ലോക വ്യാപാര സംഘടനയില്‍ കൊറോണക്കെതിരെ നീങ്ങുവാന്‍ അവശ്യ മരുന്നുകളുടെ ബൗദ്ധിക സ്വത്തവകാശ നിയമത്തില്‍ താത്കാലികമായ ഇളവ് വേണമെന്ന് പ്രമേയം കൊണ്ട് വന്ന് ഇന്ത്യ. മുഴുവന്‍ ലോക രാജ്യങ്ങള്‍ക്കും കോവിഡ് പ്രതിരോധ മരുന്ന് എത്തിക്കുവാന്‍ ബൗദ്ധിക സ്വത്തവകാശ നിയമങ്ങളില്‍ ഈ പ്രത്യേക സാഹചര്യത്തില്‍ ചെറിയ തരത്തിലുളള മാറ്റം വരുത്തണമെന്നാണ് ഇന്ത്യ ലോക വ്യാപാര സംഘടനയോട് ഇന്ത്യ ആവശ്യപ്പെട്ടത്. വികസ്വര രാജ്യങ്ങളും ലോകാരോഗ്യ സംഘടനയും ഇതിനെ പിന്തുണച്ചപ്പോള്‍ വികസിത രാജ്യങ്ങളായ അമേരിക്കയും മറ്റ് യൂറോപ്പ്യന്‍ രാജ്യങ്ങളും ഇന്ത്യ കൊണ്ട് വന്ന പ്രമേയം തള്ളുകയാണുണ്ടായത്. അമേരിക്ക, യൂറോപ്പ്യന്‍ യൂണിയന്‍ , ഇംഗഌണ്ട് , സ്വിറ്റസര്‍ലാന്‍ഡ്, എന്നിവരെ കൂടാതെ ബ്രസീലും, കോവിഡ് മഹാമാരിയുടെ പശ്ചാത്തലത്തില്‍ ഇന്ത്യയും സൗത്ത് ആഫ്രിക്കയും കൂടെ സംയുക്തമായി ലോക വ്യാപാര സംഘടനയില്‍ കൊണ്ട് വന്ന മരുന്നുകളുടെയും മറ്റ് ആവശ്യ വസ്തുക്കളുടെയും ബൗദ്ധിക സ്വത്തവകാശ നിയമത്തില്‍ താത്കാലിക ഇളവ് നല്‍കാനുള്ള നിര്‍ദ്ദേശത്തെ സ്വാഗതം ചെയ്യുകയുണ്ടായില്ല. അതെ സമയം അനവധി വികസിത രാജ്യങ്ങളാണ് ഇന്ത്യയുടെ നിര്‍ദ്ദേശം സ്വാഗതം ചെയ്തു രംഗത്തെത്തിയിരിക്കുന്നത്. അപ്രതീക്ഷിതമല്ലെങ്കിലും ഇതില്‍ ചൈനയും പാകിസ്ഥാനും ഉള്‍പ്പെട്ടിട്ടുണ്ട്.

ഇന്ത്യയും ദക്ഷിണാഫ്രിക്കയും ലോക വ്യാപാര സംഘടനയില്‍ സംയുക്തമായി കൊണ്ട് വന്ന നിര്‍ദ്ദേശത്തെ വികസിത രാജ്യങ്ങളുടെ എതിര്‍പ്പിനിടയിലും ലോകാരോഗ്യ സംഘടനാ സ്വാഗതം ചെയ്യുകയുണ്ടായി. കോവിഡ് 19 വാക്‌സിനുകള്‍, ചികിത്സകള്‍, ടെസ്റ്റുകള്‍ എന്നിവ സംബന്ധിച്ച അന്താരാഷ്ട്ര, ബൗദ്ധിക സ്വത്തവകാശ കരാറുകള്‍ ലഘൂകരിക്കാനുള്ള ദക്ഷിണാഫ്രിക്കയുടെയും ഇന്ത്യയുടെയും സമീപകാല നിര്‍ദ്ദേശത്തെ ലോകാരോഗ്യ സംഘടന സ്വാഗതം ചെയ്യുന്നു, ലോകാരോഗ്യസംഘടന ഡയറക്ടര്‍ ജനറല്‍ ടെഡ്രോസ് അദാനോം ഗെബ്രിയേസസ് ട്വീറ്റ് ചെയ്തു. സഹകരണം ആരംഭിക്കുന്നതോടെയാണ് പാന്‍ഡെമിക് അവസാനിക്കുന്നത്. കൊറോണ വൈറസിനെതിരായ പോരാട്ടത്തില്‍ സുപ്രധാനവും ജീവന്‍ രക്ഷിക്കുന്നതുമായ ആരോഗ്യ ഉല്‍പ്പന്നങ്ങളെക്കുറിച്ചുള്ള ഡാറ്റ, അറിവ്, ബൗദ്ധിക സ്വത്തവകാശം എന്നിവ പങ്കിടാന്‍ രാജ്യങ്ങളെ ക്ഷണിച്ചുകൊണ്ട് ലോകാരോഗ്യ സംഘടന മെയ് മാസത്തില്‍ കോവിഡ് 19 ടെക്‌നോളജി ആക്‌സസ് പൂള്‍ അഥവാ സിടിഎപി ആരംഭിച്ചു, 'ഗെബ്രിയേസസ് കൂട്ടിച്ചേര്‍ത്തു.

