ലൈഫ് മിഷനില് സര്ക്കാരിന് ഉത്തരവാദിത്വമെന്ന് സി.ബി.ഐ; പ്രാഥമികാന്വേഷണ റിപ്പോര്ട്ട് പുറത്ത്; വിദേശ സഹായം സ്വീകരിച്ചത് സര്ക്കാര് പദ്ധതിലേക്ക്; അന്വേഷണം നിരീക്ഷിച്ച് അമിത് ഷാ; വേഗത്തില് അന്വേഷണം പൂര്ത്തിയാക്കാന് സി.ബി.ഐക്ക് കേന്ദ്ര സര്ക്കാരിന്റെ നിര്ദേശം; സി.ബി.ഐ എത്തുന്നതിന് മുമ്പ് ഫയലുകള് പൊക്കി വിജിലന്സ്
ലൈഫ് മിഷന് പദ്ധതിയില് സര്ക്കാരിന് വീഴ്ച്ച പറ്റിയെന്ന് സി.ബി.ഐയുടെ കണ്ടെത്തല്. സി.ബി.ഐയുടെ പ്രഥമികാന്വേഷണ റിപ്പോര്ട്ടിലാണ് ഈ വിവരങ്ങളുള്ളത്. അനുവാദമില്ലാതെ വിദേശ സഹായം സ്വീകരിച്ചത് സര്ക്കാര് പദ്ധതിക്കാണെന്നും, ലൈഫ് മിഷന് കരാര് സര്ക്കാര് പദ്ധതിയുടെ ഭാഗമാണെന്നും സി.ബി.ഐയുടെ പ്രാഥമിക റിപ്പോര്ട്ടില് ചൂണ്ടിക്കാണിക്കുന്നു. ലൈഫ് മിഷന് സിഇഒ സര്ക്കാര് പ്രതിനിധിയാണെന്നും ഇതെല്ലാം കൊണ്ട് തന്നെ സംസ്ഥാന സര്ക്കാരിന് ഉത്തരവാദിത്വമുണ്ടെന്നാണ് സിബിഐ നിരീക്ഷണം. സംസ്ഥാനം നേരിട്ട് വിദേശ സഹായം സ്വീകരിച്ചില്ലെന്ന വാദം നിലനില്ക്കില്ലെന്നും റിപ്പോര്ട്ടില് പറയുന്നു. യൂണിടാകും കോണ്സുലേറ്റും തമ്മിലാണ് പണിമടപാടിലെ കരാറെങ്കിലും ഇതിലെ രണ്ടാം കക്ഷി സര്ക്കാരാണ്. വിദേശ സഹായം സ്വീകരിച്ചതിന്റെ പ്രയോജനവും സര്ക്കാരിനാണ്. വിദേശ സഹായം സ്വീകരിച്ചതില് സര്ക്കാരിന് ബാധ്യതയില്ലെങ്കില് സര്ക്കാര് ഭൂമിയില് കെട്ടിടം പണിയാന് കോണ്സുലേറ്റിന് അനുവാദം കൊടുത്തത് എന്തിനാണെന്നും ചോദ്യമുണ്ട്. സര്ക്കാര് പദ്ധതിയായതിനാല് അതിലെ ഉദ്യേഗസ്ഥ അഴിമതിയും അന്വേഷിക്കാമെന്നാണ് ശുപാര്ശ.
ലൈഫ് മിഷന് ഇടപാട് സംബന്ധിച്ച അന്വേഷണം വേഗത്തിലാക്കാനാണ് സിബിഐയ്ക്ക് കിട്ടിയിരിക്കുന്ന നിര്ദേശം. സംസ്ഥാന വിജിലന്സ് കൂടി പദ്ധതിയിലെ കോഴ ഇടപാട് സംബന്ധിച്ച് സമാന്തര അന്വേഷണം തുടങ്ങിയ സാഹചര്യത്തിലാണ് കേന്ദ്ര ഏജന്സിയുടെ തലപ്പത്തുനിന്ന് നിര്ദേശമെത്തിയത്. കേന്ദ്ര ആഭ്യന്തരമന്ത്രി അമിത്ഷാ തന്നെ സി.ബി.ഐയോട് അന്വേഷണം വേഗത്തിലാക്കമെന്നും നിര്ദേശിച്ചിട്ടുണ്ട്. സ്വര്ണക്കടത്ത് കേസ് നിരീക്ഷിക്കുന്ന ദേശീയ സുരക്ഷാ ഉപദേഷ്ടാവ് അജിത്ത് ഡോവലിന്റെ നിരീക്ഷവും സി.ബി.ഐ അന്വേഷണത്തിലുമുണ്ടാകും. അനുവാദമില്ലാതെ വിദേശ ധനസഹായം സ്വീകരിച്ചുവെന്ന കേസില് വടക്കാഞ്ചേരിയിലെ ലൈഫ് മിഷന് പദ്ധതിയുടെ നിര്മാതാക്കളായ യൂണിടാക് ബില്ഡേഴ്സിനെതിരെ സിബിഐ കേസെടുത്തിരുന്നു. സ്ഥാപനത്തിന്റെ ഓഫീസിലും മറ്റും ഇന്നലെ പരിശോധനയും നടത്തി. കേസില് ഒന്നാം പ്രതിയായ യൂണിടാക് ഉടമ സന്തോഷ് ഈപ്പന്റെ മൊഴിയും ഉടന് രേഖപ്പെടുത്തും. തിരുവനന്തപുരത്ത് സെക്രട്ടേറിയറ്റിലുളള ലൈഫ് മിഷന് ഓഫീസിലും വൈകാതെ പരിശോധന ഉണ്ടാകും.
