വയനാട്ടില് ഹെലികോപ്ടറെത്തി, വൈശാഖിന്റെ കല്യാണപ്പെണ്ണിനെ എത്തിച്ചു!
വയനാട് പുല്പ്പള്ളി പഴശിരാജാ കോളജ് ഗ്രൗണ്ടില് ഇന്നലെ രാവിലെ 10 -മണിയ്ക്ക് ഒരു ഹെലികോപ്റ്റര് പറന്നിറങ്ങി. സാധാരണയായി രാഷ്ട്രീയ നേതാക്കളെയുംകൊണ്ടാണ് ഹെലികോപ്ടറുകള് വയനാട്ടിലെത്തുന്നത്. അതുകൊണ്ട് ഹെലികോപ്റ്ററില്നിന്നിറങ്ങുന്ന ആളെ കാണാന് നാട്ടുകാര് ആകാംക്ഷാഭരിതരായി. എന്നാല് അതില് നിന്നിറങ്ങിയ ആളെ കണ്ടപ്പോള് നാട്ടുകാരുടെ കൗതുകം ഇരട്ടിയായി.
ഹെലികോപ്റ്ററില്നിന്ന് പുറത്തിറങ്ങിയത് ഒരു കല്യാണപ്പെണ്ണ് ആയിരുന്നു.ഹെലികോപ്ടറില് വധുവെത്തിയത് നാട്ടുകാര്ക്കിടയില് വാര്ത്തയായി.
കല്യാണത്തിന് 'പറന്നെത്തി'യത് ഇടുക്കി വണ്ടന്മേട് ആമയാര് ആക്കാട്ടമുണ്ടയില് ലൂക്ക് തോമസിന്റെയും (ബേബിച്ചന്) ലിനിയുടെയും മകളായ മരിയ ലൂക്കാണ്. പുല്പ്പള്ളി ആടിക്കൊല്ലി കക്കുഴിയില് ടോമി-ഡോളി ദമ്പതികളുടെ മകനായ വൈശാഖാണ് വരന്. വൈശാഖും കുടുംബാംഗങ്ങളും ചേര്ന്നു വധുവിനെയും ബന്ധുക്കളെയും സ്വീകരിച്ചു.
ഇന്നലെ രാവിലെ ഹെലികോപ്റ്റര് വണ്ടന്മേട് ആമയാര് എം.ഇ.എസ്. സ്കൂള് ഗ്രൗണ്ടില് പറന്നിറങ്ങിയപ്പോഴാണ് വധുവിന്റെ യാത്രയ്ക്കാണെന്ന വിവരം നാട്ടുകാരും അറിഞ്ഞത്. ആടിക്കൊല്ലി സെന്റ് സെബാസ്റ്റിയന്സ് പള്ളിയിലായിരുന്നു വിവാഹം.
വധുവിന്റെയും വീട്ടുകാരുടെയും ഹെലികോപ്റ്റര്യാത്ര കാണാന് നാട്ടുകാരും ഒപ്പംകൂടി. ഒന്നര മണിക്കൂറില് താഴെ സമയംകൊണ്ടു വയനാട്ടിലെത്തിയ സംഘം വിവാഹം കഴിഞ്ഞു വൈകിട്ട് ഹെലികോപ്റ്ററില്തന്നെ സ്വദേശത്തു മടങ്ങിയെത്തി.
കോവിഡ്-19 മഹാമാരിയും ദൂരക്കൂടുതലും കണക്കിലെടുത്താണ് യാത്രയ്ക്കു ഹെലികോപ്റ്റര് തെരഞ്ഞെടുത്തതെന്നു മരിയയുടെ സഹോദരന് പറഞ്ഞു. മരിയ മണ്ണുത്തി കാര്ഷിക സര്വകലാശാല ഫാം ഓഫീസറാണ്. വൈശാഖ് ഭുവനേശ്വറില് പിഎച്ച്.ഡി. ചെയ്യുന്നു.
https://www.facebook.com/Malayalivartha