1979- ല്‍ പൂഞ്ഞാറില്‍ ഇരു മുന്നണികളെയും ഞെട്ടിച്ച്, കടത്തിണ്ണയില്‍ ഉറങ്ങിയും ഭിക്ഷ യാചിച്ചും ജീവിതം പിന്നിട്ട അമ്മാമ്മയെന്ന തൊമ്മി മറിയം പഞ്ചായത്തംഗമായി ജയിച്ചുകയറി.

ഇപ്പോഴും പൂഞ്ഞാറിലെ നാല്‍ക്കവലകളില്‍ തിരഞ്ഞെടുപ്പ് അടുക്കുമ്പോള്‍ കേള്‍ക്കാറുള്ള ഒരു പഴഞ്ചൊല്ലുണ്ട്; അമ്മാമ്മയ്ക്കു ജയിക്കാമെങ്കില്‍ ആര്‍ക്കും ജയിക്കാമെന്ന്! കടത്തിണ്ണയില്‍ ഉറങ്ങിയും ഭിക്ഷ യാചിച്ചും പന്നിയെ വളര്‍ത്തിയും ജീവിച്ചിരുന്ന അമ്മാമ്മയെന്ന പാറയ്ക്കല്‍ തൊമ്മി മറിയം 1979-ല്‍ പഞ്ചായത്ത് തിരഞ്ഞെടുപ്പില്‍ വിജയിച്ചതോടെയാണ് ഇങ്ങനെയൊരു ചൊല്ലുണ്ടായത്.

പൂഞ്ഞാര്‍ തെക്കേക്കര പഞ്ചായത്തിലെ ടൗണ്‍ വാര്‍ഡില്‍ നിന്ന് അമ്മാമ്മ 80-ാം വയസ്സില്‍ 278 വോട്ടിന്റെ ഭൂരിപക്ഷത്തോടെ പഞ്ചായത്ത് അംഗമായത്് രണ്ടു മുന്നണികളുടെ സ്ഥാനാര്‍ഥികളെയും പരാജയപ്പെടുത്തിയായിരുന്നു.

അമ്മാമ്മയെ സ്ഥാനാര്‍ഥിയായി രംഗത്തിറക്കിയത് അക്കാലത്തെ പൊതുപ്രവര്‍ത്തകനായ തോട്ടക്കര ചാക്കോച്ചനാണ്. പത്രങ്ങളിലും റേഡിയോയിലും പ്രധാന വാര്‍ത്തയായിരുന്നു അമ്മാമ്മയുടെ വിജയം. എഴുത്തും വായനയും അറിയാത്ത അമ്മാമ്മ സത്യപ്രതിജ്ഞയ്ക്ക് ശേഷം ഒപ്പിടുന്നതിനു പകരം വിരലടയാളം പതിച്ചു. പഞ്ചായത്തംഗമായ ശേഷവും താമസിച്ചത് കടത്തിണ്ണയില്‍ത്തന്നെയായിരുന്നു.

പി.സി. ജോര്‍ജ് കന്നി അങ്കം കുറിച്ച 1980-ലെ നിയമസഭാ തിരഞ്ഞെടുപ്പിലും അമ്മാമ്മ മല്‍സരരംഗത്തിറങ്ങി. എരിയുന്ന തീപ്പന്തമായിരുന്നു ചിഹ്നം. മത്സരത്തില്‍ പരാജയപ്പെട്ടെങ്കിലും 1,704 വോട്ടു നേടി. ജോര്‍ജിന്റെ അന്നത്തെ ഭൂരിപക്ഷം 1,148 വോട്ടാണ്. 1983-ലായിരുന്നു അമ്മാമ്മയുടെ മരണം.