അതെ സമയം വടക്കാഞ്ചേരി ലൈഫ് മിഷന് പദ്ധതിയില് സിബിഐ അന്വേഷണം പ്രഖ്യാപിച്ചെങ്കിലും പദ്ധതിയുമായി ബന്ധപ്പെട്ട നിര്ണായക രേഖകളെല്ലാം വിജിലന്സിന്റെ കസ്റ്റഡയിലാണെന്നാണ് പുറത്ത് വരുന്ന റിപ്പോര്ട്ട്. ലൈഫ് മിഷനില് കേസ് രജിസ്റ്റര് ചെയ്ത് അന്വേഷണം ആരംഭിച്ചതായി പ്രത്യേക കോടതിയില് സിബിഐ റിപ്പോര്ട്ട് നല്കിയതിന് പിന്നാലെയാണ് നിര്ണായക രേഖകള് വിജിലന്സ് ശേഖരിച്ചത്. ലൈഫ് പദ്ധതി ഉള്പ്പെടെ എല്ലാ ഫയലുകളും നിലവില് വിജിലന്സിന്റെ കസ്റ്റഡിയിലാണ്. ലൈഫ് മിഷന്റെ ഓഫീസില് നിന്നും രണ്ട് ഫയലുകള് വിജിലന്സ് കസ്റ്റഡിയിലെടുത്തു. നിയമോപദേശം ഉള്പ്പെടെയുളള ഫയലാണ് സെക്രട്ടറിയേറ്റില് നിന്നും കസ്റ്റഡിയിലെടുത്തത്. ലൈഫ് പദ്ധതിയുമായി ബന്ധപ്പെട്ട് വിവരാവകാശ നിയമപ്രകാരം നല്കിയ അപേക്ഷയില് രേഖകള് നല്കാന് സര്ക്കാര് തയ്യാറായിരുന്നില്ല.
ലൈഫ് മിഷന് പദ്ധതിയെക്കുറിച്ച് ഉയര്ന്ന ആരോപണങ്ങള് പരിശോധിച്ച് അവയില് കഴമ്പുണ്ടെങ്കില് കേസ് രജിസ്റ്റര് ചെയ്ത് അന്വേഷണം നടത്താനാണ് വിജിലന്സിനോട് സര്ക്കാര് ആവശ്യപ്പെട്ടിരുന്നത്. ഇതിനു പിന്നാലെയാണ് കേസില് സിബിഐ കേസ് രജിസ്റ്റര് ചെയ്തത്. കേന്ദ്ര ഏജന്സി അന്വേഷണം ആരംഭിച്ച കേസില് ഇനി വിജിലന്സിന്റെ അന്വേഷണം അപ്രസക്തമാണെങ്കിലും വിജിലന്സിന്റെ കൈവശമുള്ള നിര്ണായകഫയലുകള് കിട്ടാതെ സിബിഐക്ക് അന്വേഷണം മുന്നോട്ട് കൊണ്ടു പോകാനാകില്ല. സി.ബി.ഐ അന്വേഷണം അട്ടിമറിക്കാനാണ് നേരത്തെ തന്നെ വിജിലന്സ് അന്വേഷണം സംസ്ഥാന സര്ക്കാര് പ്രഖ്യാപിച്ചതെന്ന് ആരോപണം നേരത്തെ തന്നെയുണ്ടായിരുന്നു.
https://www.facebook.com/Malayalivartha