മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറിനെതിരായ തെളിവുകള്‍ ഓരോ ദിവസവും കൂടുതല്‍ പുറത്ത് വരുകയാണ്. ഇന്ന് ശിവശങ്കറിന്റെ വാട്‌സാപ്പ് ചാറ്റ് വിവരങ്ങളാണ് പുറത്ത് വന്നിരിക്കുന്നത്. ശിവശങ്കര്‍ പണമിടപാടില്‍ ഇടപെട്ടുവെന്നതിന് ആധാരമായി എന്‍ഫോഴ്‌സ്‌മെന്റ് ഡയറക്ടറേറ്റ് ചൂണ്ടിക്കാണിക്കുന്ന വാട്‌സാപ്പ് ചാറ്റിലെ വിവരങ്ങളാണ് പുറത്തു വന്നത്. ചാര്‍ട്ടേഡ് അക്കൌണ്ടന്റ് വേണുഗോപാലുമായി ശിവശങ്കര്‍ ബന്ധപ്പെട്ടതിന്റെ ചാറ്റ് വിവരങ്ങളാണ് പുറത്തു വന്നത്. സ്വപ്‌നയെ മറയാക്കി ശിവശങ്കര്‍ പണമിടപാട് നടത്തിയിരുന്നതായി കഴിഞ്ഞ ദിവസം ശിവശങ്കറിന്റെ മുന്‍കൂര്‍ ജാമ്യാപേക്ഷയെ എതിര്‍ത്തു കൊണ്ട് ഇഡി ഹൈക്കോടതിയില്‍ വ്യക്തമാക്കിയിരുന്നു. ഈ ചാറ്റിന്റെ വിശദാംശങ്ങള്‍ ഹൈക്കോടതിയില്‍ ഇഡി സീല്‍ വച്ച കവറില്‍ സമര്‍പ്പിക്കുകയും ചെയ്തു. ഈ വാട്‌സാപ്പ് ചാറ്റിലെ ചില വിവരങ്ങളാണ് ഇപ്പോള്‍ പുറത്തു വന്നിരിക്കുന്നത്.

ശിവശങ്കറിന്റെ സുഹൃത്ത് കൂടിയാണ് നികുതി വിദഗ്ദ്ധനും ചാര്‍ട്ടേഡ് അക്കൗണ്ടന്റുമായ വേണുഗോപാല്‍. സ്വപ്‌നയ്ക്ക് വേണ്ടി ലോക്കറില്‍ പണം നിക്ഷേപിച്ചതുമായി ബന്ധപ്പെട്ട കാര്യങ്ങളെല്ലാം ഇരുവരും വാട്‌സാപ്പില്‍ ചര്‍ച്ച ചെയ്യുന്നുണ്ട്. നിക്ഷേപം ഏതെല്ലാം രീതിയില്‍ കൈകാര്യം ചെയ്യണമെന്നും വേണുഗോപാലില്‍ നിന്നും ശിവശങ്കര്‍ ചോദിച്ചറിയുന്നുണ്ട്. 2018 നവംബര്‍ മുതലാണ് ഇരുവരും തമ്മിലുള്ള ചാറ്റിംഗ് ആരംഭിക്കുന്നത്.