വേള്‍ഡ് ട്രേഡ് ഓര്‍ഗനൈസേഷന്റെ എല്ലാ അംഗരാജ്യങ്ങളും തമ്മിലുള്ള അന്താരാഷ്ട്ര നിയമങ്ങള്‍ പരിപാലിക്കുന്ന മാനദണ്ഡമാണ് ട്രിപ്‌സ് അഥവാ 'ബൗദ്ധിക സ്വത്തവകാശത്തിന്റെ വ്യാപാരവുമായി ബന്ധപ്പെട്ട കരാര്‍' . വിവിധ തരത്തിലുള്ള ബൗദ്ധിക സ്വത്തവകാശമുള്ള ദേശീയ സര്‍ക്കാരുകളെ നിയന്ത്രിക്കുന്നതിനുള്ള മിനിമം മാനദണ്ഡങ്ങള്‍ ഇത് നിര്‍ണ്ണയിക്കുന്നു. ഒക്ടോബര്‍ 2 ന് ഡബ്ല്യുടിഒയുടെ ട്രിപ്‌സ് കൗണ്‍സിലിന് മുമ്പാകെ സമര്‍പ്പിച്ച സമര്‍പ്പണത്തില്‍, ഇന്ത്യയും ദക്ഷിണാഫ്രിക്കയും ട്രിപ്‌സ് കരാറിന്റെ ചില നിയമങ്ങള്‍ എഴുതിത്തള്ളണമെന്ന് ഡബ്ല്യുടിഒ അംഗങ്ങളോട് അഭ്യര്‍ത്ഥിച്ചിരുന്നു, പകര്‍പ്പവകാശവും വെളിപ്പെടുത്താത്ത വിവരങ്ങളുടെ പരിരക്ഷയും വാക്‌സിനുകളും മരുന്നുകളും ഉള്‍പ്പെടെയുള്ള താങ്ങാനാവുന്ന മെഡിക്കല്‍ ഉല്‍പ്പന്നങ്ങളിലേക്ക് സമയബന്ധിതമായി പ്രവേശിക്കുന്നതിനോ കോവിഡ് 19 നെ നേരിടാന്‍ ആവശ്യമായ മെഡിക്കല്‍ ഉല്‍പ്പന്നങ്ങളുടെ ഗവേഷണം, വികസനം, ഉല്‍പാദനം, വിതരണം എന്നിവ വര്‍ദ്ധിപ്പിക്കുന്നതിനോ തടസ്സങ്ങള്‍ സൃഷ്ടികാത്തിരിക്കുവാന്‍ വേണ്ടിയാണു ഇത്.

