ഇടുക്കി ജില്ലാ ഡോഗ് സ്ക്വാഡില് ഡോണയും ഡോളിയും ചുമതലയേറ്റു
ഇടുക്കി ജില്ലാ പൊലീസ് മേധാവിയുടെ ഓഫിസിലെത്തി സല്യൂട്ട് നല്കി ജില്ലാ ഡോഗ് സ്ക്വാഡില് ഡോണയും ഡോളിയും ഇന്നലെ മുതല് ചുമതലയേറ്റു. ജില്ലാ പൊലീസ് സേനയുടെ ഡോഗ് സ്ക്വാഡില് ഡോളിയുടെ നിയമനം ബോംബ് സ്ക്വാഡിലേക്കും ഡോണയുടെ നിയമനം പ്രളയ ബാധിത മേഖലകളിലും ദുരന്തഭൂമിയിലും രക്ഷാപ്രവര്ത്തനത്തിന് സഹായിക്കാനുമാണ്.
തൃശൂര് പൊലീസ് അക്കാദമിയില് 2 പോലീസ് നായകളും പരിശീലനം പൂര്ത്തിയാക്കി. ജില്ലാ പൊലീസ് മേധാവി ആര്. കറുപ്പുസ്വാമി, എഎസ്പി സുരേഷ്, നര്കോട്ടിക് ഡിവൈഎസ്പി എ.ജി. ലാല്, ഡോഗ് സ്ക്വാഡ് ഇന്ചാര്ജ് റോയി തോമസ്, പരിശീലകരായ 14 പൊലീസ് ഉദ്യോഗസ്ഥര് എന്നിവര്ക്കാണ് ഇടുക്കി ഡോഗ് സ്ക്വാഡിന്റെ നിയന്ത്രണം.
മോഷണക്കേസുകള് തെളിയിക്കാന് സാഹായിച്ചിരുന്ന സ്വീറ്റിയും ബോംബ് സ്ക്വാഡിലെ ഫിഡോയും കഴിഞ്ഞ വര്ഷം വിരമിച്ചിരുന്നു. ഈ ഒഴിവിലേക്കാണ് 2 പുതിയ അംഗങ്ങള് എത്തിയത്. മോഷണ, കൊലപാതക കേസുകളില് അന്വേഷണം നടത്തുന്ന ജനി, സ്റ്റെഫി എന്നീ നായ്ക്കളും സ്ഫോടക വസ്തു കേസുകളില് സഹായിക്കുന്ന ചന്തുവും നര്കോട്ടിക് കേസുകളില് അന്വേഷണ പങ്കാളികളാകുന്ന ലെയ്ക്ക, ബ്രൂസ് എന്നിവയാണ് ഇടുക്കി ഡോഗ് സ്ക്വാഡിലെ മറ്റു പൊലീസ് നായ്ക്കള്.
ബീഗിള് ഇനത്തില്പെട്ട നായയായ ഡോളിയ്ക്ക് ഒരു വയസ്സു മാത്രം പ്രായമായതിനാല് കുട്ടിക്കളി കൂടുതലാണ്. എന്നാല്, സ്ഫോടക വസ്തു കണ്ടെത്താന് ഡോളിക്കു കഴിവ് കൂടുതലാണെന്ന് പൊലീസ് ഉദ്യോഗസ്ഥര് പറയുന്നു. പൊലീസ് സേനയില് 352 എന്ന നമ്പറാണ് ഡോളിക്കു നല്കിയിരിക്കുന്നത്. ജുബിന് വി ജോസഫും ആര്.ബിനുവുമാണ് ഹാന്ഡ്ലര്മാര്. ചെറു ശരീരമായതിനാല് വാഹനങ്ങളുടെ കീഴിലും മറ്റും ഡോളിക്കു കയറി പരിശോധിക്കാം. മണം പിടിക്കാന് കൂടുതല് കഴിവുണ്ട്. പ്രായം കുറവായതിനാല് സ്ക്വാഡിലേ മറ്റ് അംഗങ്ങള്ക്കൊപ്പം കളിക്കാനാണ് താല്പര്യം. എന്നാല് ജോലിക്കിറക്കിയാല് മട്ടു മാറും.
ഇന്നലെ ഡ്യൂട്ടിക്കെത്തിയപ്പോള് ഡോണ ഗൗരവക്കാരിയായിരുന്നു. പ്രകൃതി ദുരന്തങ്ങളില് മണ്ണിനടിയില്പെടുന്ന മനുഷ്യരെയും മൃഗങ്ങളെയും മണത്തു കണ്ടുപിടിക്കാനാണു ഡോണയുടെ സേവനം ഉപയോഗിക്കുന്നത്. പഞ്ചാബില് നിന്ന് എത്തിയ ലാബ്രഡോര് ഇനത്തില്പെട്ട ഡോണ പെട്ടിമുടിയില് തിരച്ചില് നടത്തിയിരുന്നു. പൊലീസ് സേനയില് 362 എന്ന നമ്പറാണ് ഡോണയ്ക്കു നല്കിയിരിക്കുന്നത്. പി.പ്രദീപും ടി.ആര്. അനീഷുമാണ് ഹാന്ഡ്ലര്മാര്.
https://www.facebook.com/Malayalivartha