഭാഷയില് നിന്ന് ഏറെപ്പേരും ഗ്രഹിച്ചിരുന്നതാണ്. പലരെയും ആകര്ഷിച്ചുനോക്കിയെങ്കിലും ആരും കൂടെയില്ലെന്നുറപ്പാക്കി ജോസഫിന്റെ കൂടാരത്തിലെത്തി സ്ത്രോത്രം പറഞ്ഞു. ജോസഫ് ഇരിക്കാന് പറഞ്ഞെങ്കിലും ഇരിക്കാതെ കോണ്ഗ്രസ് കസേര നീട്ടുന്നുണ്ടോ എന്ന നിരീക്ഷണത്തിലാണ് ഉമ്മന് ചാണ്ടിയുടെ അടുപ്പക്കാരന്കൂടിയായ പുതുശേരി. കാര്യമായ മൂലധനമില്ലാതെ രാഷ്ട്രീയത്തിലെത്തി പിള്ളയച്ചന്റെയും മാണിയച്ചന്റെയും തണല്മരങ്ങളില് ചേക്കേറി കിട്ടാവുന്നതും നേടാവുന്നതുമൊക്കെ നേടി വീണ്ടും മാനംതേടി സഞ്ചാരം.
https://www.facebook.com/Malayalivartha