ഒക്ടോബര്‍ 15,16 തീയതികളില്‍ നടന്ന ട്രിപ്‌സ് കൗണ്‍സില്‍ യോഗത്തിലാണ് ഈ നിര്‍ദേശം ചര്‍ച്ചയ്ക്ക് എടുത്തത്. യുഎസ്, യൂറോപ്യന്‍ യൂണിയന്‍, കാനഡ, ജപ്പാന്‍, യുകെ, ഓസ്‌ട്രേലിയ, സ്വിറ്റ്‌സര്‍ലന്‍ഡ് എന്നിവയുള്‍പ്പെടെ വികസിത രാജ്യങ്ങള്‍ ഈ നിര്‍ദേശം നിരസിച്ചപ്പോള്‍ . ആഫ്രിക്കന്‍ ഗ്രൂപ്പ് രാജ്യങ്ങള്‍, ഏറ്റവും അവികസിത രാജ്യങ്ങളായ ബംഗ്ലാദേശ്, ശ്രീലങ്ക, പാകിസ്ഥാന്‍, നേപ്പാള്‍ തുടങ്ങിയ രാജ്യങ്ങള്‍ ഈ നിര്‍ദ്ദേശത്തെ പിന്തുണച്ചു. ചൈന, തുര്‍ക്കി, ഫിലിപ്പൈന്‍സ്, കൊളംബിയ തുടങ്ങിയ രാജ്യങ്ങള്‍ ഇതിനെക്കുറിച്ച് കൂടുതല്‍ വിവരങ്ങള്‍ അന്വേഷിക്കുകയുണ്ടായി. കോവിഡ് 19 ന് മറുപടിയായി ഉല്‍പ്പാദനം വര്‍ദ്ധിപ്പിക്കുന്നതിന് ഏറ്റവും അനുയോജ്യമായ പരിഹാരം സന്നദ്ധ ലൈസന്‍സുകളെന്ന് ചില അംഗങ്ങളുടെ വാദത്തെ എതിര്‍ത്ത ഇന്ത്യ, കോവിഡുമായി ബന്ധപ്പെട്ട് ലോകാരോഗ്യ സംഘടനയുടെ ആഭിമുഖ്യത്തില്‍ ആരംഭിച്ച ടെക്‌നോളജി ആക്‌സസ് പൂളില്‍ പ്രതിജ്ഞാബദ്ധരാകാന്‍ ഒരു പേറ്റന്റ് ഉടമ പോലും തയ്യാറായിട്ടില്ലെന്ന് വ്യക്തമാക്കി.

മുഴുവന്‍ ആരോഗ്യ സംവിധാനങ്ങളും ഇതിനകം തന്നെ കോവിഡ് 19 കാരണം ഓവര്‍ലോഡ് ആയിരിക്കുകയും, പല ദരിദ്രരാജ്യങ്ങളുടെയും സര്‍ക്കാരുകള്‍ ആരോഗ്യ ബജറ്റുകള്‍ക്ക് ഉയര്‍ന്ന വിലയുള്ള കോവിഡ് 19 മെഡിക്കല്‍ ഉല്‍പ്പന്നങ്ങള്‍ നിലനിര്‍ത്താന്‍ കഴിയാതെ സാമ്പത്തിക പ്രതിസന്ധി നേരിടുകയും ചെയ്യുന്ന സാഹചര്യമായതിനാല്‍ മരുന്ന് നിര്‍മാണ കമ്പനികളുടെയും മറ്റു സര്‍ക്കാരുകളുടെയും ബൗദ്ധിക സ്വത്തവകാശത്തിന്മേലും മറ്റ് അവശ്യ വസ്തുക്കളുടെ കാര്യത്തിലും സംയോജിത സഹകരണത്തോടു കൂടി മാത്രമേ ഈ മഹാമാരിയെ പിടിച്ചു കെട്ടാനാകൂ. ഇതിലേക്കു വേണ്ടി ഇന്ത്യ നല്‍കിയ നിര്‍ദേശത്തെ നിരാകരിക്കുന്നതിലൂടെ വികസിത രാജ്യങ്ങള്‍ എന്താണ് ഉദ്ദേശിക്കുന്നതെന്ന് വ്യക്തമല്ല. ഒരു പക്ഷെ മരുന്ന് വിതരണത്തിലൂടെ നേടാനാകുന്ന ശതകോടികളിലായിരിക്കാം അവരുടെ കണ്ണ്. അതെന്തായാലും പുര കത്തുമ്പോള്‍ വാഴ വെട്ടുന്ന നടപടി ആണെന്ന് മാത്രമേ ഇതിനെ കുറിച്ച് പറയാനുള്ളു.