ഇതില്‍ ജൂലൈ 21 മുതല്‍ ഓഗസ്റ്റ് 10 വരെയുള്ള ചാറ്റുകളാണ് കേന്ദ്ര ഏജന്‍സികള്‍ പ്രധാനമായും പരിശോധിച്ചത്. ഇതാണ് ശിവശങ്കറിന് കുരുക്കായി മാറിയതും. ലോക്കറിനെ കുറിച്ചുള്ള ആശങ്കയാണ് ചാറ്റുകളില്‍ നിറയുന്നത്. സ്വപ്‌ന അറസ്റ്റിലായ പത്ത് ദിവസത്തിന് ശേഷമുള്ള ചാറ്റുകളാണ് പുറത്തു വരുന്നത്. ഈ സമയത്ത് വേണുഗോപാലിനെ കുറിച്ചുള്ള വിവരങ്ങള്‍ പുറത്തു വന്നിരുന്നു. വളരെ വിശദമായ ചര്‍ച്ചകള്‍ ഇതുമായി ബന്ധപ്പെട്ട് നടന്നു. കസ്റ്റംസില്‍ നിന്ന് വിളി വന്നതിന് ശേഷവും ചര്‍ച്ച വാട്‌സാപ്പില്‍ നടന്നു. ലോക്കറിനെ കുറിച്ചാണ് ചോദിച്ചതെന്നും ശിവശങ്കറിനോട് ചോദ്യം ചെയ്യലിന് ശേഷം ചാര്‍ട്ടേഡ് അക്കൗണ്ടന്റെ വെളിപ്പെടുത്തുന്നുണ്ട്. സാമ്പത്തികത്തെ കുറിച്ച് അന്വേഷണം തുടങ്ങിയെന്ന ഭയവും വാട്‌സാപ്പ് സന്ദേശങ്ങളിലൂണ്ട്.

സ്വര്‍ണക്കടത്തിലെ ഗൂഢാലോചനയില്‍ ശിവശങ്കറിന് നേരിട്ട് പങ്കുണ്ട്. മുഖ്യമന്ത്രിയുടെ സെക്രട്ടറി എന്ന പദവി കള്ളക്കടത്തിന് ഉപയോഗിച്ചെന്നും ഇഡി. ഹൈക്കോടതിയില്‍ ശിവശങ്കറിന്റെ മുന്‍കൂര്‍ ജാമ്യാപേക്ഷയിലുള്ള വാദത്തിലാണ് ഇഡി ഇക്കാര്യം അറിയിച്ചത്. ഇതിനുള്ള തെളിവുകള്‍ ഇഡി ഹൈക്കോടതിയില്‍ മുദ്രവച്ച കവറില്‍ കൊടുത്തു. സ്വര്‍ണം അടങ്ങിയ ബാഗ് വിട്ടു നല്‍കാന്‍ ശിവശങ്കര്‍ കസ്റ്റംസിനെ വിളിച്ചെന്നും ജാമ്യം നല്‍കിയാല്‍ തെളിവുകള്‍ നശിപ്പിക്കപ്പെടുമെന്നും ഇഡി വാദിച്ചു. അതേസമയം, ഇത്തരം വാദങ്ങള്‍ തന്നെ സമൂഹത്തില്‍ വെറുക്കപ്പെട്ടവനാക്കി മാറ്റിയെന്നും കള്ളക്കടത്തില്‍ ഒരു പങ്കുമില്ലെന്നും ശിവശങ്കര്‍ കോടതിയെ അറിയിച്ചു. ഇതിന് പിന്നാലെയാണ് നിര്‍ണ്ണായക വിവരങ്ങള്‍ പുറത്തു വരുന്നത്.

ശിവശങ്കറിന്റെ മുന്‍കൂര്‍ ജാമ്യഹര്‍ജി പരിഗണിക്കവേ നടന്നത് ശക്തമായ വാദപ്രതിവാദങ്ങളായിരുന്നു. സ്വര്‍ണക്കടത്തിനുപിന്നിലും ശിവശങ്കറിന്റെ കരങ്ങളുണ്ടെന്ന ഗുരുതരമായ ആരോപണങ്ങളാണ് എന്‍ഫോഴ്‌സ്‌മെന്റ് ഡയറക്ടറേറ്റിനായി ഡയല്‍ഹിയില്‍നിന്ന് ഹാജരായ അഡീഷണല്‍ സോളിസിറ്റര്‍ ഉന്നയിച്ചത്. എന്നാല്‍, അന്വേഷണ ഏജന്‍സികള്‍ പടച്ചുവിടുന്നത് കാല്പനിക കഥകളാണെന്നായിരുന്നു ശിവശങ്കറിനായി ഹാജരായ മുതിര്‍ന്ന അഭിഭാഷകന്റെ മറുപടി.

