ശബരിമല വിഷയത്തില്‍ കൈപൊള്ളിയ പിണറായി വിജയന്‍ സര്‍ക്കാര്‍ നവോത്ഥാനം അവസാനിപ്പിച്ചു. ഇനി യുവതികള്‍ ശബരിമലയിലേക്ക് വരേണ്ടെന്ന നിലപാടില്‍ എത്തിയിരിക്കുകയാണ് എല്‍.ഡി.എഫ് സര്‍ക്കാര്‍. ഇതിന്റെ ഭാഗമായി 50 വയസിനു താഴെയുള്ള സ്ത്രീകളെ ശബരിമലയില്‍ ദര്‍ശനത്തിന് അനുവദിക്കില്ലെന്ന നിര്‍ദേശവുമായി കേരള പോലീസ്. ശബരിമല ദര്‍ശനത്തിനുള്ള ഓണ്‍ലൈന്‍ സംവിധാനമായ വെര്‍ച്വല്‍ ക്യൂ ബുക്കിംഗിനായുള്ള നിര്‍ദേശത്തിലാണ് പോലീസ് പ്രസ്തുത നിര്‍ദേശം കൂടി ചേര്‍ത്തിരിക്കുന്നത്.

കേരള പോലീസിന്റെ തന്നെ നിയന്ത്രണത്തിലുള്ള 'ശബരിമല ഓണ്‍ലൈന്‍ സര്‍വീസസ്' എന്ന വെബ്‌സൈറ്റിലാണ് നിര്‍ദേശമുള്ളത്. ഗൈഡ്ലൈന്‍സ് എന്ന ലിങ്കിലാണ് കോവിഡ് മാര്‍ഗ നിര്‍ദേശത്തിന്റെ മൂന്നാമതായി 50 വയസിനു താഴെയുള്ള സ്ത്രീകളെ ശബരിമലയില്‍ ദര്‍ശനത്തിന് അനുവദിക്കില്ലെന്ന് ചേര്‍ത്തിട്ടുള്ളത്. 50 വയസില്‍ താഴെയുള്ള സ്ത്രീകളെയോ മറ്റ് ലിംഗക്കാരെയോ, 65 വയസിന് മുകളിലുള്ള സ്ത്രീകളെയോ ശബരിമലയില്‍ ദര്‍ശനത്തിന് അനുവദിക്കില്ല എന്നാണ് നിര്‍ദേശം.

2019 ജനുവരി രണ്ടിനാണ് ബിന്ദു അമ്മിണിയും കനക ദുര്‍ഗയും ശബരിമലയില്‍ ദര്‍ശനം നടത്തിയത്. പോലീസ് സംരക്ഷണയിലായിരുന്നു ഇരുവരും അന്ന് ദര്‍ശനം നടത്തിയത്. അതേ പോലീസ് തന്നെയാണ് ഒരു വര്‍ഷം പിന്നിടുമ്പോള്‍ 50 വയസിന് താഴെയുള്ള സ്ത്രീകളെ ദര്‍ശനത്തിന് അനുവദിക്കില്ല എന്ന നിര്‍ദേശം വച്ചിരിക്കുന്നത്. ശബരിമല യുവതി പ്രവേശനം, വിശാല ബെഞ്ചിന് വിട്ടുകൊണ്ട് കഴിഞ്ഞ വര്‍ഷം നവംബര്‍ 14ന് ആണ് സുപ്രീം കോടതി ഉത്തരവിട്ടത്. ചീഫ് ജസ്റ്റിസ് രഞ്ജന്‍ ഗൊഗോയിയുടെ അധ്യക്ഷതയിലുള്ള ഭരണഘടന ബെഞ്ചാണ് വിധി പ്രസ്താവിച്ചത്. എന്നാല്‍ യുവതീപ്രവേശം അനുവദിച്ച വിധിക്ക് സ്റ്റേയുണ്ടോയെന്ന് വിധിയില്‍ പരാമര്‍ശിച്ചിട്ടുമുണ്ടായിരുന്നില്ല.

നവോത്ഥാനത്തിന്റെ പേരില്‍ വനിതാമതില്‍ തീര്‍ത്ത സര്‍ക്കാര്‍ അന്നു തന്നെയാണ് ബിന്ദു അമ്മിണിയെയും കനക ദുര്‍ഗയെയും ശബരിമലയില്‍ നടന്ന പ്രതിഷേധങ്ങള്‍ക്കിടയില്‍ പോലീസ് ഒളിച്ച് കടത്തി വിട്ടത്. ഇത് സംസ്ഥാനത്ത് വിശ്വാസികളുടെ കനത്ത പ്രതിഷേധത്തിന് ഇടയാക്കുകയും ചെയ്തു. തുടര്‍ന്ന് നടന്ന പാര്‍ലമെന്റ് തെരഞ്ഞെടുപ്പ് ഇടതുമുന്നണിയുടെ കനത്ത പരാജയത്തിന് ഏറ്റവും പ്രധാന കാരണമായി ചൂണ്ടികാട്ടിയതും സര്‍ക്കാര്‍ വിശ്വാസികളോട് കാട്ടിയ ഈ നീതികേടായിരുന്നു. അതിന്‌ശേഷം ശബരിമലയുമായി ബന്ധപ്പെട്ട വിഷയത്തില്‍ അതീവജാഗ്രതയോടെയാണ് സര്‍ക്കാര്‍ പ്രതികരിക്കുന്നത്.

ഇത്തവണത്തെ തീര്‍ത്ഥാടനം തുടങ്ങി ദിവസങ്ങള്‍ കഴിഞ്ഞപ്പോള്‍ ദേവസ്വം ബോര്‍ഡിന് കനത്ത വരുമാനനഷ്ടമാണ് ഉണ്ടായത്. ഇതു മറികടക്കുന്നതിന്റെ ഭാഗമായാണ് സര്‍ക്കാര്‍ കൂടുതല്‍ തീര്‍ത്ഥാടകരെ ദര്‍ശനത്തിന് അനുവദിച്ചത്. ഇതിന്റെ ഭാഗമായാണ് വെര്‍ച്വല്‍ ക്യു സംവിധാനം പോലീസ് ആരംഭിച്ചത്. ഇതിലാണ് യുവതികളെ വിലക്കിക്കൊണ്ടുള്ള കോവിഡ് മാനദണ്ഡം പോലീസ് വച്ചത്. ഇതിലൂടെ വിവാദങ്ങള്‍ ഒഴിവാക്കി വരുമാനം വര്‍ധിപ്പിക്കുക എന്ന ലക്ഷ്യം മാത്രമാണ് സര്‍ക്കാരിനുള്ളതെന്നും വ്യക്തമാണ്. ഇന്ന് മുതല്‍ കൂടുതല്‍ തീര്‍ത്ഥാടകരെ ദര്‍ശനത്തിന് അനുവദിക്കും. ഇന്ന് 12 മണി മുതലാണ് വെര്‍ച്വല്‍ ക്യൂ ബുക്കിംഗ് ആരംഭിക്കുക. ആയിരത്തില്‍ നിന്ന് രണ്ടായിരമാക്കിയാണ് തീര്‍ത്ഥാടകരുടെ എണ്ണം ഉയര്‍ത്തിയത്.