വാട്‌സാപ്പ് മെസേജുകളെക്കുറിച്ച് പറയുമ്പോള്‍ ഓര്‍ക്കുന്നില്ല, അറിയില്ല എന്നാണ് ശിവശങ്കര്‍ പറയുന്നതെന്നാണ് ഇ.ഡി.യുടെ വാദം. സ്വപ്‌നയ്ക്ക് ജോലിനേടാനും ഫഌറ്റ് നേടാനും സഹായിച്ചു. ചോദ്യം ചെയ്യാന്‍ ഹാജരായി എന്നുപറഞ്ഞിട്ട് കാര്യമില്ല, സത്യം പറയണം. ശിവശങ്കര്‍ പറയുന്നത് തെറ്റാണെന്ന് തെളിയിക്കുന്നതാണ് വാട്‌സാപ്പ് സന്ദേശങ്ങള്‍. അന്വേഷണത്തില്‍ കണ്ടെത്തിയ എല്ലാ കാര്യങ്ങളും ഇപ്പോള്‍ വെളിപ്പെടുത്താനാകില്ല. ചോദ്യംചെയ്യാന്‍ ആദ്യം ഹാജരായപ്പോഴില്ലാത്ത അറസ്റ്റ് ഭയം എന്തുകൊണ്ടാണിപ്പോള്‍. മികച്ച നിലയില്‍ ആസൂത്രണംചെയ്താണ് സ്വര്‍ണം കടത്തിയത്. ഗൂഢാലോചനയില്‍ വളരെ സ്വാധീനമുള്ളവര്‍ പങ്കാളിയായിട്ടുണ്ടെന്നും കേന്ദ്ര ഏജന്‍സികള്‍ പറയുന്നു. ഏതുകേസിന്റെ പേരിലാണ് അറസ്റ്റ് ഭയക്കുന്നതെന്നുപോലും ഹര്‍ജിയില്‍ ഇല്ല. സാമ്പത്തികകുറ്റകൃത്യങ്ങളില്‍ മുന്‍കൂര്‍ ജാമ്യം അനുവദിക്കുന്നത് തെളിവുനശിപ്പിക്കുന്നതിന് സഹായകമാകും . ശിവശങ്കര്‍ ചോദ്യങ്ങളില്‍നിന്ന് ഒഴിഞ്ഞുമാറുകയാണ്. ജാമ്യഹര്‍ജി തള്ളുകയോ തീര്‍പ്പാക്കുകയോ വേണമെന്ന് കസ്റ്റംസ് ഹൈക്കോടതിയില്‍ അറിയിച്ചിരുന്നു. സ്വര്‍ണക്കടത്തില്‍ സ്വപ്‌നാ സുരേഷ് മുഖംമാത്രമായിരുന്നുവെന്നും പിന്നില്‍ ശിവശങ്കറാകാമെന്നും എന്‍ഫോഴ്‌സ്‌മെന്റ് ഡയറക്ടറേറ്റ് ഹൈക്കോടതിയില്‍ നിലപാട് എടുത്തിരുന്നു.

ശിവശങ്കറിനോട് ഇഡി 35 ലക്ഷം രൂപ ബാങ്കില്‍ നിക്ഷേപിച്ചതിനെക്കുറിച്ച് ചോദിച്ചപ്പോള്‍ ഇല്ല എന്നാണ് അദ്ദേഹം മറുപടി നല്‍കിയത്. വേണുഗോപാലുമായി പണമിടപാടിനെക്കുറിച്ച് ചര്‍ച്ച ചെയ്തിരുന്നുവോ എന്ന് ഇഡി ചോദിച്ചപ്പോഴും അദ്ദേഹം ഇല്ല എന്നാണ് പറഞ്ഞത്. സ്വപ്‌നയുടെ പണമിടപാടുകളെ കുറിച്ച് തനിക്ക് യാതൊരു വിവരവുമില്ലെന്നാണ് ഇതിലൂടെ ശിവശങ്കര്‍ സ്ഥാപിക്കാന്‍ ശ്രമിച്ചെതെങ്കിലും ഈ വാദത്തെ എതിര്‍ക്കുന്ന വിവരങ്ങളാണ് വാട്‌സാപ്പ് ചാറ്റിലൂടെ പുറത്തു വരുന്നത്.